اپاتتان قۇتقارۋعا كۇش ۇيىمداستىرۋدى مىقتى يگەرىپ، حالىق بۇقاراسىنىڭ باس اماندىعى مەن مال - مۇلىك حاۋىپسىزدىگىن شىنايى قامتاماسىز ەتۋدى تالاپ ەتتى

شينحۋا اگەنتتىگى، 9 ـ ايدىڭ 7 ـ كۇنى، بەيجيڭ. بيىلعى 11 ءنومىرلى ەرەكشە كۇشتى تايفىڭ داۋىلى ”موجيە“ 9 ـ ايدىڭ 6 ـ كۇنى ساعات 16 دان 20 مينۋت وتكەندە، ساعات 22 دەن 20 مينۋت وتكەندە ىلگەرىندى ـ كەيىندى حايناننىڭ ۋىنچاڭ قالاسىنان، گۋاڭدۇڭنىڭ شۇيۋىن اۋدانىنان قۇرلىققا شىعىپ، اۋىر اپات تۋدىرىپ، قىرۋار پايدالانۋشىنىڭ ەلەكتر، حابارلاسۋ تورابى ءۇزىلىپ، ءىشىنارا ۇيلەر قۇلادى. 9 - ايدىڭ 7 ـ كۇنى ساعات 12 گە دەيىن حاينان، گۋاڭدۇڭ، گۋاڭشي ولكە، رايوندارىنان ءبىر ميلليون 227 مىڭ ادام تۇرلىشە دارەجەدە اپاتقا ۇشىراپ، 3 ادام قازا بولىپ، 95 ادام جارالاندى.

اپات تۋىلعاننان كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ايرىقشا ءمان بەردى ءارى ماڭىزدى نۇسقاۋ بەرىپ بىلاي دەپ اتاپ كورسەتتى: ”موجيە“ ەرەكشە كۇشتى تايفىڭ داۋىلىنىڭ ىقپالىمەن حاينان، گۋاڭدۇڭ سياقتى جەرلەر اۋىر اپاتقا ۇشىراپ، ءولىم ـ ءجىتىم جانە اۋىر مال ـ مۇلىك شىعىنى تۋىلدى. اپات جاعدايىن انىقتاۋدى مىقتى يگەرىپ، اپاتتان قۇتقارۋعا كۇش ۇيىمداستىرىپ، اپاتقا ۇشىراعان بۇقارانى كوشىرۋ، ورنالاستىرۋ سياقتى قىزمەتتەردى ۇيلەسىمدى ىستەپ، قوسالقى اپاتتاردىڭ تۋىلۋىنان ساقتانىپ، ءولىم ـ ءجىتىمدى مۇمكىندىكتىڭ بارىنشا ازايتۋ كەرەك. بۇلىنگەن قاتىناس، ەلەكتر، حابارلاسۋ سياقتى نەگىزدىك قۇرىلعىلاردى تەز ارادا قالپىنا كەلتىرىپ، اپاتتان كەيىنگى قايتا قۇرۋدى بەلسەنە ورىستەتىپ، قالىپتى ءوندىرىس، تۇرمىس ءتارتىبىن ەرتەرەك قالپىنا كەلتىرىپ، حالىق بۇقاراسىنىڭ ءومىرى مەن مال ـ مۇلكىنىڭ حاۋىپسىزدىگىن شىنايى قامتاماسىز ەتۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ سالىپ بىلاي دەپ اتاپ كورسەتتى: مەملەكەتتىك تاسقىننان ساقتانۋ باس قولباسشىلىق شتابى مەن قاتىستى جەرلەر باس شۋجيدىڭ ماڭىزدى نۇسقاۋىنىڭ رۋحىن مۇقيات دايەكتىلەندىرىپ، تياناقتاندىرىپ، تايفىڭ داۋىلىنىڭ بەتالىسىن ءجىتى باقىلاپ، ءتۇرلى قورعانۋ شارالارىن تياناقتاندىرىپ، تۋىلۋى مۇمكىن بولعان اۋىر اپاتتاردان قاتاڭ ساقتانىپ، جوتكەۋ، قاتەردەن ساقتانۋ، ادامداردى ورنالاستىرۋ سياقتى اپاتتان قۇتقارۋ، كومەك بەرۋ قىزمەتتەرىن ۇيلەسىمدى ىستەپ، اپاتتىڭ ىقپالىن ەڭ زور دارەجەدە جەڭىلدەتۋ كەرەك.

شي جينپيڭنىڭ نۇسقاۋى مەن لي چياڭنىڭ تالابىنا ساي، مەملەكەتتىك تاسقىننان ساقتانۋ، قۋاڭشىلىققا قارسى اتتانۋ باس قولباسشىلىق شتابى قىزمەت گرۋپپاسىن حاينانن، گۋاڭدۇڭنىڭ ءبىرىنشى شەبىندەگى قۇتقارۋ - كومەك بەرۋ، ءبىر جاقتى ەتۋ قىزمەتىنە جەتەكشىلىك ەتۋگە جىبەردى، حاينان ولكەسى، گۋاڭدۇڭ ولكەسى كۇش ۇيىمداستىرىپ، قاتەردەن اراشالاۋ، اپاتتان قۇتقارۋ قىزمەتىن بار كۇشپەن ورىستەتىپ، بۇلىنگەن ەلەكتر، حابارلاسۋ سياقتى نەگىزدىك قۇرىلعىلاردى جەدەل جوندەپ، قالپىنا كەلتىرىپ، اپاتقا ۇشىراعان بۇقارانىڭ تۇرمىسىن قامتاماسىز ەتۋدى ۇيلەسىمدى ىستەدى. قازىر ءبىر ءبولىم تۇتىنۋشىلاردىڭ ەلەكتر، حابارلاسۋى قالپىنا كەلىپ، ءتۇرلى قىزمەتتەر ىستەلۋدە.

كەلۋ قاينارى: حالىق تورابى