شي جينپيڭ گابوننىڭ زۇڭتۇڭى بونگومەن كەڭەس وتكىزدى
2023.04.20 16:41 كەلۋ قاينارى : حالىق تورابى
 |
4 - ايدىڭ 19 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن گابوننىڭ زۇڭتۇڭى بونگومەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان بونگو جانە ونىڭ حانىمى سيلۆيامەن بىرگە سۋرەتكە تۇسۋدە. سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن
|
شينحۋا اگەنتتىگى، 4 - ايدىڭ 19 - كۇنى بەيجيڭ. (ءتىلشى جىڭ ميڭدا). 4 - ايدىڭ 19 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن گابوننىڭ زۇڭتۇڭى بونگومەن كەڭەس وتكىزدى. ەكى ەلدىڭ مەملەكەت باسشىلارى جۇڭگو مەن گابوننىڭ جالپى بەتتىك سەلبەستىك سەرىكتەستىك قاتىناسىن جالپى بەتتىك ستراتەگيالىق سەلبەستىك سەرىكتەستىك قاتىناسىنا كوتەرۋدى ۇيعاردى.
شي جينپيڭ بونگونىڭ جۇڭگوعا ساپارلاي كەلگەنىن قارسى الاتىنىن ءبىلدىردى. شي جينپيڭ بىلاي دەپ اتاپ كورسەتتى: كەلەر جىلى ءبىز جۇڭگو مەن گابوننىڭ ديپلوماتيالىق قارىم - قاتىناس ورناتقانىنىڭ 50 جىلدىعىن قارسى الامىز. جارىم عاسىردان بەرى ەكى ەلدىڭ نەشە ۇرپاق باسشىلارىنىڭ كوڭىل ءبولۋى مەن جەتەكشىلىك ەتۋىندە، جۇڭگو مەن گابوننىڭ دوستىعى باستان - اياق مىزعىمادى. ەكى جاق ءبىرىن - ءبىرى تاباندىلىقپەن قولداپ، ەكى ەلدىڭ ورتاق مۇددەسىن جانە حالىقارالىق ادىلدىكتى، تۋراشىلدىقتى قورعادى. جۇڭگو − گابوننىڭ شىنايى دوسى. ءسىزدىڭ وسى رەت جۇڭگوعا ساپارلاي كەلۋىڭىز جۇڭگو - گابون قارىم - قاتىناسىنىڭ ماڭىزدىلىعىن جانە جوعارى ورەسىن تاعى ءبىر رەت تولىق ايگىلەدى. جۇڭگو مەن گابوننىڭ قارىم - قاتىناسىن ىشكەرىلەي، ۇزدىكسىز ىلگەرىلەتۋ ەكى ەلدىڭ ورتاق جانە ۇزاق بولاشاقتىق مۇددەسىنە ۇيلەسەدى، سونداي - اق ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدە ماڭىزدى ۇلگىلىك رول اتقارادى. جۇڭگو گابونمەن بىرگە جۇڭگو مەن گابوننىڭ جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ ورنىقتى، باياندى دامۋىن ىلگەرىلەتۋگە پەيىل.
شي جينپيڭ بىلاي دەپ دارىپتەدى: جۇڭگو ساپالى دامۋدى جانە جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋدە، گابون دا ”جاڭادان گۇلدەنگەن گابون“ ستراتەگيالىق نىساناسىن ەرتەرەك جۇزەگە اسىرۋعا بەلسەنە كۇش سالۋدا. جۇڭگو جاق گابون جاقپەن ەل باسقارۋ تاجىريبەلەرىن اۋىستىرۋدى كۇشەيتىپ، ستراتەگيالىق ءوزارا سەنىمدىلىكتى تەرەڭدەتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى تاباندىلىقپەن قولداۋعا پەيىل. جۇڭگو جاق گابون جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، گابون جاقپەن ستراتەگيالىق ۇشتاسۋدى كۇشەيتىپ، نەگىزدىك قۇرىلعى قۇرىلىسى، ورمان شارۋاشىلىعى، بالىق شارۋاشىلىعى، سيفرلى ەكونوميكا جانە كاسىپ باقشاسى قۇرىلىسى سياقتى سالالارداعى سەلبەستىكتى ىلگەرىلەتىپ، گابوننىڭ ەكونوميكانىڭ كوپ نەگىزدى دامۋىن جانە كاسىپ سالاسىنىڭ دارەجەسىن جوعارىلاتۋىن جۇزەگە اسىرۋىن قولداپ، جاسىل ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتىپ، كليمات وزگەرىسىنە توتەپ بەرۋدىڭ وڭتۇستىك - وڭتۇستىك سەلبەستىگىنىڭ ۇلگىسىن قالىپتاستىرۋعا پەيىل. ەكى جاق گۋمانيتارلىق اۋىس - كۇيىستى تەرەڭدەتىپ، ساياحات، اۋىل - قىستاقتى گۇلدەندىرۋ، كەدەيلىكتى ازايتىپ، شارۋالارعا تيىمدىلىك جاساۋ سياقتى جاقتارداعى سەلبەستىكتى كۇشەيتۋى كەرەك. ەكى جاق تاعى بىرلەسكەن مەملەكەتتەر ۇيىمى سياقتى كوپ جاقتى تۇعىرلاردا ستراتەگيالىق سەلبەستىكتى كۇشەيتىپ، دۇنيە ءجۇزىنىڭ بەيبىتشىلىگى مەن دامۋىن جانە حالىقارالىق ادىلدىكتى، تۋراشىلدىقتى قورعاپ، وركەندەپ كەلە جاتقان ەلدەردىڭ ورتاق مۇددەسىن قورعاۋى كەرەك. جۇڭگو جاق گابون جاقپەن بىرگە قۇلشىنىپ، ەكى ەلدىڭ ديپلوماتيالىق قاتىناس ورناتقانىنىڭ 50 جىلدىعى قارساڭىندا ەكى جاقتىڭ دوستق سەلبەستىگىن ءتىپتى دە ىلگەرىلەتۋگە پەيىل.
شي جينپيڭ بىلاي دەپ اتاپ كورسەتتى: قازىرگى دۇنيە جۇزىندە كوپتەگەن سىن - سايىس پەن ءتۇرلى داعدارىس شىرما - شاتۋ قاباتتاسقان. جۇڭگو مەن افريكا ەلدەرى ىنتىماقتى، سەلبەستىكتى كۇشەيتۋگە بۇرىنعى ءارقانداي كەزدەگىدەن دە مۇقتاج. ەكى جاق ”جۇڭگو - افريكا دوستىق سەلبەستىك رۋحىنا“ مۇراگەرلىك ەتىپ جانە ونى ساۋلەلەندىرىپ، بەيبىت قاتار تۇرۋدىڭ بەس پرينسيبى سياقتى حالىقارالىق قارىم - قاتىناستىڭ نەگىزگى ولشەمىندە تاباندى بولىپ، ءارقانداي فورماداعى زورەكەرلىك پەن وكتەمدىك ساياسيعا، باسقا ەلدىڭ ىشكى ىسىنە كيلىگۋگە قارسى تۇرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋى كەرەك. جۇڭگو جاق افريكانىڭ وزگەشە ەرەكشەلىككە يە، دەربەس ءوز - وزىنە قوجايىن بولعان دامۋ جولىمەن ءجۇرۋىن باتىل قولدايدى، افريكانىڭ استىق حاۋىپسىزدىگىن، ونەركاسىپتەنۋ اياق الىسىن، جاسىل دامۋدى ىلگەرىلەتۋىن باتىل قولدايدى، افريكانىڭ دۇنيە ءجۇزىنىڭ ساياسي، ەكونوميكا، وركەنيەت دامۋىنداعى ماڭىزدى ۇيەگىنە اينالۋىن باتىل قولدايدى، ءوزىنىڭ جاڭا دامۋى ارقىلى افريكا جاققا جاڭا وراي ازىرلەپ، جۇڭگو مەن افريكانىڭ ناقتى سەلبەستىگىن وڭتۇستىك - وڭتۇستىك سەلبەستىگىنىڭ جانە افريكامەن سەلبەستىكتىڭ حالىقارالىق ۇلگىسى ەتىپ سومداۋعا پەيىل.
بونگو مىنالاردى ءبىلدىردى: ءتوراعا شي جينپيڭ تاعى دا سايلانىپ مىندەتكە وتىرىپ كوپ وتپەي ۇسىنىس بويىنشا جۇڭگوعا ساپارلاي كەلگەنىمدى ماقتانىش سەزىنەمىن، مەن ج ك پ 20 - قۇرىلتايىنىڭ جانە جۇڭگو مەملەكەتتىك ەكى ءماجىلىسىنىڭ ءساتتى اشىلعانىن تاعى دا قۇتتىقتايمىن، وسى 2 رەتكى سالتاناتتى ءماجىلىس جۇڭگو حالقىنىڭ ءتوراعا شي جينپيڭگە دەگەن وسكەلەڭ سەنىمىن تولىق ايگىلەۋمەن بىرگە، ءبىزدىڭ جۇڭگونىڭ ۇزدىكسىز گۇلدەنۋ، دامۋ جولىندا اناعۇرلىم كوپ تابىستارعا قول جەتكىزۋىنە دەگەن سەنىمىمىزدى اناعۇرلىم نىعايتتى. گابون جاق ءبىر جۇڭگو ساياساتىن باتىل اتقارادى، ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ، دۇنيە جۇزىلىك دامۋ باستاماسى، دۇنيە جۇزىلىك حاۋىپسىزدىك باستاماسى، سونداي - اق ادامزاتتىڭ تاعدىرلاس ورتاق تۇلعاسىن قۇرۋ سياقتى ماڭىزدى ۇستانىمداردى قولدايدى. گابون مەن جۇڭگو ەكى جاق وسكەلەڭ ساياسي سەنىمدىلىككە يە، باستان - اياق ءبىرىن - ءبىرى قۇرمەتتەپ، ءبىرىن - ءبىرى قولداپ كەلەدى. جۇڭگو جاقتىڭ ۇزاق ۋاقىتتان بەرى گابونعا قۇندى كومەك كورسەتىپ، گابون ەكونوميكاسىنىڭ كوپ نەگىزدى دامۋىن جانە ونەركاسىپتەنۋ اياق الىسىن جەبەۋدە ماڭىزدى رول اتقارعانىنا العىس ايتامىن، ەكى جاقتىڭ نەگىزدىك قۇرىلعى، اۋىل شارۋاشىلىعى جانە ساياحات سياقتى سالالارداعى سەلبەستىكتى اناعۇرلىم كۇشەيتۋىن ءۇمىت ەتەمىن، جۇڭگو كاسىپورىندارىنىڭ گابونعا بارىپ ونەركاسىپ باقشاسى قۇرىلىسىنا قاتىناسۋىن قارسى الامىز، جۇڭگو كاسىپورىندارىنا تاماشا ورتا ازىرلەۋگە پەيىلمىز. گابون جاق جۇڭگو جاقپەن كەلەر جىلى ديپلوماتيالىق قارىم - قاتىناس ورناتۋدىڭ 50 جىلدىعىن بىرگە سالتاناتپەن قۇتتىقتاپ، دوستىق سەلبەستىكتى بەكەمدەپ، تەرەڭدەتىپ، ەكى ەلدىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىن ىلگەرىلەتۋدى كۇتەدى. گابون مەن جۇڭگونىڭ كوپتەگەن حالىقارالىق ىستەگى تۇرعىسى ۇقساس نەمەسە قارايلاس، ەكەۋى دە ءار ەلدىڭ يەلىك ۇقىعىنا قۇرمەت ەتۋدى دارىپتەيدى، باسقا ەلدىڭ ىشكى ىسىنە كيلىگۋگە قارسى تۇرادى، ادامدىق ۇقىق ماسەلەسىن ساياسيلاندىرۋعا جانە قوس ولشەم ۇستانۋعا قارسى تۇرادى. گابون جاق جۇڭگو جاقپەن كوپ جاقتى ستراتەگيالىق ىستەستىكتى ۇزدىكسىز جيىلەتىپ، جۇڭگو - افريكا سەلبەستىك تالقى مىنبەرىن ىلگەرىلەتۋ مەن افريكا - جۇڭگو قارىم - قاتىناسىنىڭ اناعۇرلىم جاقسى دامۋدى جۇزەگە اسىرۋىن، اناعۇرلىم كوپ ناتيجەگە قول جەتكىزۋىن ىلگەرىلەتۋگە پەيىل.
كەڭەستەن كەيىن ەكى ەلدىڭ مەملەكەت باسشىلارى قارجى قوسۋ، اۋىل شارۋاشىلىعى، تۇرعىن ءۇي جانە قالا قۇرىلىسى، كليمات وزگەرىسى سياقتى سالالارداعى كوپتەگەن ەكى جاقتى سەلبەستىك قۇجاتىنا قول قويۋعا كۋا بولدى.
ەكى جاق «جۇڭحۋا حالىق رەسپۋبليكاسى مەن گابون رەسپۋبليكاسىنىڭ جالپى بەتتىك ستراتەگيالىق سەلبەستىك سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
كەڭەستىڭ الدىندا شي جينپيڭ حالىق سارايىنىڭ سولتۇستىك زالىندا بونگونى قارسى الۋ سالتىن وتكىزدى.
بونگو كەلگەندە تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن گابوننىڭ مەملەكەت گيمندەرىن ورىندادى. بونگو شي جينپيڭنىڭ سەرىك بولۋىندا جۇڭگو حالىق ازاتتىق ارمياسى قۇرمەت قاراۋىلىنىڭ سالتانات قاتارىن كوردى.
شي جينپيڭنىڭ حانىمى پىڭ لييۋان مەن بونگونىڭ حانىمى سيلۆيا قارسى الۋ سالتىنا سەرىك بولىپ قاتىناستى.
سول كۇنى كەشتە شي جينپيڭ مەن حانىمى پىڭ لييۋان حالىق سارايىنىڭ التىن ءتۇستى زالىندا بونگو مەن حانىمى سيلۆياعا ارناپ قارسى الۋ قوناعاسىن بەردى.
ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
كەلۋ قاينارى: حالىق تورابى
 |
4 - ايدىڭ 19 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن گابوننىڭ زۇڭتۇڭى بونگومەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا بونگونى قارسى الۋ سالتىن وتكىزۋدە. سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن
|
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
