جاۋ لىجي كامبودجا پارلامەنتىنىڭ ءتوراعاسى كۇنسوداليمەن كەڭەس وتكىزدى

شينحۋا اگەنتتىگى، 9 - ايدىڭ 23 – كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 9 - ايدىڭ 23 - كۇنى تۇستەن كەيىن حالىق سارايىندا كامبودجا پارلامەنتىنىڭ ءتوراعاسى كۇنسوداليمەن كەڭەس وتكىزدى.

جاۋ لىجي مىنانى ءبىلدىردى: جۇڭگو مەن كامبودجا − تار جول، تايعاق كەشۋلەردى بىرگە وتكەرگەن جاقسى دوستار، ءبىر - بىرىنە ادال جاقسى سەرىكتەر. ءتوراعا شي جينپيڭ مەن ەلدەرىڭىز باسشىلارىنىڭ ستراتەگيالىق جەتەكشىلىگىندە جۇڭگو - كامبودجا تاعدىرلاس ورتاق تۇلعا قۇرىلىسى جوعارى ساپالى، جوعارى دەڭگەيلى، جوعارى ولشەمدى جاڭا داۋىرگە ءوتتى. جۇڭگو جاق كامبودجا جاقپەن بىرگە، ەكى ەل باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ”گاۋھاردىڭ التى جاعى“ سەلبەستىك جۇلگەسىنىڭ مازمۇنىن ۇزدىكسىز تولىقتاپ، جۇڭگو - كامبودجا تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن ىلگەرىلەتىپ، ءوڭىردىڭ بەيبىتشىلىگى، ورنىقتىلىعى، گۇلدەنۋى، دامۋى ءۇشىن تىڭ ۇلەس قوسۋدى قالايدى.

جاۋ لىجي مىنانى ءبىلدىردى: جۇڭگو جاق كامبودجانى باستان - اياق توڭىرەكتىك ديپلوماتيانىڭ ەرەكشە ماڭىزدى ورنىنا قويىپ كەلەدى، كامبودجا جاقپەن جوعارى جىكتەگىلەردىڭ ستراتەگيالىق قارىم - قاتىناسىن ساقتاپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىر - ءبىرىن باتىل قولداۋدى قالايدى. دامۋ ستراتەگياسىن ۇشتاستىرۋدى جەدەلدەتىپ، جۇڭگو - كامبودجا تاعدىرلاس ورتاق تۇلعاسىن قۇرۋدىڭ جاڭا ارەكەت جوسپارىن ويداعىداي تياناقتاندىرىپ، ساياسي، ءوندىرىس قۋاتى، اۋىل شارۋاشىلىعى، ەنەرگيا، حاۋىپسىزدىك، گۋمانيتارلىق سىندى 6 ۇلكەن سالاداعى سەلبەستىكتى جاپپاي ىلگەرىلەتۋ كەرەك. بىرلەسكەن مەملەكەتتەر ۇيىمى، جۇڭگو - شىعىس وڭتۇستىك ازيا وداعى، لانساڭجياڭ وزەنى - مەكونگ وزەنى سەلبەستىگى سياقتى كوپ جاقتى تۇعىرلارداعى سايكەسۋدى، سەلبەسۋدى كۇشەيتىپ، شىنايى كوپ جاقتىلىقتى امالياتتا ايگىلەپ، جۇڭگو - شىعىس وڭتۇستىك ازيا ەلدەرى وداعىنىڭ بەيبىت، تىنىش، گۇلدەنگەن، كورىكتى، دوسجار مەكەنىن بىرگە قۇرىپ، وسى ءوڭىردىڭ وڭاي - وسپاق قولعا كەلمەگەن بەيبىتشىلىگى مەن ورنىقتىلىعىن بىرگە قورعاۋ كەرەك.

جاۋ لىجي مىنالاردى باسا دارىپتەدى: جۇڭگو مەن كامبودجانىڭ زاڭ شىعارۋ قۇرىلىمدارىنىڭ بارىس - كەلىسى جيىلەدى، بۇگىن ەكى جاق جۇڭگو مەملەكەتتىك حالىق قۇرىلتايى مەن كامبودجا پارلامەنتىنىڭ سەلبەستىك كەلىسىمىنە بىرگە قول قويىپ، ەكى جاقتىڭ سەلبەستىگىن تىڭ دەڭگەيگە كوتەردى. جۇڭگو مەملەكەتتىك حالىق قۇرىلتايى كامبودجانىڭ زاڭ شىعارۋ قۇرىلىمدارىمەن بىرگە قۇلشىنىپ، باعىتتامالى اۋىس - كۇيىس مەحانيزمىنىڭ رولىن ساۋلەلەندىرىپ، ارناۋلى كوميتەت، ەكى جاقتى دوستىق گرۋپپاسى، حالىق قۇرىلتايى ۋاكىلدەرى مەن پارلامەنت مۇشەلەرى، جەرگىلىكتى زاڭ شىعارۋ قۇرىلىمدارى اراسىنداعى سەلبەستىكتى ءبىر تۇتاس جوسپارلاپ ىلگەرىلەتىپ، زاڭ شىعارۋ، باقىلاۋ سياقتى قىزمەت تاجىريبەلەرىن اۋىستىرۋدى كۇشەيتىپ، ەكى ەلدىڭ ناقتى سەلبەستىگىن زاڭدىق كەپىلمەن قامداۋدى قالايدى. كوپ جاقتى پارلامەنت ۇيىمىنداعى سايكەستىكتى نىعايتىپ، وركەندەپ كەلە جاتقان ەلدەردىڭ مۇددەسىن بىرگە قورعاۋ كەرەك.

جاۋ لىجي حالىق قۇرىلتايى تۇزىمىنە قاتىستى جاعدايلاردى تانىستىردى. ول مىنانى ءبىلدىردى: جۇڭگو مەن كامبودجا ەكى ەل ءوز مەملەكەت جاعدايىنا ۇيلەسەتىن دەموكراتيالىق ساياسي ءتۇزىمدى تاڭدادى. ەكى جاقتىڭ زاڭ شىعارۋ قۇرىلىمدارىنىڭ دەموكراتيانى دامىتۋ، زاڭمەن باسقارۋدى اقاۋسىزداندىرۋ سياقتى جاقتاردا اۋىس - كۇيىستى، ءوزارا ۇلگى الۋدى كۇشەيتۋىنە بولادى.

كۇنسودالي مىنانى ءبىلدىردى: كامبودجا مەن جۇڭگو حالقىندا مىزعىماس باۋىرلاستىق دوستىق بار. كامبودجا ءبىر جۇڭگو پرينسيبىن باتىل اتقارادى، جۇڭگونىڭ ”ءبىر بەلدەۋ، ءبىر جول“ باستاماسىن جانە دۇنيە جۇزىلىك 3 ءىرى باستاماسىن بەلسەنە قولدايدى. كامبودجا پارلامەنتى جۇڭگو مەملەكەتتىك حالىق قۇرىلتايىمەن دوستىق بارىس ـ كەلىستى كۇشەيتىپ، ەكى ەل قارىم ـ قاتىناسىنىڭ دامۋىن جەبەۋگە، ەكونوميكا ـ ساۋدا، گۋمانيتارلىق سياقتى سالالارداعى ناقتى ىستەر سەلبەستىگىن ىلگەرىلەتۋگە، ءداستۇرلى دوستىقتى بەكەمدەۋگە بەلسەندى ۇلەس قوسۋدى قالايدى.

كەڭەستەن كەيىن جاۋ لىجي مەن كۇنسودالي جۇڭگو مەملەكەتتىك حالىق قۇرىلتايى مەن كامبودجا پارلامەنتىنىڭ سەلبەستىك كەلىسىمىنە قول قويدى.

شوكىرات زاكىر جوعارىداعى قيمىلدارعا قاتىناستى.

كەلۋ قاينارى: حالىق تورابى