شي جينپيڭ مەن ماكرون جۇڭگو - فرانسيا كاسىپورىنشىلار كوميتەتىنىڭ 6 - رەتكى ءماجىلىسىنىڭ جابىلۋ سالتىنا قاتىناستى ءارى ءسوز سويلەدى
2024.05.07 18:19 كەلۋ قاينارى : حالىق تورابى
سول جەر ۋاقىتى 5 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ پاريجدە فرانسيانىڭ زۇڭتۇڭى ماكرونمەن بىرگە جۇڭگو - فرانسيا كاسىپورىنشىلار كوميتەتىنىڭ 6 - رەتكى ءماجىلىسىنىڭ جابىلۋ سالتىنا قاتىناستى ءارى «بۇرىنعىعا مۇراگەر بولىپ، كەيىنگىگە جول اشىپ، جۇڭگو - فرانسيا سەلبەستىگىنىڭ جاڭا ءداۋىرىن قول ۇستاسا اشايىق» دەگەن تاقىرىپتا ماڭىزدى ءسوز سويلەدى. ەكى ەلدىڭ مەملەكەت باسشىلارى جۇڭگو - فرانسيا كاسىپورىنشىلارىنىڭ ۋاكىلدەرىمەن بىرگە سۋرەتكە ءتۇستى، ونان سوڭ تەاترحانانىڭ زالىنا بىرگە كىردى.
قىزۋ قول شاپالاق ءۇنى ىشىندە شي جينپيڭ ءسوز سويلەدى.
شي جينپيڭ مىنالاردى اتاپ كورسەتتى: بيىل — جۇڭگو مەن فرانسيانىڭ ديپلوماتيالىق قارىم - قاتىناس ورناتقانىنىڭ 60 جىلدىعى. 60 جىل جۇڭگونىڭ ءداستۇرلى كۇنتىزبەسىندە الپىستىق اينالىمنىڭ قايتالانۋى بولىپ، بۇرىنعىعا مۇراگەر بولىپ، كەيىنگىگە جول اشۋدى بىلدىرەدى. 60 جىلدان بەرى جۇڭگو مەن فرانسيا شىنايى دوستاردان بولدى. ەكى ەل دەربەس، ءوز - وزىنە قوجا بولۋ، ءوزارا ءتۇسىنىسۋ، بيىكتە تۇرىپ الىسقا كوز جىبەرۋ، ءوزارا پايدا جەتكىزىپ، تەڭ يگىلىككە كەنەلۋ سىندى ديپلوماتيالىق قارىم - قاتىناس ورناتۋ رۋحىن ۇستانىپ، تۇرلىشە وركەنيەتتىڭ، تۇرلىشە ءتۇزىمنىڭ، تۇرلىشە دامۋ دەڭگەيىندەگى ەلدەردىڭ ءوزارا تابىسقا جەتۋىنىڭ، بىرگە العا باسۋىنىڭ ۇلگىسىنە اينالدى. 60 جىلدان بەرى جۇڭگو مەن فرانسيا تەڭ يگىلىككە كەنەلەتىن سەرىكتەر بولدى. جۇڭگو فرانسيانىڭ ەۆروپا وداعىنان تىسقارى ءبىرىنشى ۇلكەن ساۋدا سەرىگىنە اينالدى، ەكى ەل ەكونوميكاسى ءبىر - بىرىمەن بىتە قايناسقان قۇدىرەتتى بىرگە جاساۋ قاتىناسىن قالىپتاستىردى.
شي جينپيڭ مىنالاردى باسا دارىپتەدى: جۇڭگو — شىعىس وركەنيەتىنىڭ ماڭىزدى ۋاكىلى، فرانسيا — باتىس وركەنيەتىنىڭ ماڭىزدى ۋاكىلى. جۇڭگو مەن فرانسيادا وڭىرلىك ساياسي قايشىلىق جوق، ءتۇبىرلى مۇددە قاقتىعىسى جوق، دەربەس، ءوز - وزىنە قوجايىن بولۋ سىندى رۋحاني ۇندەستىك بار، شۇعىلالى مادەنيەت ءبىرىن - ءبىرى باۋرايدى، ونان دا ماڭىزدىسى، مۇددەسى كەڭ ناقتى سەلبەستىك بار، ەكى جاقتى قارىم - قاتىناستى ويداعىداي دامىتپاۋعا سەبەبىمىز جوق. ادامزات دامۋىنىڭ جاڭا جول ايرىعىندا تۇرمىز، دۇنيە ءجۇزىنىڭ 100 جىلدىق وزگەرىس جاعدايى الدىندا، جۇڭگو جاق فرانسيا جاقپەن جان - جاقتى اۋىس - كۇيىستى، سەلبەستىكتى جيىلەتىپ، جۇڭگو - فرانسيا قارىم - قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتىپ، اناعۇرلىم زور تابىستارعا قول جەتكىزۋدى قالايدى.
بولاشاققا بەت العاندا، ءبىز فرانسيا جاقپەن بىرگە جۇڭگو مەن فرانسيانىڭ جاپپاي ستراتەگيالىق سەرىكتەستىك قارىم - قاتىناسىنىڭ ەكونوميكا - ساۋدا مازمۇنىن بايىتۋدى قالايمىز. جۇڭگو جاق فرانسيانى باستان - اياق الدىمەن ەسكەرەتىن جانە سەنىمدى سەلبەستىك سەرىگى دەپ قاراپ، ەكى جاقتى ەكونوميكا - ساۋدا قارىم - قاتىناسىنىڭ كەڭدىگى مەن تەرەڭدىگىن كەڭەيتۋگە، جاڭا سالا اشۋعا، جاڭا ۇلگى جاراتۋعا، جاڭا ارتۋ تۇيىندەرىن جەتىلدىرۋگە كۇش سالادى. جۇڭگو جاق ”فرانسيا ەگىس الاڭىنان جۇڭگونىڭ داستارقانىنا دەيىنگى“ تۇتاس تىزبەكتى جەدەل سايكەسۋ مەحانيزمىنەن ۇزدىكسىز بەلسەنە پايدالانىپ، ىرىمشىك، سۇرلەنگەن شۇجىق، ءجۇزىم شارابى سياقتى فرانسيانىڭ ءتىپتى دە كوپ ساپالى اۋىل شارۋاشىلىق ونىمدەرىن جۇڭگو بۇقاراسىنىڭ داستارقانىنا سالۋدى قالايدى. جۇڭگو جاق فرانسيا قاتارلى 12 ەل ازاماتتارىنىڭ جۇڭگوعا قىسقا مەرزىمدى ۆيزاسىز كەلۋ ساياساتىن 2025 - جىلدىڭ سوڭىنا دەيىن ۇزارتۋدى ۇيعاردى.
بولاشاققا بەت العاندا، ءبىز فرانسيا جاقپەن بىرگە جۇڭگو مەن ەۆروپانىڭ ءوزارا ءتيىمدى سەلبەستىگىن ىلگەرىلەتۋدى قالايمىز. جۇڭگو مەن ەۆروپا — كوپ ۇيەكتەنۋدى ىلگەرىلەتەتىن ەكى ۇلكەن كۇش، جاھاندانۋدى قولدايتىن ەكى ۇلكەن بازار، الۋان تۇرلىلىك باستاماسىن كوتەرىپ وتىرعان ەكى ۇلكەن وركەنيەت. ەكى جاق جان - جاقتى ستراتەگيالىق سەرىكتەستىك قارىم - قاتىناستىڭ دۇرىس ورنىندا تاباندى بولىپ، ساياسي سەنىمدىلىكتى ۇزدىكسىز كۇشەيتىپ، ەكونوميكا - ساۋدا ماسەلەسىن ساياسيلاندىرۋعا، يدەيالوگيالاندىرۋعا، جاپپاي حاۋىپسىزدىككە تىرەۋگە بىرگە قارسى تۇرۋى كەرەك. ەۆروپا جاقتىڭ جۇڭگو جاقپەن ءبىر باعىتتا ءجۇرىپ، تىلدەسۋ ارقىلى ءتۇسىنىسۋدى كۇشەيتىپ، سەلبەستىك ارقىلى الاۋىزدىقتاردى شەشىپ، ءوزارا سەنىمدىلىك ارقىلى حاۋىپ - قاتەردى جويىپ، جۇڭگو مەن ەۆروپانى ءبىر - ءبىرىنىڭ ەكونوميكا - ساۋدا سەلبەستىگىندەگى شەشۋشى سەرىگىنە، عىلىم - تەحنيكا سەلبەستىگىندەگى الدىمەن ەسكەرىلەتىن سەرىگىنە، كاسىپ تىزبەگى مەن قامداۋ تىزبەگى سەلبەستىگىنىڭ سەنىمدى سەرىگىنە اينالدىرۋدى ءۇمىت ەتەمىن. جۇڭگو جاق تەلەگراف، ەمدەۋ سياقتى قىزمەت وتەۋ كاسىبىنىڭ سىرتقا ەسىك اشۋىن دەربەس كەڭەيتىپ، بازاردى ونان ارى اشىق ۇستاپ، فرانسيا مەن ەۆروپا كاسىپورىندارىن قامتىعان ءار ەل كاسىپورىندارىنا اناعۇرلىم كوپ بازار ورايىن جاراتادى.
بولاشاققا بەت العاندا، ءبىز فرانسيا جاقپەن قول ۇستاسا وتىرىپ دۇنيە جۇزىلىك سايىستارعا توتەپ بەرۋدى قالايمىز. بۇگىنگى دۇنيەدە بەيبىتشىلىك قىزىل سيفرى، دامۋ قىزىل سيفرى، حاۋىپسىزدىك قىزىل سيفرى، جونگە سالۋ قىزىل سيفرى ارتپاسا ازايعان جوق. جۇڭگو مەن فرانسيا ەكەۋى دە — دەربەس، ءوز - وزىنە قوجايىن ءىرى ەلدەر جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلدەرى، جاۋاپكەرشىلىك پەن بورىشتى ارقالاپ، جۇڭگو - فرانسيا قارىم - قاتىناسىنىڭ ورنىقتىلىعى ارقىلى دۇنيە ءجۇزىنىڭ تۇراقسىزدىعىنا توتەپ بەرىپ، بىرلەسكەن مەملەكەتتەر ۇيىمىنداعى سايكەسۋدى كۇشەيتىپ، ناعىز كوپ جاقتىلىقتى امالياتتا ايگىلەپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋى مەن جالپىعا ءتيىمدى، سيىسىمدى ەكونوميكانىڭ جاھاندانۋىن جەبەۋى كەرەك.
شي جينپيڭ مىنالاردى باسا دارىپتەدى: قازىر جۇڭگو جوعارى دەڭگەيلى ەسىك اشۋ ارقىلى تەرەڭ قاتپارلى رەفورمانى جەبەپ، جوعارى ساپالى دامۋدى ىلگەرىلەتىپ، جاڭاشا وندىرگىش كۇشتەردى جەدەل دامىتۋدا. ءبىز رەفورمانى اناعۇرلىم جاپپاي تەرەڭدەتۋدىڭ كەلەلى شارالارىن جوسپارلاپ جانە اتقارىپ، تۇزىمدىك ەسىك اشۋدى ورنىقتى كەڭەيتىپ، بازارعا كىرۋ رۇقساتىن ونان ارى كەڭەيتىپ، شەتەل ساۋداگەرلەرىنىڭ قارجى قوسۋىنا رۇقسات ەتۋدىڭ شەكتەلگەن سالالار تىزىمدىگىن ازايتۋدامىز، بۇل فرانسيانى قامتىعان دۇنيە جۇزىندەگى ەلدەرگە اناعۇرلىم كەڭ بازار كەڭىستىگىن ازىرلەپ، اناعۇرلىم كوپ سەلبەسىپ تەڭ يگىلىككە كەنەلۋ ورايىن الا كەلەدى. فرانسيا كاسىپورىندارىنىڭ جۇڭگو ۇلگىسىندەگى وسىزامانداندىرۋ اياق الىسىنا بەلسەنە ات سالىسىپ، جۇڭگونىڭ دامۋ ورايىنان بىرگە يگىلىكتەنۋىن قارسى الامىز.
شي جينپيڭ بىلاي دەپ اتاپ كورسەتتى: ەندى 2 ايدان استام ۋاقىتتان كەيىن فرانسيا سالتاناتتى پاريج وليمپيادا سپورت جارىسىن قارسى الادى. وليمپيادا سپورت جارىسى — ىنتىماق پەن دوستىقتىڭ سيمۆولى، وركەنيەتتىڭ ءوزارا ۇلگى الۋىنىڭ جاۋھارى. ءبىز ديپلوماتيالىق قارىم - قاتىناس ورناتۋداعى اۋەلگى ماقساتتان جازباي، ءداستۇرلى دوستىقتى جالعاستىرىپ، ”اناعۇرلىم تەز، اناعۇرلىم جوعارى، اناعۇرلىم كۇشتى __ اناعۇرلىم ىنتىماقتى بولۋ“ سىندى وليمپيادا ءتالىمىن امالياتتا ايگىلەپ، جۇڭگو - فرانسيا سەلبەستىگىنىڭ جاڭا ءداۋىرىن قول ۇستاسا اشىپ، ادامزاتتىڭ تاعدىرلاس ورتاق تۇلعاسىنىڭ جاڭا تاراۋىن بىرگە جازايىق!
جۇڭگو، فرانسيا ەكى ەل ۇكىمەتتەرى، كاسىپورىندارى سياقتى ءار سالا ۋاكىلدەرىنەن 200 دەن استام ادام جابىلۋ سالتىنا قاتىناستى.
ساي چي، ۋاڭ ي جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
