جۇڭگونىڭ ساۋد ارابياسىنداعى باس ەلشىلىگى جۇڭگو ازاماتتارىنا ساۋد ارابياسىندا ۇشاقپەن ساپارلاۋدى ۋاقىتشا توقتاتۋ جونىندە ۇسىنىس بەردى

جۇڭگو اقپارات تورابى 10 – ايدىڭ 22 – كۇنى حابارلايدى. جۇڭگونىڭ ساۋد ارابياسىنداعى باس ەلشىلىگىنىڭ ۋيشين تەكشەسىنىڭ حابارلاۋىنشا، 10 – ايدىڭ 22 – كۇنى تاڭ سارىدە، ساۋد ارابياسى حالىقتىق اۆياتسيانى باسقارۋ مەكەمەسى جاريالاعان ۇقتىرۋعا قاراعاندا: داممان فاحد پاتشا حالىقارالىق اۋەجايى 10 – ايدىڭ 21 – كۇنى (سارسەنبى) كەشتە شابۋىلعا ۇشىراعان، قازىرگە دەيىن ءبىر ادام قازا بولىپ، سەگىز ادام جارالانعان، زاتتىق جاقتا زيانعا ۇشىراۋ جاعدايى ءالى اداقتالۋ ۇستىندە. مۇنان سىرت، رەسمي اقپاراتتارعا قاراعاندا، ادەن اۆياتسيا سەرىكتەستىگىنىڭ جولاۋشىلار ۇشاعى وسى رەتكى شابۋىلدا بۇلىنگەن، ۇشاقتاعى ءبىر ادام جارالانعان.

جۋىردان بەرى، ساۋد ارابياسىنىڭ رياد، داممان قاتارلى جەرلەرىندەگى اۋەجايلار مەن ماڭىزدى قۇرىلعىلار باسقارىلمالى بومبى جانە ۇشقىشسىز ۇشاق شابۋىلىنا ۇزدىكسىز ۇشىرادى. رياد حاليد پاتشا حالىقارالىق اۋەجايى مەن وڭتۇستىكتەگى كەيبىر قالالارداعى اۋەجايلاردىڭ جۇمىسىن قالپىنا كەلتىرۋ تۋرالى ءالى دە ناقتى مالىمەت بەرىلمەدى، باسقا قالالارداعى اۋەجايلاردا دا كەزەكشى ۇشاقتارعا قاتىستى كەڭ كولەمدى قالىپسىز جاعدايلار ۇنەمى تۋىلۋدا.

جۇڭگونىڭ ساۋد ارابياسىندا تۇراتىن ەلشىلىگى مەن كونسۋلحانالارى ساۋد ارابياسىنداعى جۇڭگو قارجىسىنداعى قۇرىلىمدار مەن جۇڭگو ازاماتتارىنا حاۋىپسىزدىك تانىمىن، ساقتىق تانىمىن ءسوزسىز جوعارىلاتىپ، قاجەتسىز جاعدايلاردا سىرتقا شىعۋدى ازايتىپ، اۋەجاي، مۇناي قۇرىلعىلارى، اسكەري بازالار قاتارلى سەزىمتال وڭىرلەردەن الىس ءجۇرۋدى، اسكەري ارەكەت پەن سەزىمتال قۇرىلعىلاردى سۋرەتكە، كەسكىنگە تۇسىرمەۋدى قايتالاي ەسكەرتتى. جۋىردا ساۋد ارابياسىندا ۇشاقپەن ساياحاتتاماعانىڭىز ءجون، بەلەت العان جولاۋشىلار قاتىستى اۆياتسيا سەرىكتەستىگىمەن تىعىز بايلانىس جاساپ، كەزەكشى ۇشاقتارعا قاتىستى وزگەرىستەر مەن قاتىستى اۋەجايداعى جاعدايلارعا نازار اۋدارعانى ءجون. تالاس - تارتىس تۋىلعان كەزدە قاتىستى ىسپاتتاردى ويداعىداي ساقتاپ، ۇقىعىڭىزدى بايىپتىلىقپەن قورعاڭىز.

ساۋد ارابياسىنا 3 – مەملەكەت ارقىلى قۇرلىق جولىمەن كىرىپ – شىعاتىن ادامدار قاتىستى مەملەكەتتەردىڭ شەكارادان كىرۋ جونىندەگى بەلگىلەمەسىنە نازار اۋدارۋى، ماڭىزدى كۋالىكتەرىن الىپ ءجۇرۋى كەرەك. اۆتوموبيلمەن الىس ساپارعا شىققاندا، ءسوزسىز، قاتىناس حاۋىپسىزدىگىنە كوڭىل ءبولىپ، قاتىناس ەرەجەسىنە بويسۇنۋى كەرەك.

كەلۋ قاينارى: حالىق تورابى