ءۇش تالوننان بەيجيڭ، تيانجين، حىبەي كەدەنىنىڭ ”ءۇش وتكەلدى ءبىر وتكەلدەي ەتۋىنە“ نازار (وسىزامانداندىرۋدى كوزدەپ، رەفورمانى تاعى دا تەرەڭدەتۋ)

بەيجيڭ، تيانجين، حىبەيدىڭ كەدەننەن ءوتۋدى ءبىر تۇلعالاندىرۋ رەفورماسى ءۇش جەردىڭ كەدەنىن ءبىر وتكەلدەي كۇيگە كەلتىردى.

كاسىپورىن بەيجيڭ، تيانجين، حىبەي ءۇش جەردىڭ كەدەنىنىڭ ءارقانداي ءبىر جەرىندە رەسميات وتەسە، قالعان ەكى جەردەگى كەدەندە قايتالاپ رەسميات ءبىتىرۋىنىڭ قاجەتى جوق. كەدەن كاسىبىنە ساياتىن 3 كاسىپورىن تالونىنان رەفورمانىڭ ونىمدىلىگىن تىكە اڭعارۋعا بولادى.

ءبىرىنشى تالون − يمپورت ەتىلگەن زات اينالىمى ساندى مالىمەت تالونى.

بەيجيڭ ي – جۋاڭ، ۇساق بولشەك تيەگەن جۇك اۆتوموبيلى بەيجيڭ بىنچى اۆتوموبيل شەكتى سەرىكتەستىگىنىڭ ءوندىرىس بازاسىنا كىردى. يمپورت ەتىلگەن زات اينالىمى ساندى مالىمەت تالونىندا كورسەتىلۋىنشە، 3.5 ساعاتتىڭ الدىندا بۇل بولشەكتەر تيانجين پورتىنا جەتكىزىلگەن.

”جايشىلىقتا ۇساق بولشەكتەر كەمە جاعاسىنان اۆتوكولىككە تيەلىپ پورتتان شىققاننان ءوندىرىس جەلىسىنە كىرگەنگە دەيىن جارتى كۇنگە جەتپەيتىن ۋاقىت“. بەيجيڭ بىنچى زات اينالىمىنىڭ قاتىستى جاۋاپتىسى بىلاي دەپ تانىستىردى: ”كەمە جاعاسىندا تىكە كوتەرۋ“ ءتاسىلىنىڭ ارقاسىندا، قازىر كەمە جاعاعا جاقىن كەلىپ، زات اۆتوكولىككە شىعارىلادى، كەدەننەن ءوتۋ ۋاقىتى بۇرىنعىدان 3 كۇنگە تاياۋ تەزدەدى.

بۇرىن ”كەمە جاعاسىندا تىكە كوتەرۋ“ رەفورماسى تيانجيندەگى جەرگىلىكتى كاسىپورىندارعا عانا سىناق ەتىلەتىندىكتەن، بەيجيڭدەگى كاسىپورىندار بۇدان يگىلىكتەنبەيتىن، ”وتكەلدىڭ جۇمىس ءتارتىبى ۇزاق، كاسىپورىنداردىڭ كەدەننەن ءوتۋ وزىندىك قۇنى ءبىرشاما جوعارى بولاتىن“ دەدى تيانجين پورتىنىڭ قىزمەتكەرى تاڭ شۋەچۇن.

وزگەرىس بەيجيڭ، تيانجين، حىبەي 3 جەردەگى كەدەننىڭ ”توتە الىپ تىكە تيەۋ“ رەفورما شاراسىن ىلگەرىلەتۋدەن ءوزارا يگىلىكتەنۋىنەن كەلگەن. رەفورمادان كەيىن، بەيجيڭدەگى كاسىپورىندار سول جەردىڭ وزىندە ءوتىنىش بەرسە، تيانجيننىڭ، حىبەيدىڭ تەڭىز جاعالاۋىنداعى پورتتاردا ”تىكە جونەلتۋ“ قىزمەت وتەۋىنەن يگىلىكتەنە الادى.

رەفورمادا العاشقى جۇمىستار باستالدى، كاسىپورىنداردىڭ سۇرانىسى بارعان سايىن كۇشەيىپ كەلە جاتقان جەرلەردە بەيجيڭ، تيانجين، حىبەيدىڭ كەدەننەن وتۋىنە بارعان سايىن قولايلىلىق جاراتىلدى. ”بيىل الدىڭعى جارتى جىلدا ’توتە الىپ تىكە تيەۋ‘ رەفورماسى كەدەننەن ءوتۋ ۋاقىتىن ورتا ەسەپپەن 1.5 ساعاتقا قىسقارتتى“ دەپ تانىستىردى بەيجيڭ كەدەنى باقىلاپ – باسقارۋ باسقارماسى باستىعىنىڭ ورىنباسارى جاڭ حۇي.

ەكىنشى تالون − AEO كۋالىك قاعازى.

AEO كۋالىك قاعازى − كەدەننىڭ سەنىمدىلىك دارەجەسى ەڭ جوعارى كۋالاندىرۋى، كۋالاندىرىلعان كاسىپورىنداردىڭ تەكسەرۋدى ازايتۋ سياقتى قولايلى شارالاردان يگىلىكتەنۋىنە بولادى.

بۇرىن بەيجيڭ - تيانجين - حىبەي كەدەنى وڭىرلەر بويىنشا كاسىپورىنداردىڭ سەنىمدىلىك دارەجەسىن دارەجەگە، تۇرگە ءبولىپ باسقاراتىن، كاسىپورىندار جوعارى تولىمدىلىق سەنىمدىلىك دارەجەسىن كۋالاندىرۋدى تەك جەرگىلىكتى كەدەندەردە عانا ورىندايتىن. قازىر كەدەن حالىقارامەن ۇشتاسقان AEO كۋالاندىرۋ ءتۇزىمىن ورناتتى، ءۇش جەردەگى كەدەن كەدەن، رايون اتتاعان كۋالاندىرۋدا جاڭالىق اشىپ، ءبىر وتكەل باستاماشى بولاتىن، ەكى وتكەل سايكەسەتىن بىرلەسىپ كۋالاندىرۋ ۇلگىسىن ورناتتى.

بەيجيڭ داڭشىڭ ماتەريال عىلىم - تەحنيكا شەكتى جارنا سەرىكتەستىگى وسى رەفورمانىڭ پايداسىن كوردى. ليتي ەلەكترى وڭ ەلەكترود ماتەريالدارىن نەگىزگى تيجارات كاسىبى ەتكەن وسى كاسىپورىن شەتەلدەگى كاسىپتەردىڭ دامۋى تەز بولعاندىقتان، AEO كۋالىگىن ءوتىنىش ەتۋگە قاتتى قىزىعادى. شىڭشىڭ ماتەريالىنىڭ ءوتىنىشىن تاپسىرىپ العاننان كەيىن، بەيجيڭ كەدەنى ونىڭ ءوندىرىس بازاسىنىڭ حىبەيدە ەكەنىن ەسكەرىپ، شىجياجۋاڭ كەدەنىنە كەدەن، رايون اتتاعان بىرلەسىپ كۋالاندىرۋدى تاپسىردى.

”ءوندىرىس بازاسىنىڭ ماتەريالدارىن شىجياجۋاڭ كەدەنى تەكسەرەدى، ناتيجەدە بەيجيڭ كەدەنىنە توتە بەرىلەدى، ءبىز ەندىگارى كوپ جۇگىرمەيتىن بولدىق“. داڭشىڭ ماتەريال سەرىكتەستىگى باس ديرەكتورىنىڭ ورىنباسارى ۋاڭ شياۋميڭ بىلاي دەدى: ”وسى ’AEO‘ كۋالىگى بولعاندىقتان، سەرىكتەستىگىمىزدىڭ شەتەلدەردەن الاتىن تاپسىرىسى كوبەيدى، كەدەننەن ءوتۋ ۋاقىتى دا قىسقاردى“.

ءۇشىنشى تالون − كەدەن، رايون اتتاعان قورعامالى سالىق وڭىرىندە كورمەگە قويىپ ساتۋ ءوتىنىش قاعازى.

قورعامالى سالىق جارمەنكەسى − كاسىپورىننىڭ كەپىلدىك رەسمياتىن وتەگەننەن كەيىن، قورعامالى سالىق زاتىن قورعامالى سالىق رايونىنان تاسىپ شىعارىپ، كورمەگە قويۋ جانە ساۋدالاۋ سىندى تيجارات ءتاسىلى.

كەزىندە بەيجيڭ سىرتقى ساۋدا كاسىپورىندارى تيانجين، حىبەي ولكەلەرىندە قورعامالى سالىق بۇيىمدارىن كورمەگە قويۋ ساۋداسىن جۇرگىزىپ، قورعامالى سالىق تاۋارلارىن ءۇش جەردىڭ جالپىلىق قورعامالى سالىق رايونى ارقىلى ءار رەت جالپىلىق قورعامالى سالىق رايونى كەدەنىندە كەپىلدىك اقشا قويىپ ىستەيتىن. قازىر كاسىپورىندار بەيجيڭ كەدەنىندە ءبىر رەت ءوتىنىش بەرىپ، بەيجيڭ - تيانجين - حىبەيدە كەدەن، رايون اتتاعان قورعامالى سالىق ساۋداسىن ورىستەتە الاتىن بولدى.

رەفورمانىڭ ارقاسىندا ۋاڭفۋجيڭ سالىق الىنبايتىن بۇيىمدار سيفرلى بولشەك ساتۋ سەرىكتەستىگىندە تىڭ وزگەرىستەر تۋىلدى. ”قازىر سەرىكتەستىكتىڭ بەيجيڭ سىرتىنداعى تۇڭعىش دۇكەنى تيانجينگە ىرگە تەۋىپ، قورعامالى سالىق تاۋارلارىن وڭىردەن شىعارۋعا تەك ءبىر رەت قانا ءوتىنىش ەتۋ قاجەت بولدى، كاسىپورىننىڭ تولەي تۇراتىن قارجىسى ازايىپ، تيجاراتتىڭ ومىرشەڭدىگى اناعۇرلىم كۇشەيدى“. ۋاڭفۋجيڭ سالىق كەشىرىم ەتىلگەن بۇيىمدار سيفرلى بولشەك ساتۋ سەرىكتەستىگى زات اينالىمى جانە قامداۋ تىزبەگىنىڭ باس باقىلاۋشىسى جاڭ يۇي تانىستىرىپ بىلاي دەدى: تۇتىنۋشىلار دۇكەندە زاتتى كورىپ، تاپسىرىس بەرسە، تاۋار كەلەسى كۇنى جەتكىزىلە باستايدى.

ساۋدا − رەفورما جاساپ، ەسىك اشۋدى باقىلايتىن تەرەزە. 2014 - جىلى بەيجيڭ - تيانجين - حىبەي كەدەنىنىڭ ءبىر تۇلعالانۋ رەفورماسى اتقارىلعاننان بەرى بەيجيڭ - تيانجين - حىبەي ءوڭىرىنىڭ سىرتقى ساۋدا جالپى قۇنى 3 تريلليون 740 ميلليارد يۋاننان 2023 - جىلى 5 تريلليون 30 ميلليارد يۋانعا جەتتى.

بەيجيڭ كەدەنى پارتكومىنىڭ شۋجيى، كەدەن باستىعى جاڭ گىپيڭ مىنانى ءبىلدىردى: ”بەيجيڭ كەدەنى تيانجين، حىبەي ەكى جەردەگى كەدەنمەن قول ۇستاسىپ، كەدەن باس مەكەمەسىنىڭ بەيجيڭدى، تيانجيندى، حىبەيدى سايكەستىرە دامىتۋدى قولداۋ جونىندەگى ءتۇيىندى شارالارىن مۇقيات تياناقتاندىرىپ، ’ءۇش وتكەلدى ءبىر وتكەلدەي ەتۋ‘ سەلبەستىك جاعدايىن ۇزدىكسىز كەمەلدەندىرىپ، جۇڭگو ۇلگىسىندەگى وسىزامانداندىرۋ قۇرىلىسىنىڭ الدىمەن اتقارىلاتىن ءوڭىرىن، ۇلگى كورسەتۋ رايونىن قۇرۋعا دەم بەرەدى“.

كەلۋ قاينارى: حالىق تورابى