9 - كەزەكتى گرۋزيا − جۇڭگو شينجياڭ تاۋار كورمەسى اشىلدى
2023.12.08 15:10 كەلۋ قاينارى : شينجياڭ گازەتى
انار بۇلت \ شينجياڭ گازەتىنىڭ ءتىلشىسى يۇي جياڭيان 12 - ايدىڭ 6 - كۇنى تبيليسيدەن حابارلايدى. 12 - ايدىڭ 6 - كۇنى 2023 - جىلعى (9 - كەزەكتى) گرۋزيا − جۇڭگو شينجياڭ تاۋار كورمەسى گرۋزيانىڭ استاناسى تبيليسيدەگى مەملەكەتتىك ءماجىلىس - كورمە ورتالىعىندا اشىلدى.
جۇڭگونىڭ گرۋزياداعى باس ەلشىسى جوۋ چيان اشىلۋ سالتىنا قاتىناستى ءارى ارناۋ ءسوز سويلەدى. ول بىلاي دەدى: وسى كەزەكتى كورمە ”ءبىر بەلدەۋ، ءبىر جولدى“ بىرگە قۇرۋ باستاماسىن امالياتتا ايگىلەۋدىڭ جاندى بەينەسى، جۇڭگونىڭ شينجياڭى مەن گرۋزيا كاسىپورىندارى اراسىنداعى ەكونوميكا - ساۋدا ناقتى ىستەر سەلبەستىگىن ۇزدىكسىز تەرەڭدەتىپ، ”ءبىر بەلدەۋ، ءبىر جولدى“ جوعارى ساپالى بىرگە قۇرۋ سەلبەستىگى نەگىزىندە، وزدەرىنىڭ ەكونوميكالىق، قوعامدىق دامۋىنا تاعى دا دەمەۋشى كۇش ۇستەيدى. كورمە ارقىلى ەكى ەل مەملەكەت باسشىلارىنىڭ ماڭىزدى ورتاق تانىمىن ونان ارى تياقتاندىرىپ، ”ءبىر بەلدەۋ، ءبىر جولدى“ بىرگە قۇرۋ باستاماسى مەن گرۋزيانىڭ ”ارالىق ءدالىز“ جوسپارىن ۇشتاستىرۋ اكەلگەن ورايدى مىقتى يگەرىپ، دوستىق اۋىس - كۇيىستى، بارىس - كەلىستى ۇزدىكسىز كەڭەيتىپ، ەكى جاقتىڭ ساۋدا، قاتىناس جانە زات اينالىمى، نەگىزدىك قۇرىلعىلار، قايتا تۋىندايتىن ەنەرگيا، عىلىم - تەحنيكا، وقۋ - اعارتۋ، گۋمانيتارلىق ىستەر سياقتى سالالارداعى سەلبەستىكتى ونان ارى تەرەڭدەتۋدى ءۇمىت ەتەمىز.
گرۋزيا تۇڭعىش توپتا جۇڭگومەن ”ءبىر بەلدەۋ، ءبىر جول“ سەلبەستىگى ەسكەرتپە حاتىنا قول قويىسقان مەملەكەت، العاشقى بولىپ ۇكىمەت اتىنان ”ءبىر بەلدەۋ، ءبىر جول“ تالقى مىنبەرىن وتكىزدى. بيىل 7 - ايدا ەكى ەل قارىم - قاتىناسى ستراتەگيالىق سەرىكتەستىك قارىم - قاتىناس دەڭگەيىنە كوتەرىلىپ، جۇڭگو مەن گرۋزيا ەكى ەلدىڭ سەلبەستىگى تىڭ ورايعا يە بولدى.
اشىلۋ سالتىندا اۆتونوميالى رايوننىڭ ورىنباسار ءتوراعاسى قايسار ابدۇكەرىم ارناۋ ءسوز سويلەپ بىلاي دەدى: قازىر شينجياڭ جىبەك جولى ەكونوميكالىق بەلدەۋى وزەكتى رايونى قۇرىلىسىن زور كۇشپەن ىلگەرىلەتىپ، ازيا − ەۆروپا التىن ارناسى مەن باتىسقا ەسىك اشۋدىڭ الدىڭعى شەبىن بەلسەنە تۇلعالاۋدا. گرۋزيا − جۇڭگو شينجياڭ تاۋار كورمەسى قازىرگە دەيىن 8 كەزەك ءساتتى وتكىزىلىپ، جۇڭگو، گرۋزيا ەكى ەل كاسىپورىنشىلارىنىڭ كەڭ كولەمدە قۇپتاۋى مەن جاقسى باعاسىنا يە بولىپ، گرۋزيانىڭ شينجياڭدى تانىستىراتىن ايگىلى ماركا كورمەسىنە اينالدى. 9 - كەزەكتى گرۋزيا − جۇڭگو شينجياڭ تاۋار كورمەسى ارقىلى جۇڭگونىڭ شينجياڭى مەن گرۋزيانىڭ سەلبەستىگى اناعۇرلىم مول جەتىستىككە قول جەتكىزەتىنىنە سەنەمىز.
گرۋزيا مەملەكەتتىك ساۋدا - ونەركاسىپشىلەر قوعامى ساۋدانى وڭىرلىك دامىتۋ ءبولىمىنىڭ باستىعى گەورگي ۆەكۋا، گرۋزيا قورشاعان ورتانى قورعاۋ جانە اۋىل شارۋاشىلىعى مينيسترلىگىنىڭ ورىنباسار مينيسترى يۋري نوزادزە دە وسى رەتكى كورمەنىڭ اشىلۋ سالتىنا قاتىناستى ءارى ارناۋ ءسوز سويلەدى.
اشىلۋ سالتىندا جۇڭگونىڭ شينجياڭىنىڭ ءىشىنارا ايماق، وبلىس، قالالارى شينجياڭنىڭ قاۋىرت دامىعان ەكونوميكالىق ورتاسى، باي دا الۋان ءتۇرلى باسىمدىققا يە بايلىعى، ”8 ءىرى كاسىپ سالاسى شوعىرى“ قۇرىلىسى سياقتىلاردى تانىستىردى. ەكى جاقتىڭ كاسىپورىندارى وزدەرىنىڭ باسىمدىققا يە ونىمدەرى مەن باسىمدىققا يە سالالارىن ۇگىتتەدى، تانىستىردى.
9 - كەزەكتى گرۋزيا − جۇڭگو شينجياڭ تاۋار كورمەسى 3 كۇن اشىلادى، كورمەنى جۇڭگو حالىقارالىق ساۋدانى جەبەۋ كوميتەتىنىڭ شينجياڭ ۇيعۇر اۆتونوميالى رايوندىق كوميتەتى ۇيىمداستىردى. كورمەنىڭ جەر اۋدانى 2000 شارشى مەتر، ۇيىمداستىرۋشى جاق 7 ايماق، وبلىس، قالانىڭ ۋاكىلدەر ۇيىرمەسىن كورمەگە قاتىناسۋعا ۇيىمداستىردى، جوعارى، جاڭا تەحنيكا، ەمدەۋ، دەنساۋلىق قورعاۋ، ەنەرگيا، توقىماشىلىق ونىمدەرى مەن كيىم - كەشەك، اۋىل شارۋاشىلىق ونىمدەرى جانە ازىق - تۇلىك سياقتى 10 سالانى شارپىعان كاسىپورىندار كورمەگە قاتىناستى.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
