شي جينپيڭ يسپانيانىڭ باس ءۋازىرى سانچەسپەن كەزدەستى

9 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن يسپانيانىڭ باس ءۋازىرى سانچەسپەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 9 - ايدىڭ 9 – كۇنى، بەيجيڭ (ءتىلشى سۇن ي). 9 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن يسپانيانىڭ باس ءۋازىرى سانچەسپەن كەزدەستى.

شي جينپيڭ سانچەسكە پاتشا فيليپ Ⅵ عا سالەمىن جەتكىزۋدى تاپسىردى. شي جينپيڭ بىلاي دەپ اتاپ كورسەتتى: بىلتىر جۇڭگو مەن يسپانيا ەكى ەل ديپلوماتيالىق قارىم - قاتىناس ورناتقاندىعىنىڭ 50 جىلدىعىن بىرگە قۇتتىقتادى. ءبىر جىلدان استام ۋاقىتتان بەرى ەكى جاق ءار جىكتەگىلەردىڭ ءجيى بارىس - كەلىسىن، ىقپالداستىعىن ساقتاپ، جاڭا سالاداعى سەلبەستىكتى جوعارى ساپامەن ىلگەرىلەتتى. كەلەر جىل − جۇڭگو مەن يسپانيانىڭ جاپپاي ستراتەگيالىق سەرىكتەستىك قاتىناس ورناتقاندىعىنىڭ 20 جىلدىعى. ەكى جاق ءوزارا قۇرمەت ەتەتىن، تەڭ تۇرعىدا مامىلە جاسايتىن ديپلوماتيالىق قارىم - قاتىناس ورناتۋ اۋەلگى ماقساتىنان جازباي، جالپى جاعدايدى كوكەيدە ساقتاپ، ۇزاق بولاشاقتى كوزدەپ، ەكى ەلدىڭ جاپپاي ستراتەگيالىق سەرىكتەستىك قارىم - قاتىناسىنىڭ داۋىرلىك ءمانىن ۇزدىكسىز بايىتىپ، ستراتەگيالىق تۇراقتىلىققا باي، ۇزاق ۋاقىت ورنىقتى بولاتىن جۇڭگو - يسپانيا قارىم - قاتىناسىن ورناتىپ، ەكى ەل قارىم - قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: رەفورما جاساپ، ەسىك اشۋ − جۇڭگونىڭ ۇزاق ۋاقىتتىق اماليات بارىسىندا تاپقان دۇرىس دامۋ جولى، الدا وسى جولمەن بۇلجىماستان جۇرە بەرەدى. جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ماجىلىسىندە رەفورمانى ونان ارى جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋگە جۇيەلى ورنالاستىرۋ جاسالدى، مۇنىڭءوزى جۇڭگو - يسپانيا ەلدەرىنىڭ سەلبەستىكتى تەرەڭدەتۋىنە جانە كەڭەيتۋىنە تىڭ وراي الا كەلەدى. ەكى جاق ەكونوميكا - ساۋدا ارالاسپا كوميتەتى، عىلىم - تەحنيكا بىرلەسكەن كوميتەتى سياقتى تۇعىرلاردىڭ رولىن ويداعىداي ساۋلەلەندىرىپ، جاساندى زەردە، سيفرلى ەكونوميكا، جاڭا ەنەرگيا سياقتى جوعارى تەحنيكا سالالارىندا دامۋدى بىرگە جەبەپ، ءوزارا پايدا جەتكىزە وتىرىپ بىرگە يگىلىكتەنۋدى جۇزەگە اسىرۋى كەرەك. يسپانيانىڭ جۇڭگو كاسىپورىندارىنىڭ يسپانياعا بارىپ قارجى قوسىپ كاسىپتى گۇلدەندىرۋىنە ءادىل، بارابار، حاۋىپسىز، كەمسىتپەيتىن شارۋاشىلىق- ساۋدا ورتاسىن ازىرلەۋىن ءۇمىت ەتەمىن. ەكى جاق سيىسىمدى بولۋعا، ءوزارا ۇلگى الۋعا تاباندى بولىپ، ءتىل وقىتۋى، جاستار ىستەرى، مادەنيەت، ساياحات سياقتى گۋمانيتارلىق اۋىس - كۇيىستى كۇشەيتىپ، حالىقتار دوستىعىن جەبەۋى كەرەك. جۇڭگو جاق يسپانيانىڭ بىلتىر سوڭعى جارىم جىلدا ەۆروپا وداعىنا كەزەكتى ءتوراعا ەل مىندەتىن وتەگەن كەزىندە جۇڭگو مەن ەۆروپانىڭ اۋىس - كۇيىسىن، سەلبەستىگىن بەلسەنە ىلگەرىلەتكەندىگىن القايدى. كەلەر جىل − جۇڭگونىڭ ەۆروپا وداعىمەن ديپلوماتيالىق قارىم - قاتىناس ورناتقاندىعىنىڭ 50 جىلدىعى، جۇڭگو جاق ەۆروپا وداعىمەن بىرگە ەكى جاقتى قارىم - قاتىناستى دامىتۋدىڭ تابىستى تاجىريبەلەرىن قورىتىندىلاپ، جۇڭگو - ەۆروپا قارىم - قاتىناسى دامۋىنىڭ دەربەس، ءوز - وزىنە قوجايىن بولۋ، ءوزارا تابىسقا جەتۋ، دۇنيە جۇزىنە باقىت جاراتۋ بەتالىسىمەن نىق قاداممەن العا باسۋىن ىلگەرىلەتۋدى قالايدى. يسپانيانىڭ بۇل جاعىندا ۇزدىكسىز سىندارلى رول اتقارۋىن ءۇمىت ەتەمىن.

شي جينپيڭ بىلاي دەپ اتاپ كورسەتتى: بۇگىنگى دۇنيە ءجۇزى اۋمالى - توكپەلى كۇيگە ءتۇستى، جۇڭگو مەن يسپانيا جاۋاپكەرشىلىك جانە بورىش تانىمى بار ەلدەر، ءار ەكەۋى دە كوپ جاقتىلىقتى جانە ەركىن ساۋدانى دارىپتەيدى. جۇڭگو جاق يسپانيامەن دۇنيە ءجۇزىنىڭ وڭتۇستىگىنە باعىتتالعان 3 - جاق بازار سەلبەستىگىن كەڭەيتىپ، بىرلەسكەن مەملەكەتتەر ۇيىمى، 20 ەل توبى سياقتى حالىقارالىق ۇيىمدارداعى تۇسىنىستىكتى، سايكەسۋدى كۇشەيتىپ، دۇنيە ءجۇزىنىڭ بەيبىتشىلىگى مەن ورنىقتىلىعىنا جانە ادامزاتتىڭ العا باسۋ ىستەرىنە اناعۇرلىم كوپ وڭ ەنەرگيا ۇستەۋدى قالايدى.

سانچەس پاتشا فيليپ Ⅵ نىڭ ءتوراعا شي جينپيڭگە ىقىلاستى سالەمىن جەتكىزىپ، مىنالاردى ءبىلدىردى: اراعا ءبىر جىل سالىپ جۇڭگوعا ساپارلاي كەلگەندىگىمە ايرىقشا قۋانىشتامىن، مۇنىڭ ءوزى يسپانيا – جۇڭگو قارىم - قاتىناسىنىڭ تىعىز ەكەنىن ايگىلەيدى. يسپانيا مەن جۇڭگونىڭ دوستىعى ارىدان باستاۋ العان، ەكى ەل ءوزارا قۇرمەت ەتۋ نەگىزىندە سەرىكتەستىك قارىم - قاتىناستى ۇزدىكسىز دامىتتى جانە تەرەڭدەتتى. وسى رەتكى ساپارىمدا ەكى جاق جاسىل دامۋ سياقتى سالالارداعى كوپ ءتۇرلى سەلبەستىك كەلىسىمىنە قول قويدى، مۇنىڭ ءوزى ەكى جاق سەلبەستىگىنىڭ وراسان زور كومەسكى كۇشى مەن نۇرلى بولاشاعىن ايگىلەيدى، ەكى جاقتىڭ گۋمانيتارلىق اۋىس - كۇيىستى كۇشەيتىپ، ەكونوميكا - ساۋدا، جاڭا ەنەرگيالى اۆتوكولىك سياقتى سالالارداعى سەلبەستىكتى تەرەڭدەتۋىن ءۇمىت ەتەمىن، يسپانيا جاق جۇڭگو كاسىپورىندارىنا تاماشا ورتا ازىرلەۋدى قالايدى. يسپانيا، جۇڭگو ەكى جاق دۇنيە ءجۇزىنىڭ بەيبىتشىلىگىن قورعاۋعا، كوپ جاقتىلىقتى قورعاۋعا كۇش سالادى. بۇگىنگى دۇنيە ءجۇزى اۋمالى - توكپەلى قاقتىعىس، كەدەيلىك، كليمات وزگەرىسى سياقتى كوپ ءتۇرلى سىن - سايىسقا ءدوپ كەلىپ وتىر، بۇل حالىقارالىق قوعامنىڭ سەلبەستىكتى كۇشەيتىپ، بىرگە كۇش سالا توتەپ بەرۋىن قاجەت ەتەدى. جۇڭگو − دۇنيە ءجۇزىنىڭ بەيبىتشىلىگى مەن دامۋىن قورعايتىن شەشۋشى كۇش، كەلەلى حالىقارالىق، وڭىرلىك ماسەلەلەردى شەشۋدە ماڭىزدى سىندارلى رول اتقارۋدا. يسپانيا جاق جۇڭگومەن قارىم - قاتىناسىنا ستراتەگيالىق تۇرعىدان مامىلە جاسايدى، ءبىر جۇڭگو ساياساتىن باتىل اتقارادى، جۇڭگونىڭ سەنىمدى سەرىگى بولۋدى قالايدى، يسپانيا مەن جۇڭگونىڭ جاپپاي ستراتەگيالىق سەرىكتەستىك قارىم - قاتىناسىن ونان ارى تەرەڭدەتىپ، ەكى ەل حالقىنىڭ باقىتى جانە دۇنيە ءجۇزىنىڭ بەيبىتشىلىگى مەن گۇلدەنۋىنە اناعۇرلىم زور ۇلەس قوسۋدى ءۇمىت ەتەدى. يسپانيا جاق ەركىن ساۋدا بازارىن اشىق ۇستاۋ پرينسيبىن قولدايدى، ساۋدا سايىسىن قۇپتامايدى، ەۆروپا – جۇڭگو قارىم - قاتىناسىنىڭ اقاۋسىز دامۋىن ۇزدىكسىز جەبەۋدە بەلسەندى رول اتقارۋدى قالايدى.

ەكى جاق ۋكراينا داعدارىسى جانە پالەستينا - يزرايل قاقتىعىسى سياقتى ماسەلەلەر جونىندە پىكىر اۋىستىردى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى