شينجياڭدا تاعى ءبىر حالىقارالىق جولاۋشى تاسىمالى بەكەتى اشىلدى 

انار بۇلت \ شينجياڭ گازەتىنىڭ ءتىلشىسى گو حۇڭلەي حابارلايدى. 9 – ايدىڭ 14 – كۇنى، ءۇرىمجى قۇرلىقتىق پورتى حالىقارالىق جولاۋشى تاسىمالى بەكەتى ىسكە قوسىلدى. بۇل شينجياڭدا تاعى ءبىر حالىقارالىق جولاۋشى تاسىمالى بەكەتىنىڭ ىسكە قوسىلعانىنان دەرەك بەرەدى، سونىمەن بىرگە، ءۇرىمجى قۇرلىقتىق پورتى حالىقارالىق جولاۋشى تاسىمالى بەكەتىنىڭ ىسكە قوسىلۋى جۇڭگو مەن كورشىلەس ەلدەر اراسىنداعى قوس باعىتتاعى بايلانىستى كۇشەيتەدى ءارى ءۇرىمجى حالىقارالىق قۇرلىقتىق پورت رايونىنىڭ جولاۋشى تاسىمالى مەن زات تاسىمالىن سايكەستىرە دامىتۋدى ىسكە اسىرۋىنا دەم بەرەدى.

سۋرەتتە: ءۇرىمجى قۇرلىقتىق پورتى حالىقارالىق جولاۋشى تاسىمالى بەكەتىندەگى حالىقارالىق ۇزاق جولدى جولاۋشى تاسىمالى اۆتوموبيلى. انار بۇلت \ شينجياڭ گازەتىنىڭ ءتىلشىسى گو حۇڭلەي فوتوسى

ءۇرىمجى قۇرلىقتىق پورتى حالىقارالىق جولاۋشى تاسىمالى بەكەتى شينجياڭ ەركىن ساۋدا سىناق رايونى ءۇرىمجى اۋماعىنداعى وزەكتى وڭىرگە ورنالاسقان، جۇڭگو – ەۆروپا كەزەكشى پويەزدەرىن (ءۇرىمجى) شوعىرلاندىرۋ ورتالىعىمەن، ءۇرىمجى كوپ ءتۇرلى فورماداعى بىرلەسكەن تاسىمال ورتالىعىمەن، ءۇرىمجى تەمىر جول وتكەلى جەدەل جولداما ورتالىعىمەن ىرگەلەس جاتادى، بەلەت ساتۋ زالى، اۆتوموبيل كۇتۋ زالى، اماندىق قورعاۋدى باسقارۋ ورتالىعى، جۇك جونەلتۋ ورتالىعى، بەكەتتەگى قىزمەت وتەۋ كەڭسەسى، سايكەستى ساۋدا رايونى قاتارلىلاردى قامتيدى، ساۋدا – ساتتىق، زات اينالىمى، ساياحاتتاۋ قاتارلى جاقتارداعى كليەنتتەردىڭ شەكارادان كىرىپ – شىعۋ بارىسىنداعى ءبىر بەكەتتىك فورماداعى قىزمەت وتەۋدەن يگىلىكتەنۋ قاجەتىن قاناعاتتاندىرادى.

ءۇرىمجى قۇرلىقتىق پورتى حالىقارالىق جولاۋشى تاسىمالى بەكەتىنىڭ جاۋاپتىسى ءاننا ءجۇرسىننىڭ تانىستىرۋىنشا، باستاپقى مەزگىلدە 4 جەلى اشىلادى، ولار: ءۇرىمجى – دۋلات – الماتى، ءۇرىمجى – قورعاس – الماتى، ءۇرىمجى – قورعاس – تالدىقورعان، ءۇرىمجى – جەمەنەي وتكەلى – وسكەمەن باعىتتارى، ءار كۇنى قوس باعىتتا ەكى كەزەك اۆتوموبيل قاتىنايدى، جولاۋشىلار پاسپورت پەن ازاماتتىق كۋالىكتەن پايدالانىپ ينتەرنەت ارقىلى نەمەسە ينتەرنەتتەن تىس ارنالار ارقىلى بەلەتتى قولايلى تۇردە ساتىپ الادى، بولاشاقتا جولاۋشىلاردىڭ قاجەتىنە قاراي جول جەلىسى مەن اۆتوموبيل سانىن ۇيلەسىمدى ارتتىرادى.

كەلۋ قاينارى: حالىق تورابى