شي جينپيڭ كامبودجانىڭ پاتشاسى سيحامونيمەن كەزدەستى

4 - ايدىڭ 17 - كۇنى تۇستەن كەيىن كامبودجانىڭ پاتشاسى سيحاموني جۇڭگونىڭ مەملەكەت ءتوراعاسى شي جينپيڭمەن پنومپەننىڭ پاتشا سارايىندا كەزدەسۋ وتكىزدى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

«حالىق گازەتى»، 4 - ايدىڭ 17 - كۇنى، پنومپەن (تىلشىلەر دۋ شاڭزى، جاڭ نيانشىڭ). 4 - ايدىڭ 17 - كۇنى تۇستەن كەيىن كامبودجانىڭ پاتشاسى سيحاموني جۇڭگونىڭ مەملەكەت ءتوراعاسى شي جينپيڭمەن پنومپەندەگى پاتشا سارايىندا كەزدەسۋ وتكىزدى.

شي جينپيڭ اۆتوكولىكپەن جەتكەن كەزدە سيحاموني اۆتوكولىكتەن تۇسەتىن جەردە ىستىق ىقىلاسپەن قارسى الدى.

قۇرمەت قاراۋىلى قىزىل كىلەمنىڭ ەكى جاعىندا ساپ تۇزەپ تۇردى.

شي جينپيڭ بىلاي دەپ اتاپ كورسەتتى: سيحاموني پاتشانىڭ تاققا وتىرعاندىعىنىڭ 20 جىلدىعى جانە كامبودجا كۇنتىزبەسى بويىنشا جاڭا جىل قارساڭىندا ۇسىنىس بويىنشا كوركەم كامبودجادا ساپاردا بولعانىما وتە قۋانىشتىمىن، كامبودجا حالقىنا جاڭا جىل بايلانىسىمەن باقىت تىلەيمىن. كامبودجانىڭ مەملەكەت قۇرىلىسى ىستەرى كۇن سايىن دامىپ، سيحاموني پاتشانىڭ قورعاۋىندا ەڭبەكشىل، پاراساتتى كامبودجا حالقىنىڭ، ءسوز جوق، مەملەكەتتى اناعۇرلىم گۇلدەندىرىپ، قۇدىرەتتەندىرەتىندىگىنە سەنەمىن.

شي جينپيڭ بىلاي دەپ اتاپ كورسەتتى: جۇڭگو مەن كامبودجانىڭ دوستىعى مىڭ جىلدان استى، ەكى ەل حالقى باستان - اياق قوس باعىتتا ىلگەرىلەپ، ءوزارا تابىسقا جەتتى. حالىقارالىق جاعداي قالاي وزگەرسە دە، جۇڭگو مەن كامبودجا ەكى ەل سەنىمنەن جازباي، ءبىر - بىرىنە قارايلاسىپ، ءبىر - ءبىرىنىڭ وزەكتى مۇددەسىنە ساياتىن جانە ءجىتى قاداعالاپ وتىرعان كەلەلى ماسەلەلەردە باستان - اياق ءبىر - ءبىرىن باتىل قولداپ، ۇلكەن - كىشى ەلدەردىڭ تەڭ تۇرعىدا مامىلە جاساۋىنىڭ، شىنايى ءوزارا سەنىم ارتۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىن ورناتتى. جۇڭگو مەن كامبودجا باستان - اياق ادامزاتتىڭ تاعدىرلاس ورتاق تۇلعاسىن قۇرۋدىڭ الدىڭعى لەگىندە ءجۇرىپ، كامبودجا حالقىنا ناقتى پايدا جەتكىزدى.

شي جينپيڭ بىلاي دەپ باسا دارىپتەدى: جۇڭگو جاق كامبودجانىڭ پاتشا اۋلەتىمەن دوستىعىن قاستەرلەيدى، كامبودجا پاتشا اۋلەتىنىڭ تالاي جىلدان بەرى جۇڭگو - كامبودجا دوستىق ىستەرىنە قوسقان ماڭىزدى ۇلەسىن جوعارى باعالايدى. جاڭا جاعدايدا جۇڭگو - كامبودجا ەكى جاق جۇڭگونىڭ اعا بۋىن باسشىلارى مەن سيحانوك پاتشا بىرگە سومداعان جۇڭگو مەن كامبودجانىڭ بۇلجىماس دوستىعىن قاستەرلەپ جانە جالعاستىرىپ، جۇڭگو - كامودجا تاعدىرلاس ورتاق تۇلعاسىنا جاڭا داۋىرلىك ءمان ۇستەپ، ءوز ەلدەرىنىڭ دامۋى مەن حالىقتىڭ باقىتىنا قىزمەت ەتىپ، توڭىرەكتىك تاعدىرلاس ورتاق تۇلعا قۇرۋعا، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە اناعۇرلىم زور ۇلەس قوسۋى كەرەك. جۇڭگو جاق كامبودجانىڭ ورنىقتىلىقتى ساقتاپ، دامۋدى جەدەلدەتىپ، حالىق تۇرمىسىن جاقسارتىپ، ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن جۇرۋىنە باتىل قولداۋ كورسەتەدى، جۇڭگو ۇلگىسىندەگى وسىزامانداندىرۋدىڭ كامبودجا سياقتى توڭىرەكتەگى ەلدەرگە اناعۇرلىم كوپ وراي اكەلەتىندىگىنە، جاڭا داۋىردەگى بارلىق جاعدايدا بىردەي جۇڭگو - كامبودجا تاعدىرلاس ورتاق تۇلعاسىن قۇرۋدىڭ، ءسوز جوق، ايبىندى داستانى جازىلاتىندىعىنا سەنەدى.

سيحاموني كامبودجا پاتشا اۋلەتى، كەڭەس پالاتاسى، ۇكىمەت جانە جالپى حالىق اتىنان ءتوراعا شي جينپيڭنىڭ ساپارلاي كەلگەندىگىن قىزۋ قارسى الدى. سيحاموني مىنالاردى ءبىلدىردى: كامبودجا مەن جۇڭگونىڭ دوستىعىن ەكى ەلدىڭ اعا بۋىن باسشىلارى وزدەرى ورناتقان جانە جەتىلدىرگەن، ەكى جاقتىڭ بىرگە قۇلشىنۋىندا، ءار سالاداعى سەلبەستىك كۇن سايىن جيىلەپ، تاعدىرلاس ورتاق تۇلعا قۇرىلىسى ۇزدىكسىز تەرەڭدەدى، اي سايىن العا باسىپ، جىل سايىن تابىسقا جەتتى دەۋگە بولادى.

كامبودجا جاق ءبىر جۇڭگو پرينسيبىن باتىل ۇستانادى، ءتوراعا شي جينپيڭ العا قويعان 3 ۇلكەن دۇنيە جۇزىلىك باستامانى ايرىقشا القايدى، ”ءبىر بەلدەۋ، ءبىر جولدى“ بىرگە قۇرۋ سەلبەستىگىنىڭ كامبودجاعا وراسان زور دامۋ ورايىن اكەلگەندىگىنە العىس ايتادى. ءتوراعا شي جينپيڭنىڭ وسى رەتكى ساپارى − ءبىر رەتكى تاريحي ساپار، ەكى ەلدىڭ بۇلجىماس دوستىعىن تەرەڭدەتىپ، ”گاۋھاردىڭ التى جاعى“ سەلبەستىك جۇلگەسىن تولىقتاپ، كامبودجا - جۇڭگو قارىم - قاتىناسىنىڭ تىڭ ساتىعا كوتەرىلۋىن ىلگەرىلەتەدى. كامبودجا دا جۇڭگومەن شىعىس وڭتۇستىك ازيا ەلدەرى وداعى - جۇڭگو سەلبەستىگى، لانساڭ وزەنى - مەكونگ وزەنى سەلبەستىگى سياقتى كوپ جاقتى مەحانيزمدەگى سايكەسۋدى كۇشەيتىپ، ءوڭىردىڭ بەيبىتشىلىگىن، ورنىقتىلىعىن، گۇلدەنۋىن بىرگە جەبەۋدى قالايدى.

سيحاموني شي جينپيڭگە ”كامبودجا پاتشالىعىنىڭ ۇلت تاۋەلسىزدىگى ۇلكەن القا وردەنىن“ تابىستادى.

سيحاموني مىنالاردى ءبىلدىردى: ءتوراعا شي جينپيڭنىڭ كامبودجاعا ەرەكشە دوستىق سۇيىسپەنشىلىگى بار، ول كامبودجا - جۇڭگو قارىم - قاتىناسىنىڭ دامۋىن ىلگەرىلەتۋگە كورنەكتى ۇلەس قوستى، كامبودجانىڭ ۇلى دوسى. ءتوراعا شي جينپيڭنىڭ باسشىلىعىندا، جۇڭگونىڭ اناعۇرلىم زور دامۋ جەتىستىكتەرىنە قول جەتكىزىپ، حالىقارالىق، وڭىرلىك ىستەردە اناعۇرلىم ماڭىزدى رول اتقاراتىندىعىنا سەنەمىن.

شي جينپيڭ مىنالاردى ءبىلدىردى: بۇل وردەن كامبودجانىڭ جۇڭگو - كامبودجا قارىم - قاتىناسىن دامىتۋعا ايرىقشا ءمان بەرەتىندىگىن تولىق ايگىلەپ، كامبودجا حالقىنىڭ جۇڭگو حالقىنا دەگەن تەرەڭ سۇيىسپەنشىلىگىن ارقالاپ وتىر. بۇل داڭق جەكە ماعان عانا ءتان ەمەس، جۇڭگو مەن كامبودجانىڭ دوستىعىنا ەڭبەكتەنىپ تەر توككەن دوس قايراتكەرلەرگە دە ءتان.

سول كۇنى كەشتە سيحاموني شي جينپيڭگە ارناپ قارسى الۋ قوناعاسىن بەردى.

ساي چي، ۋاڭ ي، ۋاڭ شياۋحۇڭ قاتارلىلار جوعارىداعى قيمىلدارعا قاتىناستى.

كەلۋ قاينارى: حالىق تورابى