شي جينپيڭ كورەيا زۇڭتۇڭى لي زايميڭمەن تەلەفوندا سويلەستى

شينحۋا اگەنتتىگىنىڭ 6 ـ ايدىڭ 10 ـ كۇنى بەيجيڭنەن بەرگەن حابارى. 6 ـ ايدىڭ 10 ـ كۇنى تۇستەن بۇرىن مەملەكەت ءتوراعاسى شي جينپيڭ كورەيا زۇڭتۇڭى لي زايميڭمەن تەلەفوندا سويلەستى.

شي جينپيڭ لي زايميڭنىڭ زۇڭتۇڭ بولىپ سايلانعاندىعىن تاعى ءبىر رەت قۇتتىقتادى. شي جينپيڭ بىلاي دەپ اتاپ كورسەتتى: جۇڭگو مەن كورەيا كوشىپ كەتپەيتىن جاقىن كورشى. ديپلوماتيالىق قارىم ـ قاتىناس ورناتقان 33 جىلدان بەرى، ەكى ەل يدەولوگيا جانە قوعامدىق ءتۇزىم پارقىنان اتتاپ ءوتىپ، ءار سالاداعى اۋىس ـ كۇيىستى، سەلبەستىكتى بەلسەنە ىلگەرىلەتىپ، ءبىر ـ ءبىرىن تابىسقا جەتكىزۋدى جانە بىرگە دامۋدى جۇزەگە اسىردى. اقاۋسىز، ورنىقتى، ءۇرتىس تەرەڭدەگەن جۇڭگو - كورەيا قارىم ـ قاتىناسى ءداۋىردىڭ دامۋ اعىمىنا ۇيلەسەدى، ەكى ەل حالقىنىڭ ءتۇبىرلى مۇددەسىنە ۇيلەسەدى ءارى ءوڭىردىڭ، ءتىپتى، دۇنيە ءجۇزىنىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە ءتيىمدى.

شي جينپيڭ بىلاي دەپ باسا دارىپتەدى: جۇڭگو مەن كورەيا ديپلوماتيالىق قارىم ـ قاتىناس ورناتۋ اۋەلگى ماقساتىنان مىزعىماي، تاتۋ كورشى، دوس بولۋ بەتالىسىنان بۇلجىماي، ءوزارا پايدا جەتكىزىپ تەڭ يگىلىككە كەنەلۋ نىساناسىنا تاباندى بولىپ، جۇڭگو - كورەيا ستراتەگيالىق سەلبەستىك سەرىكتەستىك قارىم ـ قاتىناسىنىڭ ءتىپتى دە جوعارى دەڭگەيگە قادام تاستاۋىن ىلگەرىلەتىپ، ەكى ەل حالقىنا اناعۇرلىم كوپ قۇت ـ ىرىس الا كەلۋى، وزگەرىس پەن بىلىقپالىق قاباتتاسقان وڭىرلىك جانە حالىقارالىق جاعدايعا اناعۇرلىم كوپ ايقىندىلىق ۇستەۋى كەرەك. ءار ساتىداعى، ءار سالاداعى اۋىس ـ كۇيىستى كۇشەيتىپ، ستراتەگيالىق ءوزارا سەنىمدىلىكتى ارتتىرۋى؛ ەكى جاقتى سەلبەستىكتى جانە كوپ جاقتى سايكەسۋدى جيىلەتىپ، كوپ جاقتىلىقتى جانە ەركىن ساۋدانى بىرگە قورعاپ، الەمدىك جانە وڭىرلىك كاسىپ سالاسى تىزبەگىنىڭ، قامداۋ تىزبەگىنىڭ ورنىقتى، ىركىلىسسىز بولۋىنا شىنايى كەپىلدىك ەتۋى؛ گۋمانيتارلىق اۋىس ـ كۇيىستى تەرەڭدەتىپ، ءوزارا تۇسىنىستىكتى ارتتىرىپ، حالىق تىلەگى نەگىزىن بەكەمدەپ، جۇڭگو - كورەيا دوستىعىن ەكى ەل حالقىنىڭ جۇرەگىندە تامىر تارتتىرۋى؛ ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە قۇرمەت ەتىپ، ەكى جاقتى قارىم ـ قاتىناس ۇلكەن بەتالىسىن مىقتى يگەرىپ، جۇڭگو مەن كورەيا قارىم ـ قاتىناسىنىڭ باستان ـ اياق دۇرىس ارنامەن العا قاراي دامۋىنا شىنايى كەپىلدىك ەتۋى كەرەك.

لي زايميڭ مۇنى قۇپتاپ مىنالاردى ءبىلدىردى: كورەيا مەن جۇڭگو جاعراپيالىق جاقتان ءبىر ـ بىرىنە جاقىن، قارىم ـ قاتىناس تاريحى ۇزاق، ەكونوميكا ـ ساۋدا، مادەنيەت بايلانىسى قويۋ. ءتوراعا شي جينپيڭنىڭ ەرەن باسشىلىعىندا، جۇڭگو ۇلى دامۋ تابىستارىنا قول جەتكىزدى، بۇل ادامدى سۇيىندىرەدى. مەن كورەيا - جۇڭگو قارىم ـ قاتىناسىنا باسا ءمان بەرەمىن، جۇڭگو جاقپەن بىرگە ەكى جاقتى تاتۋ كورشىلىك، دوستىق قارىم ـ قاتىناستىڭ تەرەڭدەي دامۋىن ىلگەرىلەتىپ، ەكى ەل حالقى اراسىنداعى سۇيىسپەنشىلىكتى جاقسارتىپ جانە كۇشەيتىپ، كورەيا - جۇڭگو سەلبەستىگىندە اناعۇرلىم مول جەتىستىكتەرگە قول جەتكىزۋدى قالايمىن.