جىجياڭ ولكەلىك ساياسي كەڭەستىڭ بۇرىنعى ورىنباسار ءتوراعاسى جۋ سۇڭجيۋدىڭ پارا الۋ دەلوسىنا ءبىرىنشى سوت اشىلدى

شينحۋا اگەنتتىگىنىڭ 9 – ايدىڭ 6 – كۇنى نانچاڭنان بەرگەن حابارى. 9 – ايدىڭ 6 – كۇنى، جياڭشي ولكەسى گانجوۋ قالالىق ورتا دارەجەلى حالىق سوت مەكەمەسى جىجياڭ ولكەلىك ساياسي كەڭەستىڭ بۇرىنعى پارتگرۋپپا مۇشەسى، ورىنباسار ءتوراعاسى جۋ سۇڭجيۋدىڭ پارا الۋ دەلوسىنا ءبىرىنشى اشىق سوت اشتى.

گانجوۋ قالالىق حالىق پروكۋراتۋراسى بىلاي دەپ ايىپتادى: 2002 - جىلدان 2022 - جىلعا دەيىن ايىپكەر جۋ سۇڭجيۋ شاڭحاي اكتسيا ساۋدا ورنى پارتكومىنىڭ ورىنباسار شۋجيى، باس مەڭگەرۋشىسى، جۇڭگو باعالى قاعاز باقىلاۋ - باسقارۋ كوميتەتى پارتكومىنىڭ مۇشەسى، ءتوراعانىڭ كومەكشىسى، قوسىمشا تاراتۋدى باقىلاۋ – باسقارۋ ءبولىمىنىڭ مەڭگەرۋشىسى، جىجياڭ ولكەلىك ۇكىمەت پارتگرۋپپاسىنىڭ مۇشەسى، ورىنباسار ولكە باستىعى، جىجياڭ ولكەلىك ساياسي كەڭەس پارتگرۋپپاسىنىڭ مۇشەسى قاتارلى قىزمەت قولايلىلىعىنان پايدالانىپ، قاتىستى ورىندار مەن جەكەلەردىڭ سەرىكتەستىكتى بازارعا شىعارۋ، قارجى قۇراۋ قارىز اقشاسى، كاسىپورىن تيجاراتى سياقتى ىستەرىنە كومەك كورسەتىپ، تىكەلەي نەمەسە باسقالار ارقىلى زاڭسىز قابىلداعان مال - مۇلكى حالىق اقشاسىنا سىندىرعاندا جيىنى 105 ميلليون يۋاننان اسقان. پروكۋراتۋرا ورگانى پارا الۋ قىلمىسى بويىنشا جۋ سۇڭجيۋدىڭ قىلمىستىق ىستەر جاۋاپكەرشىلىگىن قۋزاستىرۋدى ۇسىنىس ەتتى.

سوتتا پروكۋراتۋرا ورگاندارى قاتىستى دالەل - سىپاتتاردى كورسەتتى، ايىپكەر جۋ سۇڭجيۋ مەن ونىڭ اقتاۋشىسى فاكت كورسەتتى، شاعىم ايتۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، جۋ سۇڭجيۋ سوڭعى ءسوزىن سويلەدى ءارى سوت ۇستىندە قىلمىسىن تانىپ، وكىنەتىندىگىن ءبىلدىردى.

ەڭ سوڭىندا سوت سوتتىڭ ءۇزىلىس جاساعانىن، سوت ۇكىمىن ارتىنان شىعاراتىندىعىن جاريالادى.

حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن جانە ءار سالا بۇقاراسىنان 40 نەشە ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى