بەيجيڭ مارافون جارىسىندا جاڭا رەكورد جاراتىلدى! 

10 – ايدىڭ 18 – كۇنى وتكىزىلگەن 2026 – جىلعى بەيجيڭ مارافون جارىسىندا، ەفيوپيالىق سپورتشىلار ەرلەر گرۋپپاسىنىڭ الدىڭعى ءۇش ورنىن يەلەدى ءارى تۇگەلدەي جارىستىڭ رەكوردىن جاڭالادى. وليمپيادا اعا جۇلدەگەرى تولا 2 ساعات 3 مينۋت 10 سەكۋندتىق ناتيجەمەن الدىمەن مارە سىزىعىنان ءوتىپ، بۇرىنعى جارىستاعى رەكوردتى 4 مينۋتقا جۋىق قىسقارتقان.

سۋرەتتە: 10 - ايدىڭ 18 – كۇنى، ەرلەر گرۋپپاسىنىڭ اعا جۇلدەگەرى ەفيوپيالىق سپورتشى تولا جارىستا مارە سىزىعىنان ءوتتى. سۋرەتتى شينحۋا اگەنتتىگىنىڭ ءتىلشىسى لو يۋان تۇسىرگەن

بەيجيڭ مارافون جارىسىنىڭ وسىدان بۇرىنعى جارىس رەكوردى 2019 – جىلى كەنيالىق سپورتشى زيسوريو جاراتقان 2 ساعات 7 مينۋت 6 سەكۋند بولاتىن. بيىل بەيجيڭ مارافون جارىسىندا ەرلەر گرۋپپاسىندا 2 - بولعان يدريس پەن 3 - بولعان گابريل جەكە – جەكە 2 ساعات 4 مينۋت 34 سەكۋند، 2 ساعات 5 مينۋت 10 سەكۋندتا جارىستى اياقتاتىپ، ولار دا بۇرىنعى جارىستىڭ رەكوردىن جاڭالاعان.

جۋىرداعى جىلداردان بەرى تولانىڭ باسەكەلىك كۇيى وتە جاقسى، جەكەلىك ەڭ جاقسى ناتيجەسى 2 ساعات 2 مينۋت 59 سەكۋند. 2022 – جىلى ورەگوندا وتكىزىلگەن دۇنيە جۇزىلىك جەڭىل اتلەتيكا جارىسىندا، ول 2 ساعات 5 مينۋت 36 سەكۋندتىق ناتيجەمەن اعا جۇلدەگەر بولعان ءارى جارىستىڭ رەكوردىن جاڭالاعان. 2024 – جىلعى پاريج وليمپياداسىندا تولا 2 ساعات 6 مينۋت 26 سەكۋندتىق ناتيجەمەن جۇلدەگەر بولۋمەن بىرگە وليمپيادالىق رەكوردتى جاڭالاعان.

سۋرەتتە: 10 – ايدىڭ 18 – كۇنى، ايەلدەر گرۋپپاسى بويىنشا اعا جۇلدەگەر بولعان ەفيوپيالىق سپورتشى گەناح (ورتادا)، 2 - ورىنعا يە بولعان جۇڭگولىق سپورتشى سىرىنسومۋ (سولدا) جانە 3 - ورىنعا يە بولعان جۇڭگولىق سپورتشى لۋ يىڭ سيلىق تاراتۋ سالتىندا بىرگە سۋرەتكە تۇسۋدە. سۋرەتتى شينحۋا اگەنتتىگىنىڭ ءتىلشىسى لو يۋان تۇسىرگەن

ەفيوپيالىق تاعى ءبىر سپورتشى گەناح 2 ساعات 20 مينۋت 36 سەكۋندتىق ناتيجەمەن ايەلدەر گرۋپپاسىندا اعا جۇلدەگەرلىكتى ءساتتى قورعادى. جۇڭگولىق سپورتشىلار سىرىنسومۋ مەن لۋ يىڭ جەكە – جەكە ايەلدەر گرۋپپاسىنىڭ 2 –، 3 – ورىندارىنا يە بولعان.

بيىلعى بەيجيڭ مارافون جارىسىنا 32 مىڭ ادام قاتىناسقان، تىزىمدەلگەن ادام سانى 265 مىڭ ادامنان اسقان، جارىس ەرلەر گرۋپپاسى جانە ايەلدەر گرۋپپاسى بويىنشا وتكىزىلگەن. جارىس باستالعان جەر تيان - انمىن الاڭى، اياقتاعان ورىن وليمپيك باقشاسىنىڭ وزەكتى رايونىنداعى كورىنىستىك كوشەسى، جارىس جولىنىڭ جالپى ۇزىندىعى 42.195 كيلومەتر.

كەلۋ قاينارى: حالىق تورابى