شي جينپيڭ اۆستراليانىڭ زۇڭليى البانيسپەن كەزدەستى
2023.11.07 16:47 كەلۋ قاينارى : حالىق تورابى
 |
11 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن اۆستراليانىڭ زۇڭليى البانيسپەن كەزدەستى.
سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن
|
شينحۋا اگەنتتىگى، 11 - ايدىڭ 6 - كۇنى، بەيجيڭ (ءتىلشى جىڭ ميڭدا). 11 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارمەن كەلگەن اۆستراليانىڭ زۇڭليى البانيسپەن كەزدەستى.
شي جينپيڭ بىلاي دەپ اتاپ كورسەتتى: بيىل − ۋيترام زۇڭلي جۇڭگوعا ساپارلاي كەلگەنىنىڭ 50 جىلدىعى، ءسىزدىڭ بۇل رەتكى ساپارىڭىزدى بۇرىنعىعا مۇراگەرلىك ەتىپ، كەيىنگىگە جول اشقاندىق دەۋگە بولادى. ەكى جاقتىڭ بىرگە قۇلشىنۋىندا، جۇڭگو مەن اۆستراليا ءارقايسى سالاداعى اۋىس – كۇيىستى قالپىنا كەلتىرىپ، قارىم - قاتىناستى جاقسارتۋ، دامىتۋ دۇرىس جولىمەن ءجۇردى. جۇڭگو مەن اۆستراليا − ازيا - تىنىق مۇحيت وڭىرىندەگى مەملەكەتتەر، 20 مەملەكەت توبىنىڭ ماڭىزدى مۇشەلەرى، ەكى مەملەكەتتە تاريحى ارازدىق، ءتۇپ مۇددە قاقتىعىسى جوق، بۇكىلدەي ءوزارا سەنىم ارتاتىن، ءوزارا تابىسقا جەتەتىن سەرىكتەر بولا الادى. ەكى جاق دۇنيە ءجۇزى اۋقىمىنىڭ تەرەڭ وزگەرىسىندە جۇڭگو - اۆستراليا قارىم – قاتىناسىنىڭ دۇرىس دامۋ باعىتىن يگەرۋى كەرەك. ءوز ەلىن الدىمەن ەسكەرۋ تۇرعىسىنان قاراعاندا، دۇنيە ءجۇزى تار ءارى سىعىلىسقان، قاي - قاشان دا حاۋىپ - قاتەر مەن باسەكەگە تولى. تاعدىرلاستىق تۇرعىسىنان قاراعاندا، دۇنيە ءجۇزى كەڭ، بارلىق جەردە وراي مەن سەلبەستىك بار. بۇكىل دۇنيە جۇزىلىك داعدارىستىڭ اساۋ تولقىنىندا، ءار ەل 190 نەشە كىشكەنە قايىققا ەمەس، قايتا تاعدىرى ورتاق ۇلكەن كەمەگە وتىرعانى ءجون. جۇڭگو مەن اۆستراليا ءداۋىر اعىمىنا سايكەسىپ، ەكى ەلدىڭ ورتاق مۇددەسىن شىعار ءتۇيىن ەتىپ، تەڭ تۇرعىدا مامىلە جاسايتىن، پارىقتاردى ساقتاپ، ورتاقتىققا ۇمتىلاتىن، ءوزارا ءتيىمدى سەلبەستىك جاسايتىن جۇڭگو - اۆستراليا قارىم - قاتىناسىن بىرگە ورناتىپ، جۇڭگو مەن اۆستراليانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز دامۋىن ىلگەرىلەتۋى كەرەك. بۇل ەكى ەلدىڭ جانە ەكى ەل حالىقتارىنىڭ ورتاق مۇددەسىنە، وڭىردەگى ەلدەردىڭ ورتاق تىلەگىنە ۇيلەسەدى، سونداي - اق حالىقارالىق قوعامنىڭ دۇنيە ءجۇزىنىڭ 100 جىلدىق وزگەرىس جاعدايى الا كەلگەن ءتۇرلى حاۋىپ - قاتەر مەن سىن - سايىسقا اناعۇرلىم ويداعىداي توتەپ بەرۋىنە ءتيىمدى.
شي جينپيڭ بىلاي دەپ دارىپتەدى: قازىر دۇنيە ءجۇزى ەكونوميكاسىنىڭ ورنىقسىز، تۇراقسىز، مەجەلەۋ قيىن فاكتورلارى كوبەيىپ، ءار ەلدىڭ ەكونوميكاسى كوپتەگەن سىن - سايىسقا ءدوپ كەلىپ وتىر. كۇردەلى سىرتقى ورتا الدىندا، جۇڭگو ەكونوميكاسى قىسىمعا توتەپ بەرىپ، كولەمىن ورنىقتىرىپ، ساپاسىن جوعارىلاتتى، جۇڭگونىڭ دامۋى ءالى دە تاماشا تىرەكتىك نەگىزگە جانە كوپتەگەن ءتيىمدى شارت - جاعدايعا يە، جۇڭگو ءوزىنىڭ ورنىقتى دامۋى ارقىلى تۇراقسىز دۇنيە ءجۇزى ەكونوميكاسىنا باعالى تۇراقتىلىق الا كەلەدى. جۇڭگونىڭ دامۋى دۇنيە جۇزىنەن قول ۇزە المايدى، دۇنيە ءجۇزىنىڭ دامۋى دا جۇڭگوعا مۇقتاج. ”شاعىن اۋلاداعى بيىك داۋال“، ”قول ءۇزۋ“ نەمەسە ”حاۋىپ - قاتەردى الاستاۋ“، ءمانى جاعىنان العاندا، قورعانىمپازدىق، بازار زاڭدىلىعىنا، عىلىم - تەحنيكانىڭ دامۋ زاڭدىلىعىنا قايشى، ادامزات قوعامىنىڭ دامۋ اعىمىنا دا قايشى. جۇڭگو ءوزارا تيىمدىلىك جەتكىزىپ، تەڭ يگىلىككە كەنەلۋ سىندى ەسىك اشۋ ستراتەگياسىن اتقارىپ، جاڭا دامۋ جاعدايىن ورناتۋدى ىلگەرىلەتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتەدى، بۇل اۆستراليانى قامتىعان دۇنيە جۇزىندەگى ەلدەرگە بۇرىن - سوڭدى بولماعان وراي اكەلەدى. جۇڭگو مەن اۆستراليا بەيبىت قاتار تۇرۋ بارىسىندا ءوزارا ءتۇسىنىسۋ مەن سەنىمدىلىكتى كۇشەيتىپ، ءوزارا ءتيىمدى سەلبەستىك بارىسىندا بىرگە دامۋدى جۇزەگە اسىرۋى كەرەك. جۇڭگو مەن اۆستراليانىڭ ەركىن ساۋدا كەلىسىمىنىڭ كومەسكى كۇشىن تولىق ساۋلەلەندىرىپ، كليمات وزگەرىسى، جاسىل ەكونوميكا سياقتى جاڭادان گۇلدەنگەن سالالارداعى سەلبەستىكتى كەڭەيتىپ، دۇنيە جۇزىلىك جانە وڭىرلىك ەركىن ساۋدا جۇيەسىن قورعاپ، ەكى ەل كاسىپورىندارىنىڭ قارجى قوسىپ تيجارات جۇرگىزۋىنە تاماشا ساۋدا ورتاسىن ازىرلەۋى كەرەك. ەكى ەل ۇكىمەتى زاڭ شىعارۋ قۇرىلىمدارىنىڭ، ساياسي پارتيالاردىڭ، اقىل - پاراسات قويمالارىنىڭ، جاستاردىڭ، جەرگىلىكتى ورىنداردىڭ اۋىس - كۇيىس جاساۋىنا قولداۋ كورسەتىپ، ادامداردىڭ بارىس - كەلىسىنە اناعۇرلىم كوپ قولايلى شارت - جاعداي ازىرلەپ، ەكى ەل حالىقتارىنىڭ ءوزارا ءتۇسىنىسۋىن، ەتەنە بولۋىن كۇشەيتىپ، ەكى ەل دوستىعىنىڭ حالىق رايى نەگىزىن بەكەمدەۋى كەرەك. جۇڭگو ازيا - تىنىق مۇحيت وڭىرىندە قاقپايلاۋ سيپاتتى شاعىن شەڭبەرمەن شۇعىلدانبايدى، توپتىق ساياسيمەن شۇعىلدانبايدى، توپ قۇرىپ قارسىلاسپايدى. شاعىن شەڭبەر بۇكىل دۇنيە ءجۇزى ءدوپ كەلىپ وتىرعان ۇلكەن سىن - سايىستى شەشە المايدى، شاعىن توپ قازىرگى دۇنيە ءجۇزىنىڭ زور وزگەرىسىنە ۇيلەسە المايدى. ازيا – تىنىق مۇحيت ءوڭىرىن بىلىقتىرۋ قاسكۇنەمدىگىنە قاراتا، بىرىنشىدەن، قىراعى بولۋىمىز، ەكىنشىدەن، قارسى تۇرۋىمىز كەرەك. جۇڭگو اۆستراليامەن اناعۇرلىم كوپ ءۇش جاقتى، كوپ جاقتى سەلبەستىكتى ورىستەتىپ، وڭتۇستىك تىنىق مۇحيت ەلدەرىنىڭ دامۋ سەرپىمدىلىگىن كۇشەيتىپ، كليمات وزگەرىسى سياقتى سىن - سايىسقا توتەپ بەرۋىن قولداپ، اشىق، سيىسىمدى بولۋ بارىسىندا ازيا - تىنىق مۇحيت ءوڭىرىنىڭ بەيبىتشىلىگى مەن ورنىقتىلىعىن قورعاۋدى قالايدى.
البانيس مىنالاردى ءبىلدىردى: ۋيترام مىرزانىڭ جۇڭگوعا ساپارلاي كەلگەنىنىڭ 50 جىلدىعى سىندى تاريحي ساتتە جۇڭگودا رەسمي ساپاردا بولعانىمدى ماقتانىش سەزىنەمىن. تاياۋ جىلداردان بەرى جۇڭگو كەدەيلىكتەن ارىلتۋ جانە دامۋ جاعىندا تاڭعالارلىق تابىستارعا قول جەتكىزدى. جۇڭگونىڭ ۇزاق ۋاقىت ورنىقتى، باياندى دامۋى اۆستراليا مەن دۇنيە ءجۇزىن كوپ يگىلىككە كەنەلتتى، ەكى جاق ءوزارا قۇرمەت ەتىپ، تەڭ تۇرعىدا ءوزارا پايدا جەتكىزىپ، قارىم - قاتىناستى، اۋىس - كۇيىستى ساقتاپ، ءتۇسىنىسۋ مەن سەلبەستىكتى كۇشەيتىپ، ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرۋى كەرەك. جۇڭگو حالقىنىڭ دا دامۋ ۇقىعى بار، مەن جۇڭگو ەكونوميكاسىنىڭ بولاشاعىنا باستان - اياق بەلسەندى جانە ۇمىتكەر پوزيتسيادا بولامىن. اۆستراليا مەن جۇڭگونىڭ ساياسي ءتۇزىلىسى ۇقسامايدى، الاۋىزدىعى وتە قالىپتى، ءبىراق الاۋىزدىق ارقىلى ەكى ەل قارىم - قاتىناسىنا انىقتاما بەرۋگە بولمايدى. اۆستراليا مەن جۇڭگو كەڭ كولەمدى ورتاق مۇددەگە يە، پىكىرلەسۋ، سەلبەسۋ عانا − دۇرىس تالعام. اۆستراليا ءبىر جۇڭگو ساياساتىندا تاباندى بولادى، جۇڭگومەن ەكى ەل قارىم - قاتىناسىنىڭ ورنىقتى دامۋىن بەلسەنە ىلگەرىلەتىپ، ەكونوميكا - ساۋدا بارىس - كەلىسىن جيىلەتىپ، تازا ەنەرگيا، كليمات وزگەرىسى سياقتى سالالارداعى سەلبەستىكتى كۇشەيتىپ، ەكى ەل حالىقتارىنا ءتىپتى دە كوپ باقىت جاراتۋدى قالايدى. اۆستراليا جاق جۇڭگومەن تىنىق مۇحيت ارال ەلدەرى تالقى مىنبەرى سياقتى وڭىرلىك ىستەر جونىندە پىكىرلەسۋدى كۇشەيتۋدى قالايدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
