ماماندار ءۇش ءتۇرلى ادامداردىڭ دەر كەزىندە ۆاكسينا ەكتىرگەنى ءجون دەگەن ۇسىنىس بەرەدى 

بەيجيڭ گازەتىنىڭ ءتىلشىسى چاي رۇڭ حابارلايدى. 9 – ايدىڭ 7 – كۇنى — اق شىق امالى. مەملەكەتتىك دەنساۋلىق ساقتاۋ – سالاماتتىق كوميتەتى 9 – ايدىڭ 6 – كۇنى اقپار جاريالاۋ ءماجىلىسىن اشتى، ماماندار اق شىق امالىنان كەيىن تىنىس جولى اۋرۋلارى ءجيى تۋىلاتىنىن، ”قارتتار، بالالار، السىزدەر“ سىندى ءۇش ءتۇرلى توپتاعى ادامداردىڭ جۇقپالى تۇماۋدىڭ ۆاكسيناسى قاتارلى تىنىس جولى اۋرۋلارىنىڭ ۆاكسيناسىن دەر كەزىندە ەكتىرۋ كەرەك دەپ ۇسىنىس بەرەتىندىكتەرىن ايتقان.

جۇڭگو اۋرۋدان ساقتانۋ – تىزگىندەۋ ورتالىعى يممۋنيتەت پروگرامماسىنىڭ باس مامانى ۋاڭ حۋاچيڭنىڭ ايتۋىنشا، اق شىق امالىنان كەيىن كۇن سۋىتادى، ۆاكسينا ەكتىرۋ تىنىس جولى جۇقپالى اۋرۋلارىنان ساقتانۋداعى قولايلى دا ءونىمدى شارا سانالادى. ەڭ الدىمەن ”قارتتار، بالالار، السىزدەر“ سىندى ءۇش توپتاعىلاردىڭ ۆاكسينا ەكتىرگەنى ءجون، ”بالالار“ دەگەنىمىز 5 جاستان تومەنگى بالالاردى، وتە – موتە، سابيلەر مەن نارەستەلەردى كورسەتەدى؛ ”قارتتار“ دەگەنىمىز 60 جاستان اسقان قارتتاردى كورسەتەدى؛ ”السىزدەر“ دەگەنىمىز سوزىلمالى نەگىزدىك اۋرۋى بار ادامداردى كورسەتەدى.

بەيجيڭ ەمحاناسىنىڭ مەڭگەرۋشى شيپاگەرى لي يانميڭ بىلاي دەدى: اق شىق امالىنان كەيىن، كۇندىز بەن تۇنگى تەمپەراتۋرا پارقى بىرتىندەپ زورايادى، ەگەر دەر كەزىندە قالىڭ كيىم كيىنۋگە كوڭىل بولمەسە، وڭاي سۋىق ءتيىپ، تىنىس جولى جۇقپالى اۋرۋلارىنا شالدىعۋ حاۋپى ارتادى. ”كوكتەمدە تۇمشالانىپ، كۇزدە توڭ“ دەگەن ايتىلىم بارلىق ادامعا ۇيلەسە بەرمەيدى، وتە – موتە، قارتتار، نەگىزدىك اۋرۋى بار ادامدار قاتارلىلار تاڭەرتەڭ جانە كەشتە جىلى كيىنۋگە كوڭىل بولگەنى ءجون. سونىمەن بىرگە، جۇرتشىلىقتىڭ تاماشا تازالىق ادەتىن ساقتاۋى، سىرتقا شىققاندا ماسكى تاعۋى، بولمە ءىشىنىڭ اۋاسىن الماستىرىپ وتىرۋى، كۇندەلىكتى تۇرمىستا قولدىڭ تازالىعىن ويداعىداي ىستەۋى، قولدى ءجيى جۋۋى كەرەك.

كەلۋ قاينارى: حالىق تورابى