شي جينپيڭ 2 ـ كەزەكتى جۇڭگو - ورتا ازيا باسشىلار ماجىلىسىنە قاتىناسادى

شينحۋا اگەنتتىگىنىڭ 6 ـ ايدىڭ 13 ـ كۇنى بەيجيڭنەن بەرگەن حابارى. سىرتقى ىستەر مينيسترلىگىنىڭ مالىمدەمەشىسى 6 ـ ايدىڭ 13 ـ كۇنى مىنانى جاريالادى: قازاقستان رەسپۋبليكاسىنىڭ زۇڭتۇڭى توقايەۆتىڭ ۇسىنىسى بويىنشا، مەملەكەت ءتوراعاسى شي جينپيڭ 6 ـ ايدىڭ 16 ـ كۇنىنەن 18 ـ كۇنىنە دەيىن قازاقستاننىڭ استانا قالاسىنا بارىپ، 2 ـ كەزەكتى جۇڭگو - ورتا ازيا باسشىلار ماجىلىسىنە قاتىناسادى.

شينحۋا اگەنتتىگىنىڭ 6 ـ ايدىڭ 13 ـ كۇنى بەيجيڭنەن بەرگەن حابارى. قازاقستان رەسپۋبليكاسىنىڭ زۇڭتۇڭى توقايەۆتىڭ ۇسىنىسى بويىنشا، مەملەكەت ءتوراعاسى شي جينپيڭ 6 ـ ايدىڭ 16 ـ كۇنىنەن 18 ـ كۇنىنە دەيىن قازاقستاننىڭ استانا قالاسىنا بارىپ، 2 ـ كەزەكتى جۇڭگو - ورتا ازيا باسشىلار ماجىلىسىنە قاتىناسادى. سىرتقى ىستەر مينيسترلىگىنىڭ مالىمدەمەشىسى لين جيان 6 ـ ايدىڭ 13 ـ كۇنى كەزەكتى تىلشىلەر جينالىسىندا قاتىستى جاعدايلاردى تانىستىردى.

ءتىلشى: جۇڭگو جاق ءتوراعا شي جينپيڭنىڭ 2 ـ كەزەكتى جۇڭگو - ورتا ازيا باسشىلار ماجىلىسىنە قاتىناساتىندىعى جونىندەگى حاباردى جاريالادى، وسى رەتكى ساپاردىڭ باستى ورنالاستىرۋلارىن جانە جۇڭگو جاقتىڭ ءۇمىتىن تانىستىرا الاسىز با؟ ـ دەپ سۇرادى.

لين جيان بىلاي دەدى: جۇڭگو - ورتا ازيا مەحانيزمىن ورناتۋ جۇڭگونىڭ ورتا ازياداعى 5 ەلمەن ءبىر اۋىزدى شەشىمى، بۇل ءار جاقتىڭ ءوڭىردىڭ ورنىقتىلىعىن قورعاۋ، جوعارى ساپالى دامۋدى جۇزەگە اسىرۋ جونىندەگى ورتاق تىلەگىنە ۇيلەسەدى. 2023 ـ جىلى 5 ـ ايدا ءتوراعا شي جينپيڭ شي ـ اندا تۇڭعىش كەزەكتى جۇڭگو - ورتا ازيا باسشىلار ءماجىلىسىن ءساتتى باسقارىپ اشتى، جۇڭگونىڭ ورتا ازيا ەلدەرىمەن قارىم ـ قاتىناسى جاڭا داۋىرگە قادام تاستادى، ەكى جاقتىڭ سەلبەستىگى ۇزدىكسىز تەرەڭدەپ، ناقتىلانىپ، ءوڭىردىڭ دامۋىنا ۇزدىكسىز تىڭ قوزعاۋشى كۇش قوسىپ، ءار ەل بۇقاراسىنا ناقتى قولايلىلىق جانە پايدا جەتكىزدى.

ول بىلاي دەدى: وسى رەت جۇڭگو - ورتا ازيا باسشىلار ءماجىلىسى تۇڭعىش رەت ورتا ازيا ەلىندە وتكىزىلەدى. ءتوراعا شي جينپيڭ باسشىلار ماجىلىسىنە قاتىناسادى ءارى ارقاۋ ءسوز سويلەيدى، ماجىلىسكە قاتىناسقان ورتا ازيا ەلدەرىنىڭ باسشىلارىمەن جۇڭگو - ورتا ازيا مەحانيزمىنىڭ دامۋ تابىستارى، جۇلگە كولەمىندە ءوزارا پايدا جەتكىزىپ سەلبەستىك جاساۋ، سونداي ـ اق حالىقارالىق جانە وڭىرلىك قولامتالى ماسەلەلەر، ت. ب توڭىرەگىندە پىكىر اۋىستىرادى ءارى قاتىستى قيمىلدارعا بىرگە قاتىناسادى. باسشىلار ءماجىلىسى كەزىندە ءتوراعا شي جينپيڭ تاعى ورتا ازيا ەلدەرىنىڭ باسشىلارىمەن جەكە ـ جەكە كەڭەس وتكىزىپ، جۇڭگونىڭ ورتا ازياداعى 5 ەلمەن قارىم ـ قاتىناسىنىڭ دامۋى جونىندە جوعارى دەڭگەيلى جوبا جاسايدى.

”ءبىز وسى رەتكى باسشىلار ءماجىلىسى جۇڭگونىڭ ورتا ازياداعى 5 ەلمەن ءوزارا سەنىمدىلىك نەگىزىن اناعۇرلىم بەكەمدەپ، سەلبەستىك ورتاق تانىمىن ۇيىستىرىپ، ستراتەگيالىق ۇشتاسۋدى تەرەڭدەتىپ، ءار سالاداعى سەلبەستىكتىڭ ساپاسىن جوعارىلاتىپ، دارەجەسىن ءوسىرۋدى ىلگەرىلەتىپ، اناعۇرلىم بەرىك جۇڭگو - ورتا ازيا تاعدىرلاس ورتاق تۇلعاسىن قۇرۋعا اناعۇرلىم كوپ وڭ ەنەرگيا قوساتىندىعىنا سەنەمىز“، ـ دەدى لين جيان.