شي جينپيڭ شياڭگاڭ شينجيە داپۋ رايونىنداعى تۇرعىندار عيماراتىندا اۋىر ءورت اپاتى شىرعالاڭىندا قازا بولعاندارعا جانە قىزمەت ۇستىندە قۇربان بولعان ءورت وشىرۋشىلەرگە ازا ءبىلدىرىپ، قازا بولعانداردىڭ وتباسىنداعىلاردان جانە اپاتقا ۇشىراعانداردان حال سۇرادى

شينحۋا اگەنتتىگى، 11 - ايدىڭ 26 - كۇنى، بەيجيڭ. 11 - ايدىڭ 26 - كۇنى تۇستەن كەيىن شياڭگاڭ شينجيە داپۋ ۋسۇن - حۇڭفۋيۋان تۇرعىندار عيماراتىندا ءورت اپاتى تۋىلىپ، اۋىر ءولىم - ءجىتىم بولدى.

وقيعا تۋىلعاننان كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى چى جينپيڭ باسا ءمان بەرىپ، ءورت اپاتىنان قۇتقارۋ جانە ءولىم - ءجىتىم سياقتى احۋالداردى دەرەۋ ۇعىستى، ورتالىق ۇكىمەتتىڭ شياڭگاڭدا تۇراتىن بايلانىس كەڭسەسىنىڭ جاۋاپتىلارىنا، شياڭگاڭ ەرەكشە اكىمشىلىك رايونىنىڭ اكىمى لي جياچاۋعا ءوزىنىڭ قازا بولعاندارعا جانە قىزمەت ۇستىندە قۇربان بولعان ءورت وشىرۋشىلەرگە ازا ءبىلدىرۋ، قازا بولعانداردىڭ وتباسىنداعىلاردان جانە اپاتقا ۇشىراعانداردان حال سۇراۋ جونىندەگى نۇسقاۋىن بەرىپ، ورتالىق شياڭگاڭ، اۋمىن كەڭسەسىنەن، ورتالىق ۇكىمەتتىڭ شياڭگاڭدا تۇراتىن بايلانىس كەڭسەسىنەن شياڭگاڭ ەرەكشە اكىمشىلىك رايونى ۇكىمەتىنىڭ ءورتتى بار كۇشپەن وشىرۋىنە قولداۋ كورسەتىپ، ادامداردى ىزدەۋ، قۇتقارۋ، جارالىلاردى قۇتقارۋ، سوڭعى جۇمىستاردى ىڭعايلاستىرۋ، جۇباتۋ سياقتى قىزمەتتەردى امالدىڭ بارىنشا ويداعىداي ىستەۋىن، قاتىستى تاراۋلار مەن جەرگىلىكتى ورىنداردىڭ قاجەتتى كومەك بەرىپ، ءورت اپاتىنداعى ءولىم - ءجىتىم زيانىن ەڭ تومەنگى شەككە تۇسىرۋگە كۇش سالۋدى تالاپ ەتتى.

شياڭگاڭ ەرەكشە اكىمشىلىك رايونى ۇكىمەتى شۇعىل جاعدايعا توتەپ بەرۋ، قۇتقارۋ مەحانيزمىن ىسكە قوستى، ورتالىق ۇكىمەتتىڭ شياڭگاڭدا تۇراتىن بايلانىس كەڭسەسى شۇعىل جاعدايعا توتەپ بەرۋ ارناۋلى گرۋپپاسىن قۇرىپ، ەرەكشە اكىمشىلىك رايون ۇكىمەتىمەن تىعىز بايلانىس جاساپ، قۇتقارۋ قىزمەتىن ويداعىداي ىستەۋدى بار كۇشپەن قولدادى. قازىر قاتىستى قىزمەتتەر جۇرگىزىلۋدە.