ساپارداعى جۇڭگو 丨حىشيڭ قىستاعىنىڭ وزگەرىسى 

سۋرەتتە: جاسىل تاۋلار اراسىنداعى ۇيلەردىڭ قىزىل ءتۇستى توبەسى كوزگە وزگەشە اسەم كورىنەدى. حالىق تورابىنىڭ ءتىلشىسى مياۋ زىجيان فوتوسى

حالىق تورابىنىڭ تىلشىلەرى ۋاڭ رۇيحۋا، جاڭ جۇن، مياۋ زىجيان، چىن شي 5 – ايدىڭ 28 – كۇنى گۋاڭدىدان حابارلايدى. انحۇي ولكەسى گۋاڭدى قالاسى شينحاڭ قالاشىعى حىشيڭ قىستاعى انحۇي ولكەسى مەن جياڭسۋ ولكەسىنىڭ شەكارالاسقان جەرىنە ورنالاسقان، تيپتىك ىرگەلەس ولكەلەر اراسىنداعى قىستاق سانالادى.

الدىڭعى عاسىردىڭ 80 – جىلدارىنان باستاپ، مول تاس ماتەريالدارى بايلىعىنا ارقا سۇيەپ، تاس ماتەريالداردى مانەرلەۋ ءبىر مەزگىل قىستاقتىڭ جەتەكشى كاسىپ سالاسىنا اينالعان. تابىسىن تابيعاتتان تاپقان شاعىن قىستاقتا ەڭ كوپ بولعان كەزدە تاس ماتەريالدار مانەرلەيتىن شەبەرحانالاردان 37 شەبەرحانا شوعىرلى ورنالاسقان، وسى سالامەن شۇعىلداناتىنداردىڭ سانى 500 نەشە ادامعا جەتكەن.

بيىل 78 جاستاعى شياڭ شيۋيىڭ جارتى ءومىرىن وسى قىستاقتا وتكىزگەن، بۇرىنعى كەزدەگى جاعدايلاردى ەسكە تۇسىرگەن كەزدە، ول باسىن شايقاپ: ”شۋىل قاتتى، شاڭ – توزاڭ كوپ بولاتىن، ءۇيدىڭ تەرەزەسى جارىم كۇن جابىلماي قالسا، ءۇيدىڭ ءىشى شاڭ – توزاڭعا تولاتىن“ دەيدى.

گۋاڭدى قالاسى شينحى قالاشىعى حىشيڭ قىستاعى حالىققا قولايلى قىزمەت وتەۋ زالىنىڭ ورىنباسار مەڭگەرۋشىسى حى شىڭشان: ”بۇرىن تاۋدى اشىپ، تاس تەرۋ، شىنىمەن دە، قىستاقتىڭ ەكونوميكاسىنا ساۋلە شاشقان، الايدا، ەكولوگيالىق ورتاعا دا كولەڭكەسىن تۇسىرگەن“ دەپ جۇرەكتەگى ءسوزىن ايتتى، ول كەزدە ەكولوگيالىق ورتانى قالپىنا كەلتىرۋ كەزەك كۇتتىرمەيتىن مىندەتكە اينالعان.

2018 – جىلى گۋاڭدى قالاسى حىشيڭ قىستاعىنداعى تاس مانەرلەيتىن 30 نەشە شەبەرحانانى بۇكىلدەي توقتاتقان، ىلە – شالا، تاۋ بەتكەيلەرىندە قالعان ”داقتاردى“ جاسىل جامىلعىمەن كومكەرۋدى باستاپ، قىستاقتىڭ ەكولوگيالىق ورتاسى كۇننەن – كۇنگە جاقسارعان.

سونىمەن بىرگە، تەمىردى قىزۋىندا سوعىپ، جەرگىلىكتى جاعدايعا قاراي شامگۇل مەن كۇرەڭكەي ەگىپ، ”ەكى گۇل“ ەكونوميكاسىن دامىتقان، سونىمەن بىرگە، ساياحات سەرىكتەستىگىن قۇرعان ءارى قىزمەتتى سايكەستىرۋ ارقىلى ولكە شەكاراسىنداعى تاس جولعا قويىلعان اۆتوموبيلدەردىڭ بيىكتىگىن شەكتەيتىن باعانانى بيىكتەتكەن.

حى شىڭشان تەبىرەنگەن بەينەدە: ”بۇرىن تاس قازساق، قازىر ساياحاتپەن شۇعىلدانۋدامىز، قىستاعىمىزدا زور وزگەرىس بولدى“ دەيدى. قىستاق 2020 – جىلى تۇڭعىش كەزەكتى شامگۇل مەرەكەسىن ۇيىمداستىرعان، سول كۇنى 20 مىڭنان ارتىق ساياحاتشى كەلگەن، سول جىلى ”ەكى گۇلدەن“ تۇسكەن پايدا 600 مىڭ يۋاننان اسقان، مۇنداي تابىس بۇرىن قىستاقتاعىلاردىڭ ءۇش ۇيىقتاسا تۇسىنە كىرمەيتىن. قازىرگە دەيىن، حىشيڭ قىستاعى ساياحات ارقىلى 4 ميلليون يۋاننان استام كىرىس كىرگىزۋدى ىسكە اسىرعان.

جازعىتۇرىمعى جاڭبىر حىشيڭ قىستاعىنىڭ اۋاسىن تىپتەن تازارتتى. شيا شيۋيىڭنىڭ ءۇيىنىڭ ەكىنشى قاباتىنداعى سامالدىقتا تۇرىپ السىقا كوز تاستاساڭىز، تاۋلار ءبىر – بىرىمەن استاسىپ، جاسىل مانات جامىلىپ، تاۋ جىگىنىڭ پارقى ايقىن كورىنەدى، بۇرىنعىمەن سالىستىرعاندا وزگەرىس زور.

بۇگىنگى تاڭدا، تاۋ دا، قىستاق تا باياعى ءوز ورنىندا، ءبىراق، حىشيڭ قىستاعىنداعى تۇرعىندار ” تابىستى تابيعاتتان الۋدىڭ“ تىڭ جولىن تاپقان، ەكولوگيالىق ساياحاتتىڭ ”التىن ىدىسىن“ ۇستاعان.

كەلۋ قاينارى: حالىق تورابى