شىنجوۋ 22 - ءنومىرلى الەم كەمەسىن ۇشىرۋ مىندەتى تولىق تابىستى بولدى

«حالىق گازەتى»، 11 - ايدىڭ 25 - كۇنى، بەيجيڭ (ءتىلشى ليۋ شى - ياۋ). جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ حابارىنا قاراعاندا، بەيجيڭ ۋاقىتى 11 - ايدىڭ 25 - كۇنى ساعات 12 دەن 11 مينۋت وتكەندە، شىنجوۋ 22 - ءنومىرلى الەم كەمەسىن تيەگەن ۇزاق جورىق 2 - ءنومىرلى F 22 تاسىمال راكەتاسى جيۋچۋان جاساندى سەرىك ۇشىرۋ ورتالىعىندا وتالدىرىلىپ ۇشىرىلعان، شامامەن 10 مينۋتتان كەيىن الەم كەمەسى مەن راكەتا ءساتتى ءبولىنىپ، بەلگىلەنگەن وربيتاعا كىرگەن، وسىلايشا جۇڭگونىڭ عارىشقا ادام الىپ ۇشۋ ينجەنەرياسىنىڭ تۇڭعىش رەتكى شۇعىل ۇشىرۋ مىندەتى تولىق تابىستى بولدى.

شىنجوۋ 22 - ءنومىرلى الەم كەمەسى وربيتاعا كىرگەننەن كەيىن ءساتتى ورنالاستىرىلىپ، بەيجيڭ ۋاقىتى 11 - ايدىڭ 25 - كۇنى ساعات 15 تەن 50 مينۋت وتكەندە كەڭىستىك بەكەتى مەن وزەكتى كابينانىڭ الدىڭعى اۋزىمەن ءساتتى ءتۇيىلىستى. ءتۇيىلىسۋ اياقتاعاننان كەيىن شىنجوۋ 22 - ءنومىرلى الەم كەمەسى قۇرامانىڭ توقتاۋ بولەگىنە كىرەدى، كەيىن شىنجوۋ 21 - ءنومىرلى عارىشكەرلەر گرۋپپاسىنىڭ جەرگە قايتاتىن الەم كەمەسى بولادى.

قازىر شىنجوۋ 21 - ءنومىرلى عارىش كەمەسىندەگى عارىشكەرلەردىڭ وربيتاداعى جاعدايى جاقسى، جوسپار بويىنشا بەلگىلەنگەن قىزمەتتەردى ورىنداۋدا. شىنجوۋ 20 - ءنومىرلى الەم كەمەسى وربيتادا قالىپ قاتىستى سىناقتاردى ۇزدىكسىز ورىستەتەدى. شىنجوۋ 22 - ءنومىرلى الەم كەمەسىنە ادامسىز جاعدايدا، عارىش ازىق - تۇلىگى، عارىش ءدارى - دارمەگى، جاڭا جەمىس - جيدەك، كوكونىس، شىنجوۋ 20 - ءنومىرلى الەم كەمەسىنىڭ قابىرعا تەرەزەسىنە تۇسكەن سىزاتتى ءبىر جاقتى ەتۋ قۇرىلعىسى، سونداي - اق كەڭىستىك بەكەتىنە قاجەتتى زاپاس بۇيىمدار سياقتىلار تيەلگەن.