لي چياڭ ەۆروپا ورتالىق بانكەسىنىڭ باستىعى لاگادپەن كەزدەستى

شينحۋا اگەنتتىگى، 6 - ايدىڭ 12 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 6 - ايدىڭ 12 - كۇنى تۇستەن كەيىن بەيجيڭدەگى حالىق سارايىندا ەۆروپا ورتالىق بانكەسىنىڭ باستىعى لاگادپەن كەزدەستى.

لي چياڭ بىلاي مىنالاردى ءبىلدىردى: قازىر جۇڭگو - ەۆروپا قارىم - قاتىناسى دۇنيە جۇزىندەگى ەڭ ماڭىزدى ەكى جاقتى قاتىناستىڭ بىرىنە اينالدى. بيىل − جۇڭگو مەن ەۆروپانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى. وتكەن ايدا ءتوراعا شي جينپيڭ كوستا توراعامەن، فون - دەر - ليايەنمەن ءوزارا قۇتتىقتاۋ تەلەگرامماسىن جولداپ، ەكى جاقتىڭ سەرىكتەستىك قارىم - قاتىناستى اناعۇرلىم تەرەڭدەتۋى جونىندە ستراتەگيالىق جەتەكشىلىك جاسادى. جۇڭگو - ەۆروپا قارىم - قاتىناسىنىڭ ءمانى − ءوزارا پايدا جەتكىزىپ، تەڭ يگىلىككە كەنەلۋ، ەكى جاقتىڭ سەلبەستىكتى كۇشەيتۋ − وبيەكتيۆ قاجەت جانە جالپى جاعدايدىڭ بەتالىسى. جۇڭگو جاق ەۆروپا وداعى جاقپەن بىرگە ۇزدىكسىز قۇلشىنىپ، ساياسي ءوزارا سەنىمدىلىكتى بەكەمدەپ، ناقتى ىستەر سەلبەستىگىن كەڭەيتىپ، دامۋدى، گۇلدەنۋدى بىرگە جەبەپ، ءبىر - ءبىرىن تابىسقا جەتكىزۋمەن بىرگە، دۇنيە جۇزىنە دە پايدا جەتكىزۋدى قالايدى.

لي چياڭ بىلاي دەپ اتاپ كورسەتتى: جۇڭگو مەن ەۆروپانىڭ ەكونوميكالىق ءوزارا تولىقتاۋ سيپاتى كۇشتى، جۇڭگو ەرەن كولەمدى بازار باسىمدىعىنا يە ءارى بازاردىڭ كومەسكى كۇشىن ۇزدىكسىز اشۋدا، جۇڭگو مەن ەۆروپانىڭ كوپتەگەن سالادا سەلبەستىك كومەسكى كۇشى زور. جۇڭگو جاق ەۆروپا وداعى جاقپەن بازاردى ۇلاستىرۋ جانە كاسىپ سالاسى سەلبەستىگىن كۇشەيتىپ، وزدەرىنىڭ دامۋىنا اناعۇرلىم كوپ قوزعاۋشى كۇش ۇستەۋدى قالايدى. قازىرگى ەكونوميكانىڭ جاھاندانۋى كەرى اعىسقا تاپ بولىپ وتىرعان جاعدايدا سەلبەستىك جاساعاندا عانا تەڭ يگىلىككە كەنەلۋگە بولادى. جۇڭگو مەن ەۆروپا ەكى ۇلكەن ەكونوميكالىق تۇلعا، ەكى ۇلكەن كۇش رەتىندە كوپ جاقتى سايكەسۋدى جيىلەتىپ، ەسىك اشۋ سەلبەستىگىن جەبەپ، دۇنيە ءجۇزى ەكونوميكاسىنىڭ قالپىنا كەلۋىن ىلگەرىلەتۋگە، دۇنيە جۇزىلىك جونگە سالۋدى كەمەلدەندىرۋگە اناعۇرلىم زور ۇلەس قوسۋى كەرەك. جۇڭگو جاق ەۆروپا ورتالىق بانكەسىمەن حالىقارالىق اقشا جۇيەسى رەفورماسى سياقتى جاقتاردا سەلبەستىكتى كۇشەيتۋدى قالايدى. بيىل جۇڭگو اناعۇرلىم بەلسەندى، ۇتىمدى ماكرولىق ساياساتتى اتقارىپ، كەرى پەريودتى رەتتەۋ تەبىنىن ارتتىرىپ، كوپ ءتۇرلى شارانى قاتار قولدانىپ، ىشكى سۇرانىمدى كەڭەيتىپ، تۇتىنۋدى سەرپىلتىپ، سىرتقى ءتيىمسىز فاكتورلاردىڭ ىقپالىنا توتەپ بەرە الادى. جۇڭگو ەسىك اشۋدى باتىل كەڭەيتىپ، ءار ەلمەن دامۋ ورايىنان بىرگە يگىلىكتەنەدى.

لاگاد مىنالاردى ءبىلدىردى: قازىرگى تۇراقسىزدىققا تولى حالىقارالىق جاعدايدا ەۆروپا مەن جۇڭگونىڭ جوعارى جىكتەگىلەرىنىڭ بارىس - كەلىسى مەن تىلدەسۋىن، سەلبەستىگىن ساقتاۋى توتەنشە ماڭىزدى.

ەۆروپا مەن جۇڭگونىڭ مۇددەسى ءوزارا توعىسقان، دۇنيە ءجۇزىنىڭ فينانس ورنىقتىلىعىن قورعاۋ، حالىقارالىق ساۋدانىڭ دامۋىن جەبەۋ سياقتى كوپتەگەن جاقتا ورتاق جاۋاپكەرشىلىك ارقالاپ وتىر. كەدەن باجىسى سوعىسى، ساۋدا سوعىسى تەك ەكى جاقتى زياندايدى، كوپ جاقتىلىققا تاباندى بولىپ، ەسىك اشۋ سەلبەستىگىن كۇشەيتۋ عانا دۇرىس تاڭداۋ بولماق. جۇڭگونىڭ تاياۋ جىلداردان بەرگى جاڭالىق اشا دامۋى مەن كاسىپورىندارىنىڭ باسەكەلىك قۋاتى ادامعا تەرەڭ اسەر قالدىردى. ەۆروپا ورتالىق بانكەسى جۇڭگو جاقپەن ورتالىق بانكە باستىقتارىنىڭ كەزدەسۋ مەحانيزمىن ورناتقانىنا ءارى تۇڭعىش رەتكى ءماجىلىسىن اشقانىنا قۋانادى، جۇڭگو جاقتىڭ فينانس قۇرىلىمدارىمەن تىلدەسۋدى، سايكەسۋدى كۇشەيتىپ، سەلبەستىك سالاسىن كەڭەيتىپ، تەرەڭدەتىپ، دۇنيە جۇزىلىك سىن - سايىسقا بىرگە توتەپ بەرىپ، دۇنيە جۇزىنە اناعۇرلىم كوپ ورنىقىلىق جانە تۇراقتىلىق ۇستەيدى.

كەلۋ قاينارى: حالىق تورابى