شي جينپيڭ ۆيەتنامنىڭ اقپارات قۇرالىندا اۆتورلى ماقالا جاريالادى
ستراتەگيالىق مانگە يە جۇڭگو - ۆيەتنام تاعدىرلاس ورتاق تۇلعاسىن قۇرىپ، قول ۇستاسا وسىزاماندانۋعا قادام تاستاۋدىڭ تىڭ پاراعىن اشايىق
2023.12.12 15:59 كەلۋ قاينارى : حالىق تورابى
شينحۋا اگەنتتىگى، 12 - ايدىڭ 12 – كۇنى، بەيجيڭ. 12 - ايدىڭ 12 - كۇنى حانويعا بارىپ ۆيەتنامدا مەملەكەتتىك ساپاردا بولۋ قارساڭىندا، ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ ۆيەتنامنىڭ «حالىق گازەتىندە» «ستراتەگيالىق مانگە يە جۇڭگو - ۆيەتنام تاعدىرلاس ورتاق تۇلعاسىن قۇرىپ، قول ۇستاسا وسىزاماندانۋعا قادام تاستاۋدىڭ تىڭ پاراعىن اشايىق» دەگەن تاقىرىپتا اۆتورلى ماقالا جاريالادى. ماقالانىڭ تولىق مازمۇنى تومەندەگىدەي:
ستراتەگيالىق مانگە يە جۇڭگو - ۆيەتنام تاعدىرلاس ورتاق تۇلعاسىن قۇرىپ، قول ۇستاسا وسىزاماندانۋعا قادام تاستاۋدىڭ تىڭ پاراعىن اشايىق
ج ك پ ورتالىق كوميتەتىنىڭ باس شۋجيى، جۇڭحۋا حالىق رەسپۋبليكاسىنىڭ ءتوراعاسى شي جينپيڭ
ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى رۋان فۋجۇڭ مەن ۆيەتنامنىڭ مەملەكەت ءتوراعاسى ۋ ۋىنشاڭنىڭ ۇسىنىسى بويىنشا، مەن ۆيەتنام سوتسياليستىك رەسپۋبليكاسىندا مەملەكەتتىك ساپاردا بولامىن. بۇل − مەنىڭ ج ك پ ورتالىق كوميتەتىنىڭ باس شۋجيى، جۇڭحۋا حالىق رەسپۋبليكاسىنىڭ ءتوراعاسى بولعاننان بەرى ۆيەتنام سىندى كورىكتى جەرگە 3 - رەت قادام تاستاۋىم، ايرىقشا تۋىسقاندىق سەزىمگە بولەنىپ، كورشى - قولاڭداردىڭ ۇيىنە قىدىرىپ بارعان سياقتى سەزىنىپ وتىرمىن.
جۇڭگو مەن ۆيەتنامنىڭ تاۋ - وزەندەرى تۇتاسقان، مادەنيەتى توعىسقان، مۇراتى ۇقساس، تاعدىرى ءبىر. ماۋ زىدۇڭ، حۋ جىميڭ قاتارلى ەكى پارتيانىڭ، ەكى ەلدىڭ اعا بۋىن باسشىلارى ورتاق مۇرات - سەنىم ارقىلى ءوزارا ءتۇسىنىسىپ، ”جولداس ءارى باۋىرلاس“ بولعان جۇڭگو - ۆيەتنام ءداستۇرلى دوستىعىن قول ۇستاسا سومدادى. ءوز ەلىنىڭ تاۋەلسىزدىگى مەن ۇلت ازاتتىق ىستەرىنە تالپىنۋ بارىسىندا، ءبىز ءبىر نيەتپەن ىنتىماقتاسىپ، ءبىر - ءبىرىمىزدى قولداپ كەلەمىز. سوتسياليستىك قۇرىلىس ىستەرىندە ءبىز ءوزارا ۇيرەنىپ، ءوزارا ۇلگى الىپ، سەلبەستىكتى كەڭەيتىپ، جۇڭگو - ۆيەتنام دوستىعىنىڭ تاريحي داستانىن بىرگە جازدىق.
بيىل − جۇڭگو مەن ۆيەتنامنىڭ جالپى بەتتىك ستراتەگيالىق سەلبەستىك سەرىكتەستىك قارىم - قاتىناس ورناتقانىنىڭ 15 جىلدىعى. حالىقارالىق جاعداي قالاي قۇبىلسا دا، جۇڭگو مەن ۆيەتنام پارتيالارى، ەلدەرى بەيبىتشىلىكتى، تىنىشتىقتى بىرگە ساقتاپ، دامۋدى، سەلبەستىكتى بىرگە جوسپارلاپ، گۇلدەنىپ - كوركەيۋدى، قۇدىرەتتەنۋدى بىرگە جاراتىپ، ادامزاتتىڭ تاعدىرلاس ورتاق تۇلعاسىن بىرگە قۇرۋدىڭ شۇعىلالى جولىمەن ءجۇردى.
ءبىز سەنىم ارقىلى قارىم - قاتىناس جاساۋدا تاباندى بولدىق. ەكى پارتيانىڭ، ەكى ەلدىڭ جوعارى جىكتەگىلەرى تۋىسقانداي ۇنەمى بارىس - كەلىس جاساپ كەلەدى. بيىل باس شۋجي رۋان فۋجۇڭمەن تىعىز ىقپالداسىپ، جاڭا داۋىردەگى جۇڭگو - ۆيەتنام قارىم - قاتىناسىنىڭ جوباسىن ستراتەگيالىق بيىكتىكتەن جانە ۇزاق بولاشاقتىق تۇرعىدان بىرگە جاساپ، جۇڭگو - ۆيەتنام قارىم - قاتىناسىنىڭ جاڭا ورنىن تۇراقتاندىرىپ، جاڭا كەزەڭگە قادام تاستاۋىن ىلگەرىلەتتىك. مەن جۇڭگوعا ساپارلاي بارعان نەمەسە ماجىلىسكە قاتىناسقان مەملەكەت ءتوراعاسى ۋ ۋىنشاڭ، ۇكىمەتتىڭ زۇڭليى فان ميڭجىڭ، ۆيەتنام كوممۋنيستىك پارتياسى ورتالىق كوميتەتى شۋجيچۋىنىڭ ۇنەمىلىك ىستەرگە جاۋاپتى شۋجيى جاڭ شىمەي جولداستارمەن ىلگەرىندى - كەيىندى كەزدەستىم. ەكى جاق ەكى جاقتى سەلبەستىككە جەتەكشىلىك ەتۋ كوميتەتى، ەكى پارتيانىڭ نازاريالىق زەرتتەۋ - تالقى ءماجىلىسى، ەكى ەل قوعام حاۋىپسىزدىگى مينيسترلىگىنىڭ قىلمىسقا سەلبەسىپ سوققى بەرۋ ءماجىلىسى سياقتى مەحانيزم ماجىلىستەرىن اشتى. تاراۋلاردىڭ، جەرگىلىكتى ورىنداردىڭ سەلبەستىگى اناعۇرلىم جيىلەي ءتۇستى.
ءبىز پايدا ارقىلى توعىسۋدا تاباندى بولدىق. جۇڭگو ۇزاق ۋاقىتتان بەرى ۆيەتنامنىڭ ەڭ ۇلكەن ساۋدا سەرىگى بولىپ كەلەدى، ۆيەتنام − جۇڭگونىڭ شىعىس وڭتۇستىك ازيا وداعىنداعى ەڭ ۇلكەن ساۋدا سەرىگى جانە دۇنيە جۇزىندەگى 4 - ۇلكەن ساۋدا سەرىگى. جۇڭگو جاقتىڭ ۇسىنىسى بويىنشا، ۆيەتنام باسشىلارى 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە، 6 - كەزەكتى جۇڭگو حالىقارالىق يمپورت كورمەسىنە، 7 - كەزەكتى جۇڭگو - وڭتۇستىك ازيا كورمەسىنە، 20 - كەزەكتى جۇڭگو - شىعىس وڭتۇستىك ازيا ەلدەرى وداعى كورمەسىنە قاتىناستى. ۆيەتنامنىڭ جۇڭگوعا شىعارعان جەمىس - جيدەك، كوكونىس سياقتى اۋىل شارۋاشىلىق ونىمدەرى جۇڭگو تۇتىنۋشىلارىنىڭ قىزۋ قارسى الۋىنا يە بولدى. جۇڭگو ەكسپورت ەتكەن شيكىزات پەن ماشينا جابدىقتارى ۆيەتنامنىڭ جاساۋ كاسىبىنىڭ دامۋىن پارمەندى قولدادى. جۇڭگو كاسىپورىندارى حانويداعى جەڭىل رەليس 2 - لەنياسىن ۇستىنە الىپ سالدى، بۇل ۆيەتنامنىڭ تۇڭعىش قالا جەڭىل رەليس نىسانى، مۇنىمەن جالپى 20 ميلليون ادام - رەتكە جۋىق جولاۋشى تاسىلىپ، حانويداعى قالا تۇرعىندارىنىڭ ءجۇرىس - تۇرىسىنا قولايلىلىق تۋدىردى. جۇڭگو - ۆيەتنام حالىقارالىق كەزەكشى پويەزى قاتىناپ، زەردەلى شەكارا وتكەلى قۇرىلىسى باستالىپ، قۇرلىق شەكارا وتكەلدەرىنىڭ ءوزارا بايلانىسى جەدەل ىلگەرىلەتىلدى. جۇڭگو كاسىپورىندارى ۆيەتنامدا شەتەلدەگى ەڭ ۇلكەن فوتوۆولت كاسىپ شوعىرىن قۇرىپ، قارجى قوسىپ سالعان فوتوۆولت جانە جەل ەنەرگياسى ەلەكتر ستانسياسى ۆيەتنامنىڭ ەنەرگيا تيپىن وزگەرتىپ دامۋىنا بەلسەندى ۇلەس قوستى، حانوي، چينجۇي سياقتى جەرلەردە قارجى قوسىپ، كوپتەگەن قوقىر - قوقسىقتان توك شىعارۋ نىسانىن قۇردى.
ءبىز دوستىقپەن جاقىنداسۋدا تاباندى بولدىق. بيىل جىل باسىنان بەرى ەكى ەل ادامدارىنىڭ بارىس - كەلىسى جەدەل قالپىنا كەلدى، الدىڭعى 10 ايدا جۇڭگونىڭ ۆيەتنامعا ساياحاتتاي بارعان ساياحاتشىلارى ءبىر ميلليون 300 مىڭ ادام - رەتتەن استى، جۇڭگو - ۆيەتنام دىتيان (بانيوۋ) سارقىراماسىنىڭ شەكارا اتتاعان ساياحات سەلبەستىك رايونى سىناق رەتىندە ءساتتى ىسكە قوسىلدى. جۇڭگو مەملەكەتتىك ساياسي كەڭەسى مەن ۆيەتنام وتان شەبى ورتالىق كوميتەتى جانە شەكارا ولكەلەردىڭ دوستىق اۋىس - كۇيىس قيمىلى، جۇڭگو - ۆيەتنام شەكارا تۇرعىندارىنىڭ كولەمدى بىرلەسكەن ساۋىعى سياقتى قيمىلدار دابىرالى ورىستەتىلدى. جۇڭگونىڭ ءداستۇرلى كلاسسيكالىق شىعارمالارىنىڭ اتىن ۆيەتنامدا جۇرتتىڭ ءبارى بىلەدى، جۇڭگونىڭ قازىرگى زامان كينو - تەلەۆيزيا تۋىندىلارى دا ۆيەتنام بۇقاراسىنىڭ قىزۋ قارسى الۋىنا يە بولدى. ۆيەتنامنىڭ كەڭ تارالعان اندەرى جۇڭگونىڭ قوعامدىق قارىم - قاتىناس مەديالارىن دۋمانعا بولەدى، ۆيەتنام انشىلەرى جۇڭگونىڭ امبەباپ باعدارلاماسىندا قىرۋار جۇڭگولىق ”جانكۇيەردى“ قابىلدادى. كۇن سايىن جيىلەگەن گۋمانيتارلىق اۋىس - كۇيىس بەينە سىلدىراپ اققان بۇلاقتار سياقتى توعىسىپ، جۇڭگو مەن ۆيەتنامنىڭ دوستىق بارىس - كەلىسىنىڭ بۋىرقانعان وزەنىنە اينالدى.
ءبىز شىن نيەتىمىزبەن مامىلە جاساۋدا تاباندى بولدىق. ەكى ەل دە كوپ جاقتىلىق تۋىن بيىك ۇستاپ، پىكىرلەسۋدە، كەڭەسۋدە، بەيبىت سەلبەسۋدە تاباندى بولۋدى دارىپتەپ، بىرلەسكەن مەملەكەتتەر ۇيىمى ەرەجەسىنىڭ ماقساتى مەن پرينسيبىن نەگىز ەتكەن حالىقارالىق قاتىناستىڭ نەگىزگى ولشەمىن باتىل قورعادى. ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا قولداۋ كورسەتىپ، حالىقارالىق جانە وڭىرلىك سەلبەستىك مەحانيزمىندە تىعىز سايكەسۋدى ساقتادى. ۆيەتنام دۇنيە جۇزىلىك دامۋ باستاماسىنىڭ دوستار گرۋپپاسىنا بەلسەنە ات سالىسىپ، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن قولداپ، جۇڭگونىڭ «جان – جاقتى ءارى تىنىق مۇحيت اتتاعان سەرىكتەستىك قارىم - قاتىناس كەلىسىمىنە» قاتىناسۋىن قولدادى.
بيىل − مەنىڭ ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن، ”ءبىر بەلدەۋ، ءبىر جولدى“ بىرگە قۇرۋ باستاماسىن جانە جاقىن، ادال، ءتيىمدى، كەشىرىمشىل توڭىرەكتىك ديپلوماتيا ۇستانىمىن العا قويعانىمنىڭ 10 جىلدىعى. ادامزاتتىڭ تاعدىرلاس ورتاق تۇلعاسىن قۇرۋدا، ەڭ اۋەلى، ازيادان باستاۋ كەرەك. جۇڭگودا: ”ازيادا اعاشتىڭ ءوزى تامىرلاس، ازيادا بۇلت تا ەسەندەسەدى“ دەيتىن قۇلاققا تانىس ءان بار، بۇل جۇڭگو حالقىنىڭ كوڭىلىندەگى قاراپايىم ازيا تاعدىرلاس ورتاق تۇلعاسى تانىمىن بەينەلەيدى. ازيا − ءبىزدىڭ ورتاق مەكەنىمىز، توڭىرەگىمىز كوشىپ كەتپەيتىن كورشىلەر، كورشىلەردى تابىسقا جەتكىزۋدىڭ ءوزى وزىمىزگە كومەكتەسكەندىك سانالادى. كورشىمەن تاتۋدىڭ كوڭىلى الاڭسىز. جۇڭگو ءوزىنىڭ دامۋىن توڭىرەكتەگى ەلدەردىڭ دامۋىمەن اناعۇرلىم تىعىز ۇشتاستىرىپ، توڭىرەكتەگى ەلدەرمەن تاعدىرلاس ورتاق تۇلعا قۇرىپ، كوپشىلىكتىڭ بىرگە جاقسى تۇرمىس كەشىرۋىنە مۇمكىندىك جاساۋدى قالايدى.
ۆيەتنامنىڭ جۇڭگومەن ”جولداس ءارى باۋىرلاس“ تەرەڭ سۇيىسپەنشىلىگى بار. جۇڭگو پارتياسى مەن ۇكىمەتى جۇڭگو - ۆيەتنام قارىم - قاتىناسىن دامىتۋدى باستان - اياق جۇڭگونىڭ توڭىرەكتىك ديپلوماتياسىنىڭ الدىمەن ەسكەرەتىن بەتالىسى دەپ قاراپ، ەكى ەلدىڭ ءداستۇرلى دوستىق اۋەلگى ماقساتىن ۇمىتپاي، ورتاق مۇرات پەن بورىشتى ەستە بەرىك ساقتاپ، سوتسياليزم جولىمەن قول ۇستاسا ويداعىداي ءجۇرىپ، ستراتەگيالىق مانگە يە تاعدىرلاس ورتاق تۇلعا قۇرۋدى ۇزدىكسىز ىلگەرىلەتۋدى شىن جۇرەكتەن ءۇمىت ەتەدى.
− ستراتەگيالىق بايلانىستى ساقتاپ، جۇڭگو - ۆيەتنام تاعدىرلاس ورتاق تۇلعاسىنىڭ ساياسي نەگىزىن بەكەمدەۋ كەرەك. ەكى جاق جوعارى جىكتەگىلەردىڭ ستراتەگيالىق قارىم - قاتىناسىن ۇزدىكسىز ساقتاپ، جۇڭگو - ۆيەتنام قارىم - قاتىناسى سىندى كەمەنىڭ تولقىن جارا العا ىلگەرىلەۋىنە كەپىلدىك ەتۋى كەرەك. ەكى جاق قارسى جاقتىڭ ءوز ەلىنىڭ مەملەكەت جاعدايىنا ۇيلەسەتىن سوتسياليزم جولىمەن ويداعىداي ءجۇرۋىن باتىل قولداپ، دامۋ جانە حاۋىپسىزدىك سىندى ەكى ءىرى ءىستى ويداعىداي ءبىر تۇتاس جوسپارلاپ، دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن بىرگە امالياتتا ايگىلەۋى كەرەك. سوتسياليستىك قۇرىلىس نازارياسى مەن امالياتتىق تاجىريبە اۋىس - كۇيىسىن ونان ارى تەرەڭدەتىپ، سىرتقى حاۋىپ - قاتەر مەن سىن - سايىسقا بىرگە توتەپ بەرىپ، وزدەرىنىڭ سوتسياليستىك قۇرىلىس ىستەرىنىڭ ورنىقتى، باياندى بولۋىنا كەپىلدىك ەتۋ كەرەك.
− ءبىرىن - ءبىرى تولىقتاۋ ابزالدىعىن ساۋلەلەندىرىپ، جۇڭگو - ۆيەتنام تاعدىرلاس ورتاق تۇلعاسىنىڭ سەلبەستىك نەگىزىن كۇشەيتۋ كەرەك. جۇڭگو جوعارى دەڭگەيدە سىرتقا ەسىك اشۋ ارقىلى جاڭا دامۋ جاعدايىن قالىپتاستىرۋدى ىلگەرىلەتۋدە، ۆيەتنامنىڭ ەكونوميكاسى ورنىقتى ارتۋدى ساقتادى، ەكى جاق جاعراپيالىق جاقىن بولۋ، كاسىپ سالاسىنىڭ ءبىرىن - ءبىرى تولىقتاۋ ابزالدىعىن تولىق ساۋلەلەندىرىپ، ”ءبىر بەلدەۋ، ءبىر جولدى“ بىرگە قۇرۋ باستاماسى مەن ”ەكى ءدالىز، ءبىر شەڭبەر“ ستراتەگياسىن ۇشتاستىرۋ سەلبەستىگىن جەدەل ىلگەرىلەتىپ، ۇلاستىرۋ - تۇتاستىرۋ، مەملەكەت مەنشىگىندەگى كاسىپورىندار رەفورماسى، جاسىل ەنەرگيا، شەشۋشى كەن ونىمدەرى سياقتى سالالارداعى سەلبەستىكتى ۇزدىكسىز كەڭەيتىپ، مەملەكەتتىڭ دامۋىنا اناعۇرلىم ويداعىداي قىزمەت وتەپ، ەكى ەل حالىقتارىنا ءتىپتى دە كوپ تيىمدىلىك جاساۋى كەرەك.
− دوستىق اۋىس - كۇيىستى كۇشەيتىپ، جۇڭگو - ۆيەتنام تاعدىرلاس ورتاق تۇلعاسىنىڭ حالىق رايى نەگىزىن بەكەمدەۋ كەرەك. الىستاعى تۋىستان جاقىنداعى كورشى ارتىق. جۇڭگو - ۆيەتنام قارىم - قاتىناسىنىڭ نەگىزى حالىقتا، قان تامىرى حالىقتا، كۇش - قۋاتى حالىقتا. ءبىز دوستىق سەلبەستىكتى، اۋىس - كۇيىستى كۇشەيتىپ، جۇڭگو - ۆيەتنام ورتالىق مەديالارى، اقىل - پاراسات قويماسى، مادەنيەت - ساياحات، باسپا قۇرىلىمى، راديو - كينو - تەلەۆيزيا سياقتى تاراۋلاردىڭ باعىتتامالى اۋىس - كۇيىس مەحانيزمىنىڭ ونىمدىلىگىن تولىق ساۋلەلەندىرىپ، جۇڭگو ءتىل – جازۋى وقىتۋى، كاسىپتىك وقۋ - اعارتۋ، دەنە تاربيە، دەنساۋلىق ساقتاۋ سياقتى سەلبەستىكتەردى تەرەڭدەتىپ، جۇڭگو - ۆيەتنام حالىق تالقى مىنبەرى، جاستاردىڭ دوستىق كەزدەسۋى سياقتى جەلىلەس ماركا قيمىلدارىن ويداعىداي وتكىزىپ، ەكى ەل حالىقتارىنىڭ، اسىرەسە، جاس ۇرپاقتاردىڭ ءوزارا ءتۇسىنىسۋى مەن سۇيىسپەنشىلىگىن كۇشەيتۋىمىز كەرەك. ەكى ەل ءتىپتى دە كوپ تىكە قاتىنايتىن كەزەكشى ۇشاقتاردى كوبەيتۋى كەرەك، جۇڭگو ءتىپتى دە كوپ جۇڭگولىق ساياحاتشىلاردى ۆيەتنامعا ساياحاتتاي كەلىپ، ۆيەتنامنىڭ تاريحي مادەنيەتىنىڭ وزگەشە قۇدىرەتىن سەزىنۋگە شابىتتاندىرادى.
− الاۋىزدىقتاردى ۇيلەسىمدى تىزگىندەپ، جۇڭگو - ۆيەتنام تاعدىرلاس ورتاق تۇلعاسىنىڭ ورتاق تانىم نەگىزىن كەڭەيتۋ كەرەك. ەكى جاق ەكى پارتيا، ەكى ەل باسشىلارىنىڭ ورتاق تانىمىن تياناقتاندىرىپ، تەڭىزدەگى الاۋىزدىقتاردى ۇيلەسىمدى تىزگىندەپ، ەكى جاق تا قابىلداي الاتىن شەشۋ ءادىسىن بىرگە قاراستىرۋى كەرەك. ەكى جاق ەكى ەل حالىقتارىنىڭ ۇزاق بولاشاقتىق ىرىس - قۇتىن كوزدە ۇستاپ، ءوزارا پايدا جەتكىزىپ، تەڭ يگىلىككە كەنەلۋدە تاباندى بولىپ، سەلبەستىكتى بەلسەنە ىلگەرىلەتىپ، وزدەرىنىڭ دامۋىنا تاماشا سىرتقى ورتا جاراتۋ، ءوڭىردىڭ باياندى تىنىشتىعىن جۇزەگە اسىرۋ جولىندا ءتيىستى قۇلشىنىستار جاساۋى كەرەك.
قازىر دۇنيە جۇزىندە 100 جىلدىق وزگەرىس ءالى دە جەدەل قۇبىلۋدا، زورەكەرلىك، سىڭار جاقتىلىق، قورعانىمپازدىق كۇشەيۋدە، ءوڭىردىڭ بەيبىتشىلىگى مەن دامۋى ءبىرشاما زور ورنىقسىزدىق پەن تۇراقسىزدىققا ءدوپ كەلىپ وتىر. ازيا شالقار وركەنيەتتىڭ تاريحي نەگىزىندە تۇرىپ، دامۋ، گۇلدەنۋدىڭ ماڭىزدى وتكەلىن قارسى الۋدا. ازياداعى جاڭادان گۇلدەنگەن بازارلار مەن وركەندەپ كەلە جاتقان ەكونوميكالىق تۇلعالار دۇنيە ءجۇزى ەكونوميكاسىنىڭ ارتۋىنداعى نەگىزگى قوزعالتقىشقا اينالادى.
تاريح مىنانى قايتا - قايتا دالەلدەدى: ءبىر مەملەكەت، ءبىر رايون گۇلدەنۋ ءۇشىن، ءسوز جوق، تاريحتىڭ العا باسۋ لوگيكاسىندا العا باسۋى، ءداۋىردىڭ دامۋ اعىمىندا دامۋى كەرەك. ازيا ءوڭىرىنىڭ بولاشاعى ازيا حالقىنىڭ ءوز قولىندا. 10 جىلدان بەرى ازيا حالقى جاقىن، ادال، ءتيىمدى، كەشىرىمشىل بولۋ ۇستانىمىن بىرگە امالياتتا ايگىلەپ، بەيبىتشىلىك، سەلبەستىك، سيىسىمدى، توعىسقان ازيا قۇن كوزقاراسىن ساۋلەلەندىرگەندە عانا ادامزاتتىڭ بەيبىتشىلىك، دامۋ، العا باسۋ اعىمىمەن توعىسۋعا بولاتىنىن؛ تەك سەلبەسىپ تەڭ يگىلىككە كەنەلۋدە تاباندى بولىپ، ”ءبىر بەلدەۋ، ءبىر جولدى“ بىرگە اقىلداسىپ، بىرگە قۇرىپ، بىرگە يگىلىكتەنىپ، اشىق قاقپانى بارعان سايىن ايقارا اشقاندا عانا وڭىرلىك ەكونوميكالىق اينالىمنىڭ ىركىلىسسىزدىگىن، دارەجەسىن جوعارىلاتۋدى جەبەپ، ازيا حالقىنا اناعۇرلىم كوپ ىرىس - قۇت اكەلۋگە بولاتىنىن؛ ازيانىڭ تاعدىرلاس ورتاق تۇلعاسىن قۇرۋدى بەلسەنە ىلگەرىلەتىپ، ءوز ەلىنىڭ دامۋىن ءار ەلدىڭ بىرگە دامۋىنا سىڭىرگەندە عانا بەيبىت، تىنىش، گۇلدەنگەن، كوركەم، دوس، بىرگە ءومىر سۇرەتىن ازيا مەكەنىن بىرگە قۇرۋعا بولاتىنىن بارعان سايىن ىشكەرىلەي تاني ءتۇستى.
كۇللى تىرشىلىك ءوز تەگىن تابادى، بارلىق ءىس ءوز جولىن تابادى. دۇنيە جۇزىندە مەيلى قانداي وراسان زور وزگەرىس بولسا دا، جۇڭگو دۇرىس جولمەن جۇرۋدە تاباندى بولادى. جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتىپ، ساپالى دامۋدى ۇزدىكسىز ىلگەرىلەتىپ، جوعارى دەڭگەيدەگى سىرتقا ەسىك اشۋدا تاباندى بولىپ، جاڭا دامۋ جاعدايىن جەدەل قالىپتاستىرادى. جۇڭگو توڭىرەكتىك ديپلوماتيالىق ساياساتتىڭ ۇلاسپالىلىعى مەن ورنىقتىلىعىن ساقتاپ، كورشىلەرمەن تاتۋ - ءتاتتى ءوتۋ، كورشىلەرمەن سەرىك بولۋ جانە ىنتىماقتى بولۋ، كورشىلەردى الاڭسىز ەتۋ، كورشىلەردى اۋقاتتاندىرۋ باعىتىندا تاباندى بولادى، سونىمەن بىرگە، جاقىن، ادال، ءتيىمدى، كەشىرىمشىل بولۋ ۇستانىمىنا جاڭا مازمۇن قوسىپ، جۇڭگو ۇلگىسىندەگى وسىزامانداندىرۋدىڭ توڭىرەكتەگى ەلدەرگە اناعۇرلىم كوپ تيىمدىلىك جاساۋىنا مۇمكىندىك جاساپ، ازيانىڭ وسىزاماندانۋ اياق الىسىن بىرگە ىلگەرىلەتىپ، ۆيەتنامدى قامتىعان ازيا ەلدەرىنە جاڭا دامۋ ورايىن جاراتىپ بەرەدى.
مەن جۇڭگو مەن ۆيەتنامنىڭ ستراتەگيالىق مانگە يە تاعدىرلاس ورتاق تۇلعا قۇرۋى اناعۇرلىم كوپ مەملەكەتتى ازيانىڭ تاعدىرلاس ورتاق تۇلعاسىن جانە ادامزاتتىڭ تاعدىرلاس ورتاق تۇلعاسىن قۇرۋ ۇلى ىسىنە ات سالىسۋعا باۋراپ، ازيانىڭ باياندى دامۋى مەن تاتۋ كورشىلىك دوستىعىنا اناعۇرلىم كوپ وڭ ەنەرگيا ازىرلەپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوساتىنىنا سەنەمىن.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
