وقۋ باستالا سالا شينجياڭنىڭ ءبىر جەرىندە وقۋشىلاردىڭ اتا – انالارىنان 8 ادام الدانىپ قالعان 

8 – ايدىڭ 26 – كۇنى، تەكەس اۋدانىنداعى ءمالىم ورتا مەكتەپتىڭ ءبىر كلاسىنىڭ شوعىرىندا الدامكوستەر كلاس جەتەكشىسىنىڭ اتىن جامىلىپ، ماتەريال قاراجاتىن جينايمىز دەگەن جەلەۋمەن وقۋشىلاردىڭ اتا – انالارىن الداعان، 6 ساعات ىشىندە اتا – انالاردان 8 ادام ولارعا اقشا جوتكەپ بەرگەن.

8 – ايدىڭ 26 – كۇنى ساعات 11 دە، تەكەس اۋداندىق الدامكوستىككە قارسى تۇرۋ ورتالىعى ءبىر وقىتۋشىنىڭ ساقشىعا مالىمدەۋىن تاپسىرىپ الادى. سول كۇنى تاڭ ءسارى ساعات 4 تە اتالعان اۋدانداعى ءمالىم ورتا مەكتەپتەگى اتا – انالاردىڭ ۋيشين شوعىرىنا كلاس جەتەكشىسىنىڭ اتىن جامىلعان بىرەۋ كىرىپ الىپ، ۋيشين شوعىرىندا ”مەكتەپ جاڭا وقۋ ماۋسىمىندا وقۋشىلارعا 100 يۋاندىق ماڭىزدى ماتەريالدار مەن ەلىكتەمەلى ەمتيحان قاعازدارىن ساتىپ الدى، قاراجات تاپسىرعان سوڭ، قاراجات تاپسىرعان بەتتىڭ سۋرەتىن شوعىرعا جولداڭىزدار“ دەگەن مازمۇندى جولدايدى.

8 – ايدىڭ 26 – كۇنى ساعات 7 دەن 23 مينۋت وتكەندە، اتا – انالاردىڭ بىرەۋى ”جالعان مۇعالىمعا“ اقشا جوتكەگەن سوڭ، ىلە – شالا تاعى 7 ادام اتالمىش ”ماتەريال اقىسىن“ تاپسىرادى.

كلاس جەتەكشىسى ليۋ مۇعالىم تاڭەرتەڭ ۇيقىسىنان ويانعان سوڭ شوعىرداعى جاعدايدى كورىپ اڭكى – تاڭكى بولىپ، مەكتەپ باسقارماسىمەن حابارلاسىپ انىقتاعان سوڭ، اتا – انالاردىڭ شوعىرداعى ”جالعان مۇعالىمعا“ الدانىپ قالعانىن بايقايدى.

سول كۇنى تاڭەرتەڭ ساعات 11 دە ليۋ مۇعالىم تەكەس اۋداندىق الدامكوستىككە قارسى تۇرۋ ورتالىعىنداعى حالىق ساقشىلارىنا تەلەفون سوعىپ، ولاردان كومەك سۇرايدى.

حالىق ساقشىلارى ليۋ مۇعالىمعا ۋيشين شوعىرىنداعى اتا – انالارعا اقشا جوتكەمەۋدى دەرەۋ ەسكەرتۋدى ايتادى.

قازىر بۇل دەلو تەكسەرىلۋ ۇستىندە.

كەلۋ قاينارى: حالىق تورابى