شي جينپيڭ امەريكانىڭ بۇرىنعى مەملەكەت ىستەر حاتشىسى كەسەنگرمەن كەزدەستى
2023.07.21 16:21 كەلۋ قاينارى : حالىق تورابى
7 - ايدىڭ 20 - كۇنى مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە امەريكانىڭ بۇرىنعى مەملەكەت ىستەر حاتشىسى كەسەنگرمەن كەزدەستى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگى، 7 - ايدىڭ 20 – كۇنى، بەيجيڭ. 7 - ايدىڭ 20 - كۇنى مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە امەريكانىڭ بۇرىنعى مەملەكەت ىستەر حاتشىسى كەسەنگرمەن كەزدەستى.
شي جينپيڭ بىلاي دەپ اتاپ كورسەتتى: كەسەنگر دوكتور 100 جاسقا تولعان تۋعان كۇنىن ەندى عانا وتكىزدى، ءسىز جۇڭگوعا 100 رەتتەن استام ساپارلاي كەلدىڭىز. وسى ەكى ”ءجۇزدى“ قوسساق، بۇل جولعى جۇڭگوعا ساپارىڭىز ەرەكشە مانگە يە بولادى. 52 جىلدىڭ الدىندا جۇڭگو مەن امەريكا شەشۋشى بۇرىلىس كەزەڭىندە تۇردى، ءتوراعا ماۋ زىدۇڭ، جوۋ ىنلاي زۇڭلي نەكسون زۇڭتۇڭمەن جانە وزىڭىزبەن بىرگە كورنەكتى ستراتەگيالىق كورەگەندىكپەن جۇڭگو - امەريكا سەلبەستىگىنىڭ دۇرىس تالعامىن جاساپ، جۇڭگو - امەريكا قارىم - قاتىناسىن قالىپقا ءتۇسىرۋ اياق الىسىن باستاپ، ەكى ەلگە باقىت جاراتتى، دۇنيە ءجۇزىن دە وزگەرتتى. جۇڭگولىقتار ادامگەرشىلىككە ءمان بەرەدى، ءبىز كونە دوسىمىزدى ۇمىتپايمىز، جۇڭگو - امەريكا قارىم - قاتىناسىنىڭ دامۋىن ىلگەرىلەتۋگە، جۇڭگو - امەريكا ەكى ەل حالىقتارىنىڭ دوستىعىن نىعايتۋعا قوسقان تاريحي ۇلەسىڭىزدى ۇمىتپايمىز.
شي جينپيڭ بىلاي دەپ دارىپتەدى: قازىر دۇنيە ءجۇزى 100 جىلدا بولماعان زور وزگەرىستى باستان كەشىرۋدە، حالىقارالىق جاعدايدا كەلەلى وزگەرىس تۋىلۋدا. جۇڭگو مەن امەريكانىڭ تاعى دا قالاي ءجۇرۋ كەرەك دەيتىن جول ايرىعىندا تۇرۋى ەكى جاقتىڭ تاعى ءبىر رەت تالعام جاساۋىن قاجەت ەتەدى. بولاشاققا كوز جىبەرسەك، جۇڭگو مەن امەريكانىڭ ءوزارا تابىسقا جەتىپ، بىرگە گۇلدەنىپ - كوركەيۋىنىڭ تەتىگى ءوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىككە كەنەلۋ سىندى ءۇش پرينسيپكە بويسۇنۋدا. وسى نەگىزدە جۇڭگو جاق امەريكا جاقپەن ەكى ەلدىڭ دۇرىس قارىم - قاتىناس جولىن قاراستىرىپ، جۇڭگو - امەريكا قارىم - قاتىناسىنىڭ ورنىقتى العا باسۋىن ىلگەرىلەتۋدى قالايدى، بۇل ەكى جاققا دا پايدالى، دۇنيە جۇزىنە دە باقىت جاراتادى. ءسىزدىڭ جانە امەريكاداعى كورەگەن قايراتكەرلەردىڭ جۇڭگو - امەريكا قارىم - قاتىناسىنىڭ دۇرىس ارناعا ءتۇسۋىن ىلگەرىلەتۋدە ۇزدىكسىز سىندارلى رول اتقارۋىن ءۇمىت ەتەمىن.
كەسەنگر مىنانى ءبىلدىردى: ءتوراعا شي جينپيڭنىڭ مەن تۇڭعىش رەت جۇڭگوعا ساپارلاي كەلگەندە ءتۇسىپ، جۇڭگو باسشىلارىمەن كەزدەسكەن دياۋيۇيتاي مەملەكەتتىك قوناق ءۇيىنىڭ 5 – عيماراتىن تاڭداپ مەنىمەن كەزدەسكەنىنە العىس ايتامىن. امەريكا - جۇڭگو قارىم - قاتىناسى امەريكا مەن جۇڭگونىڭ جانە دۇنيە ءجۇزىنىڭ بەيبىتشىلىگى مەن گۇلدەنۋى جونىنەن توتەنشە ماڭىزدى. قازىرگى جاعدايدا ”شاڭحاي مالىمدەمەسىندە“ بەلگىلەنگەن پرينسيپكە بويسۇنىپ، ءبىر جۇڭگو پرينسيبىنىڭ جۇڭگو جونىنەن توتەنشە ماڭىزدىلىعىن ءتۇسىنىپ، امەريكا - جۇڭگو قارىم - قاتىناسىنىڭ بەلسەندى باعىتقا قاراي دامۋىن ىلگەرىلەتۋ كەرەك. مەن امەريكا، جۇڭگو حالىقتارىنىڭ ءوزارا ءتۇسىنىسۋىن كۇشەيتۋ جولىندا ۇزدىكسىز قۇلشىنىس جاساۋعا پەيىلمىن.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
