ارزانداۋ مولشەرى ورتا ەسەپپەن %49 بولدى! بۇل ساياسات وسى ايدا اتقارىلادى
2023.11.03 13:54 كەلۋ قاينارى : حالىق تورابى
جۋىردا، حۋبەي، جياڭشي قاتارلى جەرلەر ەلىمىز بويىنشا جۇڭگوشا دايىن دارىلەردى شوعىرلى ساتىپ الۋعا تاڭداۋ ناتيجەسىن ىركەس - تىركەس اتقارىپ، تاڭدالعان 68 ءدارىنىڭ باعاسى ورتا ەسەپپەن %49 ارزانداعان. ەلىمىز بويىنشا جۇڭگوشا دايىن دارىلەردى ساتىپ الۋ بارىسىندا ەلىمىز بويىنشا 30 ولكە، اۆتونوميالى رايون، توتە قاراستى قالا مەملەكەتتىك سيپاتتا ساتىپ الۋ بىرلەستىگىن قۇرعان، تاڭدالعان ءدارى - دارمەكتەر ىشكى اۋرۋ دارىلەرى، سۇيەكتىڭ مەرتىگۋىن ەمدەيتىن دارىلەر، كوز اۋرۋى دارىلەرى، وسپەنى ەمدەيتىن دارىلەر، جۇرەك - قان تامىرى جۇيەسىنىڭ دارىلەرى جانە ايەلدەر اۋرۋىنىڭ دارىلەرى سىندى 6 ءتۇرلى ەمدەۋ سالاسىنداعى كلينيكادا ۇنەمى قولدانىلاتىن كوپ ءتۇرلى جۇڭگوشا دايىن دارىلەرگە سايادى.
ماماندار جۇڭگوشا دايىن دارىلەردى شوعىرلى ساتىپ الۋ ءورىسىنىڭ ۇيلەسىمدى ەكەنىن، جۇڭگوشا دايىن دارىلەر بازارىنداعى باعانى قالىپتاستىرۋدا جەتەكشى رول اتقاراتىنىن، ءدارى - دارمەك وندىرەتىن كاسىپورىندارىڭ ءونىمنىڭ ساپاسى مەن جاڭالىق اشۋ قۋاتى ارقىلى بازاردى يەلەپ، بۇقارانىڭ اۋىرتپالىعىن جەڭىلدەتۋىنە پايدالى ەكەنىن ايتتى.
حۋبەي ولكەسى ەمدەۋدى قامتاماسىزداندىرۋ مەكەمەسى ءدارى - دارمەكتەردىڭ باعاسى مەن مەردىگەر شاقىرۋ - ساتىپ الۋ باسقارماسىنىڭ باستىعى جۋ شياۋپيڭ بىلاي دەدى: بىرلەستىككە قاتىناسقان وڭىرلەر ءدارى - دارمەك قاراجاتىنان مەجەمەن جىلىنا 4 ميلليارد 500 ميلليون يۋان قاراجات ۇنەمدەيدى. مەملەكەتتىك ەمدەۋدى قامتاماسىزداندىرۋ مەكەمەسىنىڭ ءبىرتۇتاس ورنالاستىرۋىنا ساي، بىرلەستىككە قاتىناسقان ءارقايسى وڭىرلەر مەن ولكەلەر اتقارۋ قىزمەتىن ىركەس - تىركەس ورىستەتەدى، مەجەمەن 11 - ايدىڭ ورتا شەنىنە بارعاندا بۇكىلدەي اتقارىلادى.
جۇڭگوشا دايىن دارىلەردەن سىرت، جۋىرداعى جىلداردان بەرى، جەر - جەر ولكە دارەجەلى جانە ولكەلەر ارا بىرلەستىكتەر ارقىلى جۇڭگوشا ءدارى - دارمەك ماتەريالدارىن، جۇڭگوشا دايىن تۋرامالى دارىلەردى جانە جۇڭگوشا رەتسەپتىك تۇيىرشىك دارىلەر قاتارلىلاردى شوعىرلى ساتىپ الۋدى تۇيىندە سىناق ەتتى. جۇڭگوشا رەتسەپتىك تۇيىرشىك دارىلەر دەگەنىمىز جۇڭگوشا دارا تۋرامالى دارىلەردىڭ ءنارىن الىپ، ونى قويىلتۋ ارقىلى جاسالعان تۇيىرشىك دارىلەر، ناۋقاستاردىڭ ءدارىنى قايناق سۋمەن تىكەلەي ىشۋىنە قولايلى.
جۋىرداعى جىلداردان بەرى، رەتسەپتىك تۇيىرشىكتەردى وندىرەتىن كاسىپورىنداردىڭ سانى زور مولشەردە ارتىپ، بازارداعى باسەكەلىك قۋاتى ءبىرشاما جەتكىلىكتى بولدى. بۇل شارا اتقارىلعاننان كەيىن، بىرلەستىككە قاتىناسقان ولكەلەرگە جىلىنا ءبىر ميلليارد 665 ميلليون يۋان قاراجات ۇنەمدەپ بەرەدى. مەجەمەن كەلەسى جىلى 1 - ايدا، بىرلەستىككە قاتىناسقان وڭىرلەردەگى ناۋقاستاردىڭ ساپالى دا ارزان باعاداعى، شوعىرلى ساتىپ الىنعان جۇڭگوشا رەتسەپتىك تۇيىرشىك دارىلەردى ساتىپ الۋىنا بولادى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
