مەملەكەتتىك دەنساۋلىق ساقتاۋ – سالاماتتىق كوميتەتى: دەنە سالماعى قانشالىقتى جەڭىل بولسا سونشالىقتى جاقسى بولادى دەۋگە كەلمەيدى! 

مەملەكەتتىك دەنساۋلىق ساقتاۋ – سالاماتتىق كوميتەتى بۇگىن (9 -ايدىڭ 23 - كۇنى) اقپار جاريالاۋ ءماجىلىسىن اشىپ، ماۋسىم مەن امال جانە دەنساۋلىققا قاتىستى جاعدايلاردى تانىستىردى. مەملەكەتتىك دەنساۋلىق ساقتاۋ – سالاماتتىق كوميتەتىنىڭ اقپار مالىمدەمەشىسى حۋ چياڭچياڭ بىلاي دەپ تانىستىردى: جۋىردا ءبىر قىدىرۋ اقپارات قۇرالدارىنىڭ حابارلاۋىنشا، ءىشىنارا جاتتىعۋ ارقىلى ارىقتاتۋ لاگەرلەرى ”تەز ارادا كۇرت ارىقتاتامىز“، ”ارىقتاماساڭ اقىڭدى قايتارىپ بەرەمىز“ دەگەن سياقتى اسىرەلەگەن جارنامالار ارقىلى وقۋشى قابىلداپ، تاماقتان شەكتەن تىس تيىلۋ، شەكتەن تىس جاتتىعۋ سياقتى تاسىلدەرمەن تەز ارىقتاتپاق بولىپ، كۋرسانتتاردىڭ جارالانۋى، ءولىم - ءجىتىم وقيعالارى بىرنەشە رەت تۋىلعان. كەيبىر قۇرىلىمداردا دەنساۋلىق جاعدايىن ساراپتاۋ جەتكىلىكسىز بولۋ، شۇعىل قامتاماسىزداندىرۋدى تياناقتاندىرماۋ، جاتتىقتىرۋشىلاردىڭ تولىمدىلىق كۋالىگى بولماۋ قاتارلى ماسەلەلەر دە ساقتالىپ وتىرعاندىقتان، جۇرتشىلىقتىڭ دەنساۋلىعىنا جانە مال - مۇلكىنە زيان جەتكىزگەن.

مەملەكەتتىك دەنساۋلىق ساقتاۋ – سالاماتتىق كوميتەتى مىنانى ەسكەرتتى:

دەنە سالماعى قانشالىقتى جەڭىل بولسا سونشالىقتى جاقسى بولادى دەۋگە كەلمەيدى. دەنە سالماعىن دەنساۋلىققا پايدالى ولشەمدە ۇستاۋ ۇيلەسىمدى ازىقتانۋ، لايىقتى ارەكەت جاساۋ جانە دەنساۋلىققا پايدالى تۇرمىس ءتاسىلى نەگىزىندە جۇزەگە اسۋى كەرەك، كوزسىزدىكپەن قىسقا مەرزىم ىشىندە تەز ارىقتاۋعا بوي ۇرماعان ءجون. تاماقتان شەكتەن تىس تيىلۋ، شەكتەن تىس ارەكەتتەنۋ دەنەنىڭ سۋسىزدانۋى، شاشتىڭ ءتۇسۋى، ەلەكتروليتتىڭ بۇزىلۋى، بۇلشىق ەتتىڭ زايا بولۋى قاتارلىلارعا اپارىپ سوقتىرۋى مۇمكىن، اۋىر بولعاندا جۇرەك - قان تامىر اۋرۋلارى قاتارلى دەنساۋلىققا قاتىستى حاۋىپ - قاتەرلەردى ارتتىرۋى دا ىقتيمال.

ارىقتاۋ ءۇشىن جاتتىعۋ جاساۋ بارىسىندا ءوزىنىڭ دەنساۋلىق جاعدايىنا نەگىزدەلىپ، قاجەتتى مەديتسينالىق جانە سپورتتىق حاۋىپ – قاتەرلەرگە باعالاۋ جۇرگىزۋ ءتيىس. جۇرەك – مي قان تامىر اۋرۋلارى، زات الماسۋ سيپاتتى اۋرۋلار قاتارلى نەگىزدىك اۋرۋلارعا شالدىققان ادامدار دەنە سالماعىن تەجەۋدى كاسىپتىك قىزمەتكەرلەردىڭ جەتەكشىلىگىندە دەنساۋلىققا پايدالى تۇردە ورىنداعانى ءجون. جاتتىعۋ بارىسىندا كەۋدەنىڭ سىعىلۋى، جۇرەك قاعىسىنىڭ تەزدەۋى، باس اينالۋ، دارمەنسىزدەنۋ قاتارلى جايسىزدانۋ جاعدايلارى بايقالسا، جاتتىعۋدى دەرەۋ توقتاتۋ، قاجەت بولعان جاعدايدا ۋاعىندا شيپاحاناعا بارۋ كەرەك.

قازىر 3 - دارەجەلى جالپىلىق مەملەكەتتىك ەمحانالاردىڭ %95 تەن استامىندا دەنە سالماعىن دەنساۋلىققا پايدالى كولەمدە تەجەۋ امبۋلاتورياسى ورنالاستىرىلعان، دەنە سالماعىنا قاتىستى ماسەلەلەرگە جولىققانداردىڭ ەمحانالارعا بارىپ كەڭەس الۋىنا جانە ءجون سىلتەۋدى وتىنۋىنە بولادى.

كەلۋ قاينارى: حالىق تورابى