شي جينپيڭ نورۆەگيانىڭ باس ءۋازىرى ستورەمەن كەزدەستى

9 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن نورۆەگيانىڭ باس ءۋازىرى ستورەمەن كەزدەستى.

سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن

شينحۋا اگەنتتىگى، 9 - ايدىڭ 9 – كۇنى، بەيجيڭ (ءتىلشى سۇن ي). 9 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن نورۆەگيانىڭ باس ءۋازىرى ستورەمەن كەزدەستى.

شي جينپيڭ ستورەگە حالار پاتشا Ⅴ كە سالەمىن جەتكىزۋدى تاپسىردى. شي جينپيڭ بىلاي دەپ اتاپ كورسەتتى: جۇڭگو مەن نورۆەگيا ديپلوماتيالىق قارىم - قاتناس ورناتقان 70 جىلدان بەرى ەكى ەل حالقى ءوزارا قۇرمەت ەتىپ، ءوزارا سيلاسىپ، ءوزارا ۇيرەنىپ، باعالى دوستىق ورناتتى. جۇڭگو مەن نورۆەگيانىڭ دوستىق سەلبەستىگىن ونان ارى دامىتۋ ەكى ەل حالقىنىڭ تىلەگىنە جانە ەكى ەلدىڭ ءتۇبىرلى مۇددەسىنە ۇيلەسەدى، سونداي - اق دۇنيە جۇزىندەگى ەلدەردىڭ اناعۇرلىم تىعىز بايلانىس ورناتىپ، بەينەت پەن زەينەتتى بىرگە وتكەرۋ جالپى جاعدايىنا دا ۇيلەسەدى. قازىر دۇنيە جۇزىندە 100 جىلدا بولماعان زور وزگەرىس جەدەل قۇبىلىپ، حالىقارالىق قوعامنىڭ دۇرىس تالعام جاساي الۋ - الماۋىن سىننان وتكىزۋدە. جۇڭگو بەيبىت دامۋ جولىمەن ۇزدىكسىز ءجۇرىپ، رەفورمانى ونان ارى جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ ارقىلى بىلىققان دۇنيە جۇزىنە ورنىقتىلىق، تۇراقتىلىق ۇستەپ، ءار ەلدىڭ بىرگە دامۋىنا اناعۇرلىم كوپ وراي جاراتادى. جۇڭگو جاق نورۆەگيا جاقپەن بىرگە جۇڭگو - نورۆەگيا دوستىق سەلبەستىگىنىڭ ۇزدىكسىز دامۋىن ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: جۇڭگو - نورۆەگيا قارىم قاتىناسىنىڭ 70 جىلدىق بارىسىنا قايىرىلا قاراساق، دوستىق پەن سەلبەستىك نەگىزگى اۋەن ەكەندىگىن انىق كورە الامىز. تاريحي تاجىريبەلەر بىزگە مىنانى ۇعىندىرادى: ەكى ەل قارىم - قاتىناسىنىڭ ورنىقتى، اقاۋسىز دامۋىن ساقتاۋدا، ەڭ ماڭىزدىسى، ءوزارا قۇرمەت ەتۋگە، پارىقتى ساقتاي ورتاقتىققا ۇمتىلۋعا تاباندى بولۋ كەرەك، بۇل ءبىر - ءبىرىنىڭ وزەكتى مۇددەسىنە قۇرمەت ەتۋدى، قارسى جاق كوڭىل ءبولىپ وتىرعان كەلەلى ىستەرگە كوڭىل ءبولۋدى قامتيدى. جۇڭگو مەن نورۆەگيا ەكونوميكاسىنىڭ ءوزارا تولىقتاۋ سيپاتى كۇشتى، ءار سالاداعى سەلبەستىگىنىڭ تابىسى مول. ەكى جاقتىڭ ءوز ابزالدىقتارىمەن ۇشتاستىرىپ، جاسىل دامۋ، ەكولوگيالىق ورتانى قورعاۋ، ەنەرگيا تۇتىنۋدا بۇرىلىس جاساۋ، تەڭىز ىستەرى، بالىق شارۋاشىلىعى ونىمدەرى، ەلەكترلى اۆتوموبيل سياقتى سالالارداعى ناقتى سەلبەستىكتى ۇزدىكسىز كەڭەيتىپ، وقۋ - اعارتۋ، عىلىم - تەحنيكا، مادەنيەت، ساياحات، قىسقى سپورت سياقتى سالالارداعى سەلبەستىكتى كۇشەيتىپ، ادامداردىڭ بارىس - كەلىسىن، اسىرەسە، جاستاردىڭ اۋىس - كۇيىسىن جيىلەتۋىنە بولادى. جۇڭگو مەن نورۆەگيا دۇنيە ءجۇزىنىڭ بەيبىتشىلىگى مەن حاۋىپسىزدىگىن قورعاۋ، كليمات وزگەرىسىنە توتەپ بەرۋ، ورگانيزمدەردىڭ الۋان تۇرلىلىگىن قورعاۋ سياقتى دۇنيە جۇزىلىك سىن - سايىس جاعىندا كەڭ كولەمدى ورتاق تانىمعا يە، جۇڭگو نورۆەگيامەن بىرلەسكەن مەملەكەتتەر ۇيىمى سياقتى كوپ جاقتى تۇعىردا بايلانىس جاساۋدى جانە سەلبەسۋدى كۇشەيتىپ، ناعىز كوپ جاقتىلىقتى امالياتتا ايگىلەپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋىن، ەكونوميكانىڭ جالپىعا ءتيىمدى، سيىسىمدى جاھاندانۋىن ىلگەرىلەتۋدى قالايدى. نورۆەگيا جاقتىڭ جۇڭگو - ەۆروپا قارىم - قاتىناسىنىڭ اقاۋسىز، ورنىقتى دامۋىن ىلگەرىلەتۋدە بەلسەندى رول اتقارۋىن ءۇمىت ەتەمىن.

ستورە پاتشا حالار Ⅴ تىڭ ءتوراعا شي جينپيڭگە ىقىلاستى سالەمىن جەتكىزىپ، مىنانى ءبىلدىردى: نورۆەگيا − جاڭا جۇڭگومەن ەڭ ەرتە ديپلوماتيالىق قارىم - قاتىناس ورناتقان سولتۇستىك ەۆروپا ەلدەرىنىڭ ءبىرى. نورۆەگيا مەن جۇڭگو ديپلوماتيالىق قارىم - قاتىناس ورناتقان 70 جىلدان بەرى ەكى ەل قارىم - قاتىناسىنىڭ دامۋى جاقسى بولدى، ەكى جاق ءوزارا قۇرمەت ەتۋ تاسىلىمەن كەڭەس جانە سەلبەستىك ورىستەتتى. نورۆەگيا جاق جۇڭگونىڭ يەلىك ۇقىعىنا قۇرمەت ەتەدى، ءبىر جۇڭگو ساياساتىنا تاباندى بولادى، ءبىر - ءبىرىنىڭ وزەكتى مۇددەسى مەن كوكەيتەستى قاداعالاپ وتىرعان كەلەلى ىستەردە ۇزدىكسىز قۇرمەت ەتىپ، ءوزارا ۇيرەنىپ ، اۋىس - كۇيىس جاساپ، ءوزارا ۇلگى الىپ، ءوزارا پايدا جەتكىزە وتىرىپ بىرگە يگىلىكتەنۋدى قالايدى. جۇڭگونىڭ دامۋى ومىرشەڭدىككە تولى ءارى ۇيرەنۋگە، ۇلگى الۋعا تاتيتىن كوپتەگەن تابىستى تاجىريبەسى با. نورۆەگيا جاق جۇڭگومەن سەلبەستىكتى، اسىرەسە، جاسىل دامۋ، كليمات وزگەرىسىنە توتەپ بەرۋ، تەڭىز ىستەرى، اۋىل شارۋاشىلىعى، بالىق - سۋ ونىمدەرى، جاڭا ەنەرگيالى اۆتوموبيل، جاساندى زەردە سياقتى سالالاردا سەلبەستىكتى كەڭەيتۋدى قالايدى. جۇڭگو بۇگىنگى دۇنيە ءجۇزى ءدوپ كەلىپ وتىرعان كوپتەگەن دۇنيە جۇزىلىك سايىستى شەشۋدە، حالىقارالىق بەيبىتشىلىك پەن حاۋىپسىزدىككە ساياتىن كەلەلى حالىقارالىق ماسەلەلەرگە توتەپ بەرۋدە ماڭىزدى رول اتقارۋدا. نورۆەگيا ەركىن ساۋدانى قولدايدى، جۇڭگو جاقپەن 20 ەل توبى سياقتى كوپ جاقتى جۇلگەدەگى قارىم - قاتىناس پەن سەلبەستىكتى كۇشەيتۋدى قالايدى، ەۆروپا مەن جۇڭگونىڭ سەلبەستىكتى كۇشەيتۋىن قولدايدى.

ەكى جاق ۋكراينا داعدارىسى سياقتى قولامتالى ماسەلەلەر جونىندە پىكىر الماستىردى. شي جينپيڭ بىلاي دەپ باسا دارىپتەدى: جۇڭگو داعدارىستى بەيبىت جولمەن شەشۋگە ءتيىمدى بارلىق قۇلشىنىسقا دەم بەرەدى جانە قولداۋ كورسەتەدى، تاتۋلىققا ءناسيحاتتاپ، كەلىسسوزدى جەبەۋگە ۇزدىكسىز تاباندى بولىپ، ۋكراينا داعدارىسىن ساياسي جولمەن شەشۋدى ىلگەرىلەتۋدە سىندارلى رول اتقارادى. ءار جاقتىڭ سۇحبات ارقىلى داعدارىستى ساياسي جولمەن شەشۋگە ءتيىمدى شارت - جاعداي ازىرلەۋىن ءۇمىت ەتەمىن.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى