بەتتى ساقتاۋ | باس بەت ەتۋ
| حات ساندىعى
| حابارلاسىڭىز | ءبىز تۋرالى
جۇڭگو كوممۋنيستىك پارتياسى اقپارات تورابى
جۇڭگو كوممۋنيستىك پارتياسى اقپارات تورابى
جۇڭگو كوممۋنيستىك پارتياسى اقپارات تورابى
2025.06.12 16:37 كەلۋ قاينارى : حالىق تورابى
شينحۋا اگەنتتىگى، 6 - ايدىڭ 11 - كۇنى، چىڭدۋ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ 6 - ايدىڭ 11 - كۇنى تۇستەن بۇرىن چىڭدۋدا 2 - كەزەكتى ”ءبىر بەلدەۋ، ءبىر جول“ عىلىم - تەحنيكا اۋىس - كۇيىس جينالىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى.
ديڭ شۋەشياڭ مىنالاردى ءبىلدىردى: جۇڭگونىڭ مەملەكەت ءتوراعاسى شي جينپيڭ ”ءبىر بەلدەۋ، ءبىر جول“ عىلىم - تەحنيكا اۋىس - كۇيىسىنە، سەلبەستىگىنە ايرىقشا ءمان بەرىپ، ءبىرقىدىرۋ كەلەلى باستامالار مەن شارالاردى العا قويىپ، عىلىم - تەحنيكادا جاڭالىق اشۋ حالىقارالىق سەلبەستىگىن ىلگەرىلەتۋگە ماڭىزدى تياناق ازىرلەدى. جۇڭگو ءار جاقپەن بىرگە قۇلشىنىپ، ”ءبىر بەلدەۋ، ءبىر جول“ عىلىم - تەحنيكادا جاڭالىق اشۋ سەلبەستىك جوسپارىن ۇزدىكسىز اتقارىپ، عىلىم - تەحنيكا ”جۇرەكتەس كوپىرىن“ سالىپ، جاڭالىق اشۋدىڭ سەلبەستىك تورىن توقىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋعا قۋاتتى قوزعاۋشى كۇش ۇستەدى.
ديڭ شۋەشياڭ بىلاي دەپ باسا دارىپتەدى: جاڭا كەزەكتى عىلىم - تەحنيكا توڭكەرىسى مەن كاسىپ سالاسى وزگەرىسى ىشكەرىلەي دامىپ، ءىرى ساندى مالىمەت، بۇلتتىق ەسەپتەۋ، جاساندى زەردە سياقتى تەحنيكالار ەكونوميكالىق، قوعامدىق دامۋعا جاپپاي دەم بەرۋدە، الايدا تەحنيكا جىلعاسى، سيفر جىلعاسى، اقىل - پاراسات جىلعاسى ءالى دە كەڭەيىپ، كەيبىر زورەكەرلىك، وكتەمدىك ارەكەتى بۇكىل دۇنيە ءجۇزىنىڭ دامۋىنا وراسان زور كەدەرگى جاساۋدا. ءبىز ىنتىماقتى، سەلبەستىكتى كۇشەيتىپ، حالىقارالىق عىلىم - تەحنيكالىق سەلبەستىك باستاماسىن ىشكەرىلەي امالياتتا ايگىلەپ، جاڭالىق اشۋ ارقىلى دەم بەرەتىن، اشىق، سيىسىمدى، ءادىل، تۋراشىل، بىرگە گۇلدەنگەن، جالپىعا ءتيىمدى، باياندى ”ءبىر بەلدەۋ، ءبىر جول“ عىلىم - تەحنيكادا جاڭالىق اشۋ ورتاق تۇلعاسىن قۇرىپ، عىلىم - تەحنيكادا جاڭالىق اشۋدىڭ ادامزاتقا اناعۇرلىم جاقسى باقىت اكەلۋىن جەبەۋىمىز كەرەك.
ديڭ شۋەشياڭ 4 ءتۇرلى ۇسىنىستى ورتاعا قويدى: ءبىرىنشى، عىلىم - تەحنيكادا جاڭالىق اشۋدىڭ اشىق سەلبەستىگىن ونان ارى كۇشەيتىپ، ءوزارا پايدا جەتكىزىپ، تەڭ يگىلىككە كەنەلەتىن دۇنيە جۇزىلىك عىلىم - تەحنيكا سەلبەستىگىنىڭ جاڭا ۇلگىسىن بىرگە قاراستىرىپ، ءار ەلدىڭ قاتىستى عىلمي زەرتتەۋ قۇرىلىمدارىنىڭ، جوعارى مەكتەپتەرىنىڭ، كاسىپورىندارىنىڭ، اقىل - پاراسات قويمالارىنىڭ سەلبەستىك تورىن قۇرۋىنا قولداۋ كورسەتىپ، كەلەلى عىلىم - تەحنيكالىق قيىن ماسەلەلەردى قول ۇستاسا شەشۋ كەرەك. ەكىنشى، عىلىم - تەحنيكا جەتىستىكتەرىنەن جاپپاي يگىلىكتەنۋدى ونان ارى ىلگەرىلەتىپ، ”عىلىمدا مەملەكەت شەكاراسى بولماۋعا، بۇكىل ادامزاتقا پايدا جەتكىزۋگە“ تاباندى بولىپ، عىلىم - تەحنيكانىڭ قولجەتىمدىلىگىن بارىنشا جوعارىلاتىپ، ”ءبىر بەلدەۋ، ءبىر جول“ عىلىم - تەحنيكا ارقىلى كەدەيلەردى ازايتۋ جونىندەگى ارناۋلى سەلبەستىك جوسپارىن ويداعىداي اتقارىپ، عىلىم - تەحنيكادا جاڭالىق اشۋ جەتىستىكتەرىنىڭ ءار ەلگە، اسىرەسە، دۇنيە جۇزىندەگى وڭتۇستىك ەلدەرگە اناعۇرلىم ويداعىداي تيىمدىلىك جاساۋىنا مۇمكىندىك جاساۋ كەرەك. ءۇشىنشى، عىلىم - تەحنيكالىق، گۋمانيتارلىق اۋىس - كۇيىستى ونان ارى كەڭەيتىپ، جاڭالىق جاراتۋداعى سەرىكتەستىك قارىم - قاتىناستى كۇشەيتىپ، بارىس - كەلىس، ءوزارا ساپاردا بولۋ، ءوزارا وقۋشى جىبەرۋ، تەحنيكالىق كۋرس، عىلمي ءماجىلىس سياقتى كوپ ءتۇرلى فورماداعى اۋىس - كۇيىستى كەڭ كولەمدە ورىستەتىپ، عىلىم - تەحنيكا مەن وقۋ - اعارتۋ سەلبەستىگىنىڭ دوستىق دانەكەرىن بەكەمدەۋ كەرەك. ءتورتىنشى، دۇنيە جۇزىلىك عىلىم - تەحنيكانى جونگە سالۋ جۇيەسىن ونان ارى كەمەلدەندىرىپ، عىلىم - تەحنيكانىڭ دامۋى الا كەلۋى مۇمكىن بولعان ەرەجە قاقتىعىستارىنا، قوعامدىق حاۋىپ - قاتەرگە، ەتيكالىق سىن - سايىسقا ۇيلەسىمدى توتەپ بەرىپ، عىلىم - تەحنيكا سەلبەستىگىن جاپپاي ساياسيلاندىرۋعا، جاپپاي حاۋىپسىزدىك كاتەگورياسىنا ەنگىزۋگە قارسى تۇرىپ، عىلىم - تەحنيكادا جاڭالىق اشۋدىڭ باستان - اياق ادامزات وركەنيەتىنىڭ العا باسۋىنا ءتيىمدى باعىتقا قاراي دامۋىن ىلگەرىلەتۋ كەرەك.
يران زۇڭتۇڭىنىڭ ورىنباسارى افشين، وزبەكستان زۇڭليىنىڭ ءبىرىنشى ورىنباسارى راماتوۆ، سەربيا حالىقتىق پارلامەنتى باستىعىنىڭ ورىنباسارى لاگۋش اشىلۋ سالتىنا قاتىناستى ءارى ءسوز سويلەدى، بىرلەسكەن مەملەكەتتەر ۇيىمى باس حاتشىسىنىڭ تەحنيكالىق ەلشىسى گيلل بەينە ەكران ءسوزىن سويلەدى.
وسى كەزەكتى جينالىستى عىلىم - تەحنيكا مينيسترلىگى قاتارلى تاراۋلار مەن سىچۋان ولكەلىك حالىق ۇكىمەتى، چۇڭچيڭ قالالىق حالىق ۇكىمەتى بىرلەسىپ وتكىزدى. ەل ءىشى - سىرتىنداعى عىلىم - تەحنيكا قىزمەتكەرلەرى، كاسىپورىن جاۋاپتىلارى، ۇكىمەت ءمانساپتىلارى جانە حالىقارالىق ۇيىمداردىڭ ۋاكىلدەرى بولىپ 1500 دەي ادام اشىلۋ سالتىنا قاتىناستى.
كەلۋ قاينارى: حالىق تورابى
