- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
«تۇلپار مەكەنىندەگى» دۋلى ءدۇبىر
2016.06.30 15:01 كەلۋ قاينارى : شينجياڭ گازەتى
مۇرات ىبىراي ۇلى موڭعۇلكۇرەدەن حابارلايدى. ءۇيسىن تاۋ مەن ءتاڭىر تاۋدىڭ اراسى شەكسىز جاتقان ۇلى اڭعار − ايگىلى ورتەكەس ساحاراسىنىڭ جاسىل ماناتقا ورانىپ تىنىپ تۇرعان ءبىر شاعى ەكەن بۇل. وسى مانات دالا، جاننات دالا جەل قانات تۇلپارلار دۇبىرىمەن دۇبىرلەپ، ۇلان - اسىر ءبىر تويدىڭ قىزىعىنا كۋا بولدى. بۇل − 2016 - جىلعى مەملەكەتتىك الامان بايگەنىڭ موڭعۇلكۇرەدەگى جالعاسى ەدى.
ەلىمىز ات ونەرى سپورتىنىڭ اۋىس - كۇيىسىن ىلگەرىلەتۋ، جىلقى شارۋاشىلىعىنىڭ دامۋىن جەبەۋ، ىلە جىلقىسىن ءوسىرۋ بازاسى موڭعۇلكۇرەنى ءتورت توڭىرەككە تانىستىرۋ ماقساتىمەن ۇيىمداستىرىلعان 2016 - جىلعى مەملەكەتتىك الامان بايگەنىڭ موڭعۇلكۇرە ايالداماسى جارىسى 25 -، 26 - ماۋسىم كۇندەرى موڭعۇلكۇرە اۋدانىنىڭ قاراعانتى ساحاراسىنداعى «باتىس ءوڭىر مادەنيەت، ساياحات باقشاسىندا» ءوتتى. بايگەنى جۇڭگو ات ونەرى قوعامى مەن اۆتونوميالى رايوندىق دەنە تاربيە مەكەمەسى ۇيىمداستىردى، اۆتونوميالى رايوندىق دەنە تاربيە مەكەمەسىنىڭ 2 - ۇلكەن جاتتىقتىرۋ اترەتى، موڭعۇلكۇرە اۋداندىق حالىق ۇكىمەتى جاۋاپتى بولىپ وتكىزدى. بەيجيڭ، چيڭداۋ، شاندۇڭ، ىشكى موڭعۇل اۆتونوميالى رايونى سياقتى تۋىسقان ولكە، قالالارداعى، رايونىمىزدىڭ جەر - جەرىندەگى ات ونەرى كلۋبتارى مەن جىلقى شارۋاشىلىق الاڭدارى، سونداي - اق جەكە ادامدار بولات تۇياق تۇلپارلارىن بايگەگە اكەلىپ قوستى.
بايگەنىڭ اشىلۋ سالتى موڭعۇلكۇرە اۋدانىنداعى حالىق ونەرپازدارى مەن مەكتەپ وقۋشىلارى دايىنداعان كولەمدى ادەبيەت - كوركەمونەر ويىندارىمەن باستالدى. ونەرپازدار «تۇلپار مەكەنى» ءانىن شىرقاپ، ايجارىق، ۇسۇل، ساۋىردۇن، بەل بارابان بيىنە باستى. ىلە - شالا موڭعۇلكۇرە ات ونەر كلۋبىنان، جىلقى شارۋاشىلىعى الاڭىنان كەلگەن شاباندوزدار تۇركىمەنستاننىڭ اقالتەكە جىلقىسىن، قازاقستاننىڭ قوستاناي جىلقىسىن، ەلىمىزدىڭ يۇننان تاپال جىلقىسىن، رەسەيدىڭ ارلوۆ جىلقىسىن، اراب جىلقىسىن... ءمىنىپ، كوز تويماس ات ونەرى ويىندارىن كورسەتتى. ونان ارى موڭعۇلكۇرە ازاماتتارى كوكپار تارتىپ، اۋدارىسپاق ويناپ، قىز قۋار سالىپ، ات ءۇستى سەرىك ويىندارىن ويناپ، اشىلۋ سالتىنىڭ سالتاناتىن اسىردى.
اشىلۋ سالتىندا قارسى الۋ ءسوزىن سويلەگەن اۋداندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى جولدىباي جىرعالباي ۇلى: «تۇلپار مەكەنى» موڭعۇلكۇرەدە 100 مىڭنان استام جىلقى بار، اتى زاتىنا ساي ەلىمىزدەگى جىلقىلى اۋدان ءارى ىلە جىلقىسىن جەتىلدىرۋ بازاسى. ءبىز وسى رەتكى بايگەنى وتكىزۋگە جاۋاپتى بولۋ ارقىلى اۋدانىمىزدىڭ تىرەكتى كاسىپتەرىنىڭ ءبىرى، جىلقى شارۋاشىلىعىن دامىتۋعا مۇمكىندىك الامىز ءارى موڭعۇلكۇرەنىڭ تانىمالدىلىعىن ارتتىرىپ، ەل ءىشى - سىرتى ساياحاتشىلارىن باۋرايمىز، - دەدى.
اتالعان بايگە اسىل تۇقىمدى جىلقى گرۋپپاسى جانە ىلە جىلقىسى گرۋپپاسى بولىپ، جەكە - جەكە 11 ءتۇر بويىنشا ۇيىمداستىرىلدى. انىعىراق ايتقاندا، اسىل تۇقىمدى جىلقى گرۋپپاسى مەن ىلە جىلقىسى گرۋپپاسىنىڭ 1، 5.1، 3 كيلومەترلىك تاي جارىسى، 1، 2، 3 كيلومەترلىك قۇنان بايگە، 2، 3، 5 كيلومەترلىك دونەن بايگە، ءناسىلدى جىلقى گرۋپپاسىنىڭ 5 كيلومەترلىك جورعا جارىسى، ىلە جىلقىسىنىڭ 5 - 10 كيلومەترلىك الامان بايگەسى بويىنشا وزدىرىلدى. ءارقايسى ءتۇردىڭ 1 - اتىنىڭ جۇلدەسى 60 مىڭ يۋان، 2 - اتىنىڭ جۇلدەسى 20 مىڭ يۋان، 3 - اتىنىڭ جۇلدەسى 10 مىڭ يۋان بولدى.
رايونىمىزدىڭ ءىشى - سىرتىنان بايگەگە ات قوسۋعا، بايگە تاماشالاۋعا، ساياحاتتاۋعا كەلگەن موڭعۇلكۇرە ساحاراسىنىڭ قوناقتارى مەن جەرگىلىكتى ەل تۇپ - تۋرا 2 كۇن بويى تۇلپارلار دۇبىرىنە ەلىتتى، وزا شاپقان، قىزا شاپقان اتتاردىڭ جۇگىرىسىنە ءسۇيىندى. بايگە ايتسا - ايتقانداي، ەلىمىزدىڭ جەر - جەرىنەن كەلگەن ات اۋەسكەرلەرىنىڭ، ساياحاتشىلاردىڭ، فوتو اۋەسكەرلەرىنىڭ، سونداي - اق موڭعۇلكۇرەدەگى ءار ۇلت حالقىنىڭ ءبىر اراعا باس قوسقان سالتاناتتى مەرەكەسى بولدى.
ايتا كەتەيىك، مەملەكەتتىك ات ونەرى قوعامى مەن اۆتونوميالى رايوندىق دەنە تاربيە مەكەمەسى سياقتى ورىندار 2016 - جىلعى مەملەكەتتىك قىسقا ارالىقتى ات بايگەسىن كورلا، كۇنەس، موڭعۇلكۇرە سياقتى 3 جارىس ايالداماسىندا وتكىزۋدى ۇيعارعان. 1 - جارىس كورلا قالاسىندا مامىر ايىنىڭ باسىندا، 2 - جارىس 11 -، 12 - ماۋسىم كۇندەرى كۇنەستىڭ نارات ساحاراسىندا وتكەن بولاتىن. جارىستىڭ 3 - ايالداماسى بولعان موڭعۇلكۇرەدەگى بايگە 26 - ماۋسىىم كۇنى تولىق مارەسىنە جەتىپ، وسى جىلعى مەملەكەتتىك قىسقا ارالىقتى ات بايگەسىن تۇيىندەدى.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
