شينجياڭ جازعى ساياحات، ازىق ـ تۇلىك حاۋىپسىزدىگى تۇتىنۋ ەسكەرتۋىن جاريالادى

8 - ايدىڭ 8 – كۇنى، شينجياڭ ۇيعۇر اۆتونوميالى رايوندىق بازاردى باقىلاۋ - باسقارۋ مەكەمەسى جازعى ساياحات، ازىق - تۇلىك حاۋىپسىزدىگى تۇتىنۋ ەسكەرتۋىن جاريالاپ، جۇرتشىلىققا جازدا اۋا تەمپەراتۋراسى جوعارى بولعاندىقتان ازىق - تۇلىك وڭاي بۇزىلىپ، ساپاسى وزگەرەدى، سىرتقا شىعىپ ساياحاتتاعاندا، ازىق - تۇلىك حاۋىپسىزدىگىنە كوڭىل ءبولىپ، ءوز دەنساۋلىعىن ويداعىداي قورعاۋدى ەسكەرتتى.

بۇل ەسكەرتۋدە سىرتتان الدىرعان تاعامداردى ۇيلەسىمدى تاڭداۋ، الاڭسىز ورىنداردا تاماقتانۋدى تاڭداۋ، ازىق - تۇلىكتى عىلىمي تاڭداۋ سياقتى جاقتاردا ىقىلاستى ەسكەرتۋ بەردى.

سىرتتان الدىرعان تاعامداردى ۇيلەسىمدى تاڭداۋ جاعىندا، ساياحاتتاۋ بارىسىندا مۇمكىندىگىنشە ساڭلاۋسىز قوراپتالعان ازىق - تۇلىكتەردى الىپ ءجۇرۋ، قورابىن اشقاننان كەيىن تاعامداردى تەز ارادا جەپ بولۋ؛ سۋىقتا ساقتاۋ، توڭازىتىپ ساقتاۋدى قاجەت ەتەتىن نەمەسە قالىپتى تەمپەراتۋرادا وڭاي بۇزىلاتىن تاعامداردى از الىپ ءجۇرۋ، الىپ جۇرمەۋ كەرەك، مىسالى، ءسۇرى ەت، كىلەگەيلى بالكۇلشە سياقتى تاعامدار؛ مۇمكىندىكتىڭ بارىنشا قۇمىراعا سۋ قۇيىپ الىپ، قۇبىر سۋىن تىكەلەي ىشۋدەن ساقتانىپ، سۋ ساپاسى سەبەبىنەن اسقازان - ىشەكتىڭ جايسىزدانۋىنان ساقتانۋ كەرەك.

الاڭسىز تاماقتاناتىن ورىنداردى تاڭداۋ جاعىندا، كۋالىگى تولىق، ازىق - تۇلىك حاۋىپسىزدىگىنىڭ ولشەم دارەجەسى ءبىرشاما جوعارى ورىنداردى تاڭداپ تاماقتانۋ كەرەك ءارى رەسمي تالون نەمەسە قولحات الىپ الۋ كەرەك. تازالىق شارت - جاعدايى ناشار، كۋالىكسىز جايماحانالاردان، جول جاعالاۋلارىنا تاماقتانباۋ كەرەك.

عىلىمي جولمەن ازىق تاڭداۋ جاعىندا، كوپشىلىك مۇمكىندىگىنشە شيكى، سۋىق تاعامداردى جەمەۋ، كورەر كوزگە قالىپسىز جانە پىسىرىلماعان كوكونىستەردى جەمەۋ؛ تۇزدالعان، ارالاستىرىلعان، سۋىق سايلەردى، ءتورت ماۋسىمدىق بۇرشاق، جابايى باكتەريا سياقتى حاۋىپ - قاتەرى جوعارى ازىق – تۇلىكتەردى بايقاپ جەۋ؛ ”عاجايىپ“، ”ءبىر ءتۇرلى ءدامى بار“ سياقتى ۇنەمى تۇتىنبايتىن جانە وڭاي اسىرە سەزىمتالداناتىن ازىقتىقتاردى جەمەۋ كەرەك، قارتتار، بالالار، جۇكتى ايەلدەر جانە اۋرۋعا قارسىلىق قۋاتى السىزدەر ءتىپتى دە نازار اۋدارۋ كەرەك.

ۇيلەسىمدى، اقاۋسىز ازىقتانۋ جاعىندا، تاماقتى تارتا جەۋ، تۇزدى، مايدى از تۇتىنۋ، ەتسىز تاعامداردى ارالاستىرىپ جەۋ، ەتتى – ەتسىز تاماقتى تەڭشەپ جەۋ، سەلليۋلوزا، ۆيتامين قۇرامى مول جاڭا كوكونىس، جەمىس - جيدەك سياقتى قاتىقسىز، اقاۋسىز تاعامداردى كوپ تۇتىنۋ، تاماقتى قالىپتان تىس كوپ جەۋدەن، اراقتى قالىپتان تىس ىشۋدەن، ءىشىپ - جەۋدىڭ رەتسىز بولۋىنان ساقتانۋ كەرەك. سيىر، قوي ەتىن كوپ تۇتىنعاننان كەيىن توڭازىتىلعان سۋسىندىقتاردى دەرەۋ ىشۋگە بولمايدى.

بۇدان سىرت، شينجياڭ ۇيعۇر اۆتونوميالى رايوندىق بازار باقىلاۋ ـ باسقارۋ مەكەمەسى تۇتىنۋشىلارعا ازىق ـ تۇلىك حاۋىپسىزدىگى ماسەلەسىن بايقاعاندا دەر كەزىندە 12315 كە حابارلاسىپ، ارىز ـ شاعىم ايتىپ، اشكەرەلەپ، وزدەرىنىڭ زاڭدى ۇقىق ـ مۇددەسىن قورعاۋدى ەسكەرتتى.

كەلۋ قاينارى: حالىق تورابى