مەملەكەتتىك كەڭەستىڭ بىرلەسكەن ساقتانۋ – تىزگىندەۋ مەحانيزمىنىڭ ىندەتتەن ساقتانۋ – تىزگىندەۋ گرۋپپاسى: مىناداي جاعدايلاردا ماسكى تاقپاۋعا بولادى
2023.04.13 12:56 كەلۋ قاينارى : حالىق تورابى
جۇڭگو اقپارات تورابىنىڭ 4 – ايدىڭ 12 – كۇنى بەرگەن حابارى. مەملەكەتتىك اۋرۋدان ساقتانۋ – تىزگىندەۋ مەكەمەسىنىڭ ۋيچات تەكشەسىنىڭ 4 – ايدىڭ 12 – كۇنى حابارلاۋىنشا، مەملەكەتتىك كەڭەستىڭ بىرلەسكەن ساقتانۋ – تىزگىندەۋ مەحانيزمىنىڭ ىندەتتەن ساقتانۋ – تىزگىندەۋ گرۋپپاسى 4 – ايدىڭ 12 – كۇنى «جاڭا تيپتى ايدارشا ۆيرۋسپەن جۇعىمدالۋدان ساقتانۋعا بايلانىستى جۇرتتىڭ ماسكى تاعۋىنا ارنالعان باعدارنامانى (2023 – جىلى 4 – ايداعى نۇسقا)» باسىپ تاراتقان.
باعدارنامادا مىنالار ورتاعا قويىلعان: ماسكىنى عىلىمي تاعۋ — جاڭا تيپتى ايدارشا ۆيرۋسپەن جۇعىمدالۋدان ساقتانۋداعى ماڭىزدى شارا. «جاڭا تيپتى ايدارشا ۆيرۋسپەن جۇعىمدالۋدان ساقتانۋدا ”B تۇردەگى اۋرۋلارعا B دارەجەدەگى باسقارۋ شارالارىن قولدانۋ“ جالپى تۇلعالىق جوباسىنداعى»، «جاڭا تيپتى ايدارشا ۆيرۋسپەن جۇعىمدالۋدان ساقتانۋ – تىزگىندەۋ جوباسىنداعى (ونىنىشى نۇسقا)» تالاپتارعا ساي، بۇقارانىڭ ماسكىنى عىلىمي تاعۋىنا جەتەكشىلىك ەتۋ، جۇرتشىلىقتىڭ دەنساۋلىعىن ءونىمدى قورعاۋ ءۇشىن، مىناداي باعدارناما شىعارىلدى:
ءبىرىنشى، ماسكى تاعۋ قاجەت جاعدايلار مەن ورىندار
1. جاڭا تيپتى ايدارشا ۆيرۋس انتيدەنەسىن تەكسەرۋ نەمەسە حىسۋان تەكسەرۋ ناتيجەسى بولىمدى بولعان كەزدە.
2. قىزۋى ورلەۋ، تاماعى اۋرۋ، جوتەلۋ، ماڭقا اعۋ، بۇلشىق ەتى سىزداپ اۋرۋ، دارمەنسىزدەنۋ قاتارلى جاڭا تيپتى ايدارشا ۆيرۋسپەن جۇعىمدالۋدان تۋىندايتىن اۋرۋ بەلگىلەرى بايقالعان كەزدە.
3. تۇرمىستا، قىزمەتتە جانە ۇيرەنۋ بارىسىندا الەۋمەتتىك اۋماقتا، مەكتەپتە شوعىرلى سيپاتتى ىندەت تۋىلعان كەزدە.
4. ەمدەۋ قۇرىلىمدارىنا بارىپ ەمدەلگەن، دەنساۋلىعىن تەكسەرتۋشىگە سەرىك بولعان، ناۋقاستى كۇتىمدەگەن، ناۋقاسقا امانداسا بارعان كەزدە.
5. سىرت جەردەن كەلگەندەر قارتتاردى كۇتىمدەۋ قۇرىلىمى، الەۋمەتتىك قامقورلىق قۇرىلىمى قاتارلى ءالسىز ادامدار شوعىرلانعان ورىندارعا بارعان كەزدە.
6. قارتتاردى كۇتىمدەۋ قۇرىلىمدارى، الەۋمەتتىك قامقورلىق قۇرىلىمدارى، سونداي – اق، نارەستەلەردى قاراپ بەرەتىن قۇرىلىمدار، مەكتەپتەر، مەكتەپ سىرتىنداعى كۋرس قۇرىلىمدارى قاتارلى ءتۇيىندى قۇرىلىمداردىڭ ەمدەۋ – كۇتىمدەۋ، اس – سۋ، تازالىق، اماندىق قاتارلى الەۋمەتتىك قىزمەت وتەۋمەن شۇعىلداناتىن قىزمەتكەرلەرى قىزمەت ىستەگەن كەزدە.
ەكىنشى، مىناداي جاعدايلاردا جانە ورىنداردا ماسكى تاققان ءجون دەگەن ۇسىنىس بەرىلدى
1. ۇشاق، پويەز، ۇزاق جولدى اۆتوبۋز، كەمە، مەترو، الەۋمەتتىك اۆتوبۋس قاتارلى الەۋمەتتىك قاتىناس قۇرالدارىنا وتىرعان كەزدە.
2. ەرەنبازار، كينوحانا، جولاۋشى تاسىمالى بەكەتى قاتارلى ورتاسى تۇيىق، ادامدار شوعىرلانعان ورىندارعا كىرگەن كەزدە.
3. قارتتار، سوزىلمالى نەگىزدىك اۋرۋى بار ناۋقاستار، جۇكتى ايەلدەر قاتارلىلار بولمە ىشىندەگى الەۋمەتتىك ورىندارعا بارعان كەزدە.
4. قاتىناسقان ادامداردىڭ كەلۋ قاينارى كەڭ، جىلجىمالىلىق سيپاتى ءبىرشاما كۇشتى ءارى حىسۋان نەمەسە انتيدەنە تەكسەرۋ، دەنساۋلىق تەكسەرۋ قاتارلى ىندەتتەن ساقتانۋ – تىزگىندەۋ تالاپتارى قويىلماعان ۇلكەن ماجىلىستەر مەن قيمىلداردى وتكىزگەن كەزدە.
ءۇشىنشى، ماسكى تاقپاسا دا بولاتىن ۇنەمىلىك جاعدايلار مەن ورىندار
1. اشىق الاڭ، باقشا قاتارلى بولمە سىرتىنداعى ورىندار.
2. ادامدار ءبىرشاما تۇراقتى بولمە ىشىندەگى قىزمەت ورنى نەمەسە ءماجىلىس زالى قاتارلىلار.
3. قاتىناسۋشىلاردىڭ كەلۋ قاينارى كەڭ، جىلجىمالىلىق سيپاتى ءبىرشاما كۇشتى بولعانىمەن، حىسۋان نەمەسە انتيدەنە تەكسەرۋ، دەنساۋلىق تەكسەرۋ قاتارلى ىندەتتەن ساقتانۋ – تىزگىندەۋ تالاپتارىن ايقىن بەلگىلەگەن ءىرى ماجىلىستەردى نەمەسە قيمىلداردى وتكىزگەن كەزدە.
4. بەلگىلەنگەن مەرزىمدە حىسۋان تەكسەرتەتىن نەمەسە انتيدەنە تەكسەرتەتىن، دەنساۋلىعىن تەكسەرتەتىن ايرىقشا بەلگىلەنگەن ادامدار، مىسالى، قۇتتىقتاۋ قيمىلىندا ويىن قوياتىن قىزمەتكەرلەر، قۇرمەت قاراۋىلى قوسىنىنىڭ مۇشەلەرى قاتارلىلار ءىرى قيمىلدارعا قاتىناسقان كەزدە.
5. سپورتپەن شۇعىلدانعان كەزدە ماسكى تاعۋ تىنىس الۋعا قيىندىق تۋدىرعان كەزدە.
6. 3 جاستاعى جانە ودان تومەنگى سابيلەر مەن نارەستەلەر.
7. مەكتەپتەگى وقىتۋشى، وقۋشىلاردىڭ مەكتەپتەگى مەزگىلدە ماسكى تاقپاۋىنا بولادى.
ءتورتىنشى، ماسكىنى تاڭداۋ تۋرالى
جاڭا تيپتى ايدارشا ۆيرۋسپەن جۇعىمدالۋشىلاردىڭ نەمەسە كۇماندى ناۋقاستاردىڭ N95 نەمەسە KN95 ءتۇيىر زاتتاردان ساقتانۋ ماسكىسىن نەمەسە ودان جوعارى دارەجەدەگى ماسكىلەردى (تىنىس الۋ قاقپاقشاسى جوق) تاققانى ءجون، باسقا ادامداردىڭ مەديتسينادا پايدالاناتىن ءبىر رەتتىك ماسكىنى نەمەسە سىرتقى اۋرۋلار ماسكىسىن تاققانى ءجون.
بەسىنشى، باسقا كوڭىل بولۋگە ءتيىستى ىستەر
1. جوعارىداعى جاعدايلار مەن ورىنداردان سىرت، جەكەلەر ءوزىنىڭ دەنساۋلىق جاعدايى مەن قاجەتىنە قاراي ماسكى تاعۋ – تاقپاۋدى ءوزى ءبىلىپ تاڭداسا بولادى.
2. جۇرەك – وكپە فۋنكتسياسى كەدەرگىگە ۇشىراعان ادامدار شيپاگەردىڭ جەتەكشىلىگىندە ماسكى تاعۋى كەرەك.
3. قاتىستى الەۋمەتتىك قىزمەت وتەۋمەن شۇعىلداناتىن قىزمەتكەرلەر بار قۇرىلىمدار ولارعا قاتىستى تالاپتارعا ساي كەلەتىن ماسكىلەردى تاراتۋى ءارى ماسكىنى ايىرىم تاستايتىن جيناپ الۋ قۇرىلعىسىن ورناتۋى كەرەك.
ماسكىگە قاتىستى بۇل باعدارناما ىندەتتەن ساقتانۋ – تىزگىندەۋ قاجەتىندەگى وزگەرىستەرگە ساي جاقسارتىلادى، رەتتەلەدى. جەر – جەردەگى قاتىستى تاراۋلار سول جەردىڭ جانە كاسىپ سالاسىنىڭ ءىس جۇزىندىك جاعدايىنا ساي، ماسكىكە قاتىستى وسى باعدارنامانى نەگىزگە الا وتىرىپ، جەرگىلىكتى ورىنداعى نەمەسە كاسىپ سالاسىنداعى ماسكىگە قاتىستى باعدارنامانى بەلگىلەپ شىقسا بولادى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
