شي جينپيڭ تونگانىڭ پاتشاسى تۋپۋ VI مەن كەزدەستى

11 - ايدىڭ 25 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن تونگانىڭ پاتشاسى تۋپۋ VI مەن كەزدەستى. سۋرەتتە: شي جينپيڭ مەن حانىمى پىڭ لييۋان تۋپۋ VI مەن جانە پاتشايىم ناناشيپاۋمەن بىرگە سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

11 - ايدىڭ 25 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن تونگانىڭ پاتشاسى تۋپۋ VI مەن كەزدەستى. سۋرەتتە: كەزدەسۋدەن بۇرىن شي جينپيڭ حالىق سارايىنىڭ سولتۇستىك زالىندا تۋپۋ VI نى قارسى الۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

شينحۋا اگەنتتىگى، 11 - ايدىڭ 25 - كۇنى، بەيجيڭ (ءتىلشى فىڭ شينران). 11 - ايدىڭ 25 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن تونگانىڭ پاتشاسى تۋپۋ VI مەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن تونگا − بوران - شاشىندى باستان كەشىرگەن، تار جول، تايعاق كەشۋلەردى بىرگە وتكەرگەن ناعىز دوستار، ەكى ەلدىڭ دوستىعى ارىدان باستاۋ الادى. ديپلوماتيالىق قارىم - قاتىناس ورناتقاننان بەرى ەكى جاق باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىن باتىل قولداپ، ناقتى سەلبەستىكتە سۇبەلى تابىستارعا قول جەتكىزىپ، جالپى بەتتىك ستراتەگيالىق سەرىكتەستىك قارىم - قاتىناسى ۇزدىكسىز تەرەڭدەپ، تۇرلىشە قوعامدىق ءتۇزىمنىڭ، تۇرلىشە ۇلكەندى - كىشىلى ەلدەردىڭ دوستىق سەلبەستىگىنىڭ ۇلگىسىن ورناتتى. حالىقارالىق جاعداي قالاي وزگەرسە دە، جۇڭگو باستان - اياق تونگانىڭ سەنىمدى جاقسى سەرىگى، تونگانىڭ مەملەكەتتىڭ تاۋەلسىزدىگى مەن يەلىك ۇقىعىن قورعاۋىن باستان - اياق قولدايدى. جۇڭگو جاق تونگا جاقپەن دامۋ ستراتەگياسىن ۇشتاستىرۋدى كۇشەيتىپ، ساۋدا، قارجى قوسۋ، اۋىل شارۋاشىلىعى، بالىق شارۋاشىلىعى، نەگىزدىك قۇرىلعى، تازا ەنەرگيا، ەمدەۋ، دەنساۋلىق ساقتاۋ، ساياحات، كليمات وزگەرىسىنە توتەپ بەرۋ سياقتى جاقتارداعى سەلبەستىكتى كەڭەيتىپ، وقۋ - اعارتۋ، دەنە تاربيە، جاستار، اقپارات قۇرالدارى، جەرگىلىكتى ورىندار سياقتى سالالارداعى اۋىس - كۇيىستى كەڭەيتىپ، وڭتۇستىك - وڭتۇستىك سەلبەستىگى جۇلگەسىندە تونگانىڭ ەكونوميكالىق، قوعامدىق دامۋىنا ۇزدىكسىز كومەك كورسەتۋدى قالايدى. تونگانىڭ ءار سالا قايراتكەرلەرىنىڭ جۇڭگوعا كەلىپ ەكسكۋرسيالاپ، تەكسەرۋ جۇرگىزىپ، ەل باسقارۋ جانە دامۋ تاجىريبەلەرىن اۋىستىرۋدى كۇشەيتىپ، جۇڭگونى جان - جاقتى ءتۇسىنۋدى كۇشەيتۋىن قارسى الامىز.

شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى جۇڭگونىڭ الداعى 5 جىلداعى ەكونوميكالىق، قوعامدىق دامۋى جونىندە جوعارى دەڭگەيلى جوبا جانە ستراتەگيالىق جوبا جاسادى. جۇڭگو نازاردى جوعارى ساپالى دامۋعا شوعىرلاندىرىپ، رەفورمانى اناعۇرلىم جاپپاي تەرەڭدەتىپ، جوعارى دەڭگەيدەگى سىرتقا ەسىك اشۋدى كەڭەيتىپ، دۇنيە جۇزىندەگى ءار ەلمەن دامۋ ورايىنان بىرگە يگىلىكتەنەدى. جۇڭگو جاق ءتورت ءىرى دۇنيە جۇزىلىك باستامانى العا قويدى، بۇل دۇنيە جۇزىندەگى ءار ەلدىڭ دامۋدى بىرگە جوسپارلاپ، بەيبىتشىلىكتەن بىرگە يگىلىكتەنۋىن ىلگەرىلەتۋ ءۇشىن بولىپ وتىر. تونگا جاقپەن بىرگە ءتورت ءىرى دۇنيە جۇزىلىك باستامانى امالياتتا ايگىلەپ، ەكى ەل حالقىنا اناعۇرلىم تاماشا تۇرمىس جاراتىپ، جۇڭگو - تىنىق مۇحيتتاعى ارال ەلدەرىنىڭ تاعدىرلاس ورتاق تۇلعاسىن بىرگە قۇرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايمىز.

تۋپۋ VI مىنالاردى ءبىلدىردى: تونگا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسى باياندى دامىدى، جۇڭگونىڭ ۇزاق ۋاقىتتان بەرى تونگانىڭ ەكونوميكالىق، قوعامدىق دامۋىنا قالتقىسىز كومەك كورسەتكەنىنە العىس ايتامىن. تونگا جۇڭگومەن قارىم - قاتىناسىنا ايرىقشا ءمان بەرەدى، ءبىر جۇڭگو پرينسيبىنە تاباندى بولىپ، ءارقانداي فورماداعى ”تايۋان دەربەستىگىنە“ باتىل قارسى تۇرادى، جۇڭگو ۇكىمەتىنىڭ مەملەكەتتى بىرلىككە كەلتىرۋىن باتىل قولدايدى. تونگا جاق جۇڭگو جاقپەن ەكونوميكا - ساۋدا، اۋىل شارۋاشىلىعى، تازا ەنەرگيا، وقۋ - اعارتۋ، ەمدەۋ، قورشاعان ورتانى قورعاۋ سياقتى سالالارداعى سەلبەستىكتى كەڭەيتىپ، ەكى ەل قارىم - قاتىناسىنىڭ اناعۇرلىم كوپ ناقتى تابىستارعا قول جەتكىزۋىن ىلگەرىلەتۋدى قالايدى. تونگا جۇڭگونىڭ ءتوراعا شي جينپيڭنىڭ باسشىلىعىندا ۇلى تابىستارعا قول جەتكىزگەندىگىن قۇتتىقتايدى، جۇڭگو كوممۋنيستىك پارتياسىنىڭ ەل باسقارۋداعى تابىستى تاجىريبەلەرىن ۇيرەنۋدى ءۇمىت ەتەدى. تونگا ءتوراعا شي جينپيڭ العا قويعان ءتورت ءىرى دۇنيە جۇزىلىك باستامانى قولدايدى، جۇڭگو جاقپەن پىكىرلەسۋدى، سەلبەسۋدى كۇشەيتىپ، كليمات وزگەرىسى سياقتى دۇنيە جۇزىلىك سايىستارعا بىرگە توتەپ بەرۋدى قالايدى.

ساپار كەزىندە ەكى جاق «جۇڭحۋا حالىق رەسپۋبليكاسى مەن تونگا پاتشالىعىنىڭ بىرلەسكەن مالىمدەمەسىن» جاريالايدى.

كەزدەسۋدەن كەيىن ەكى ەلدىڭ مەملەكەت باسشىلارى ەكونوميكا - ساۋدا، ەمدەۋ، وقۋ - اعارتۋ، دامۋ سياقتى سالالارداعى كوپتەگەن سەلبەستىك قۇجاتىنا قول قويۋعا بىرگە كۋا بولدى.

كەزدەسۋدەن بۇرىن شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا تۋپۋ VI مەن پاتشايىم ناناشيپاۋعا ارناپ قارسى الۋ سالتىن وتكىزدى.

تيان - انمىن الاڭىندا 21 رەت قۇرمەت ساليۋتى اتىلىپ، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن تونگا ەلدەرىنىڭ مەملەكەت اندەرىن ورىندادى. تۋپۋ VI شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى تۇستە شي جينپيڭ مەن پىڭ لييۋان تۋپۋ VI مەن حانىمىنا ارناپ قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.