ول قورشاعان ورتا تازالىقشىلارى ءۇشىن 10 جىل بويى ۋادەسىندە تۇردى
□ انار بۇلت \ شينجياڭ گازەتىنىڭ ءتىلشىسى سو رۇڭجى
2023.12.05 16:29 كەلۋ قاينارى : شينجياڭ گازەتى
ولار − ءار تاڭ سايىن قالانى تاڭعى ۇيقىدان ەڭ ەرتە وياتۋشىلار، ءبىزدىڭ نازارىمىزداعى سۇيكىمدى قورشاعان ورتا تازالىقشىلارى. 12 - ايدىڭ 1 - كۇنى ساعات 7دە ءۇرىمجى ەكونوميكالىق، تەحنيكالىق اشۋ رايونىنىڭ (توۋتۇنحى رايونى) كوۋ - ان جولىندا قورشاعان ورتا تازالىقشىلارى ءبىر كۇندىك قىزمەتتەرىن باستادى.
وسى ساتتە كوۋ - ان جولىنداعى سارماي شايحاناسىندا مەسكەيدەن بۋ بۇرقىراپ، قازاننان جاڭادان قايناتىلعان اق شايدىڭ حوش ءيىسى اڭقىدى...
”اعا، اپەكەلەر، جىلدام دۇكەنگە كىرىپ وتىرىڭىزدار، ءىشى جىلى“! شايحانا قوجايىنى ءمىرىم مۇقامەتجان ولارمەن ىقىلاسپەن امانداستى، وتباسىنداعىلارمەن بىرگە ءاربىر قورشاعان ورتا تازالىقشىسىنا ءبىر تاباق قوي ەتى - پياز ءمانتىسى، ءبىر تالەڭكە تۋرالعان نان، ءبىر شىنى قارا كۇرىش كوجەسى نەمەسە اق شاي قۇيىپ بەردى، ونىڭ ۇستىنە تاعى ءبىرى ىستىق، ءبىرى سالقىن 2 قۋىرماش قوستى.
”تاڭەرتەڭنەن بەرى جول تازالاپ، راسىندا، قارنىم اشىپ كەتتى. بۋى بۇرقىراپ بويدى جىلىتاتىن تاڭعى استى جەۋدىڭ ءوزى نەدەگەن راحات دەسەڭىزشى“! اس ۇستەلىن قورالانا وتىرىپ، تازالىقشىلار ءماز - ءمايرام بولدى.
بۇل شايحانا قورشاعان ورتا تازالىقشىلارىن تاڭەرتەڭگى اسپەن تەگىن قامداۋعا تابانى كۇرەكتەي 10 جىل بويى تاباندى بولدى.
مۇنىڭ سەبەبىن ايتار بولساق، سوناۋ 2012 - جىلى قىستان باستاپ ءسوز قوزعاۋعا تۋرا كەلەدى.
ول ءبىر قاقاعان اياز كۇنگى تاڭ ءسارى بولاتىن، ءمىرىم جانە ونىڭ وتباسىنداعىلار اس ۇيدە تاڭەرتەڭگى استى دايىنداپ جاتقان بولاتىن، ول تەرەزەنىڭ سىرتىندا بىرنەشە تازالىقشىنىڭ جولدى تازالاپ جاتقانىن كوردى. ”نەتكەن ەرتە، ولار تاڭعى استارىن ىشپەي قىزمەتكە كىرىسىپ كەتكەن شىعار“. ءمىرىم شايحانادان شىعىپ، ولاردان تاڭعى اس ىشكەن - ىشپەگەندىكتەرىن سۇرادى. ”ەرتە تۇردىق، الدىمەن جول بەتىن تازالايمىز، قاربالاستىق اياقتاعان سوڭ بارىپ تاماقتانامىز“، - دەپ جاۋاپ بەردى تازالىقشىلار.
ولاردىڭ ءسوزىن ەستىگەن ءمىرىم جولدى تازالاپ بولعاننان كەيىن، ولاردى شايحاناعا تاڭەرتەڭگى استى ىشۋگە ۇسىنىس ەتۋدى ۇيعارادى.
ءبىرىنشى رەتتە شايحاناعا كىرگەن 5 تازالىقشى ءبىراز قىمسىنادى. ”ءوز ۇيلەرىڭدەي كورىڭدەر، مەنىڭ دە قارنىم اشتى، كەلىڭدەر، كەلىڭدەر، بىرگە تاماقتانايىق“. تاڭعى استى الىپ كەلىپ، ءمىرىم ولارمەن بىرگە جايعاسادى.
سول كۇننەن باستاپ قورشاعان ورتا تازالىقشىلارى ۇنەمى سارماي شايحاناسىنا كەلىپ تەگىن تاڭەرتەڭگى اس ىشەتىن بولدى. ۋاقىت ۇزارا كەلە، ولار الاڭداپ: ”كۇندە بىزگە تەگىن تاماق بەرىپ جاتىرسىز، ءمىرىم دۇكەنى اقشا تاپپاسا بولماس“ دەيدى! كوپشىلىك اقىلداسىپ، ەندى بۇل اراعا كەلمەۋگە بەكيدى.
”اقشاعا توياتتايتىن كەز بولا ما، سىزدەر قام جەمەي كەلە بەرسەڭىزدەر بولدى“. سونىمەن ءمىرىم مەن قورشاعان ورتا تازالىقشىلارى اراسىندا ءبىر اپتا ” تەكە تىرەس“ بولدى، سوڭىندا ەكى جاق ءبىر - بىرىنە جول بەردى، ءمىرىم ءار كۇنى كوپشىلىككە بوتقا نەمەسە اق شاي، سۋىق ساي بەرەتىن بولدى، نەگىزگى تاعامدى تازالىقشىلار وزدەرى اكەلىپ جەيتىن بولدى، ءمىرىم تاعى ءار ايدىڭ 1 - كۇنى، 15 - كۇندەرى ولاردى تاڭەرتەڭگى استى تەگىن جەۋگە ۇسىنىس ەتۋدى ورتاعا قويادى.
بۇل تابانى كۇرەكتەي 10 جىلعا جالعاستى. 2022 - جىلى دەنساۋلىق جاعدايى سەبەبىنەن ءمىرىم شايحاناسىن جاۋىپ، ءبىر جىل دەمالادى. بيىل شايحانانىڭ تيجاراتى قالپىنا كەلگەننەن كەيىن، ول تاڭەرتەڭگى استى ىشەتىن قورشاعان ورتا تازالىقشىلارىنىڭ اياعى سايابىرلاي باستاعاندىعىن بايقادى. ءاسىلى، بۇرىنعى ءبىر ءبولىم تازالىقشى باسقا تازالىق رايوندارىنا كەزەكپەن جۇمىس ىستەۋگە اۋىسىپ كەتكەن ەكەن دە، جاڭا كەلگەندەر ءمىرىم مەن كوپشىلىكتىڭ اراسىنداعى كەلىسىمنەن بەيحابار ەكەن.
ولاردى تاعى دا شاقىرامىن! العان بەتىنەن قايتپايتىن ءمىرىم جاڭادان كەلگەن تازالىقشىلاردى شايحاناعا تاعى دا ۇسىنىس ەتتى. ”ءمىرىم ءبىزدى قاتتى قۇرمەتتەيدى، شايحانادا ءبىز ەرەكشە جايلى سەزىنەمىز“، - دەدى تازالىقشى ۋاڭ جۇن.
وسى سۇيىسپەنشىلىكتىڭ ءجىبىن ۇزبەۋگە، ويداعىداي قورعاۋعا ءۇرىمجى ەكونوميكالىق اشۋ رايونى (توۋتۇنحى رايونى) جۇڭيا نانلۋ ءمالى باسقارماسى حايبين الەۋمەتتىك اۋماعى دا ات سالىستى. ولار ءۇرىمجى ەكونوميكالىق اشۋ رايونىنداعى (توۋتۇنحى رايونى) باس جۇمىسشى ۇيىمىمەن بىرلەسىپ، سارماي شايحاناسىن دالالىق ەڭبەكشىلەرگە قىزمەت وتەۋ پۋنكتىنە اينالدىرىپ، ميكروتولقىندى پەش، سۋ قايناتاتىن شاۋگىم، شۇعىل قۇتقارۋ ساندىعى سياقتىلاردى جەتكىزىپ بەردى.
قازىر سارماي شايحاناسى ۇرىمجىدە ”سۇيىسپەنشىلىك بەلگىسىنە“ اينالدى، سۇيىسپەنشىلىك جەتكىزۋشى كاسىپورىندار سيلاعان كۇرىش، ۇن، مايدى دا تاپسىرىپ الدى، حايبين الەۋمەتتىك اۋماعى دا ەرىكتىلەردى دۇكەنگە بارىپ ەرىكتى قىزمەت وتەۋگە جۇمىلدىردى.
”قالا ءۇشىن قاجىرلى ەڭبەك كورسەتكەن ەڭبەكشىلەر كوپشىلىكتىڭ قۇرمەتىنە جانە كوڭىل بولۋىنە، قامقورلىعىنا يە بولۋعا ءتيىس“! حايبين الەۋمەتتىك اۋماعى پارتكومىنىڭ شۋجيى سۋ لينا بىلاي دەدى: كوپتەگەن ساۋداگەر مىرىمنەن ىرىقتىلىقپەن ۇيرەندى، كوپشىلىك بولماشى قامقورلىقتىڭ ۇلكەن سۇيىسپەنشىلىككە اينالۋىن، دالالىق ەڭبەكشىلەرگە سۋىق بولسا جىلىناتىن، قارنى اشسا تاماقتاناتىن، شارشاسا دەمالاتىن جەر ازىرلەۋدى ءۇمىت ەتەدى.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
