شي جينپيڭ چاۋشياننىڭ مەملەكەت مەرەكەسىنىڭ 76 جىلدىعى بايلانىسىمەن چاۋشياننىڭ ەڭ جوعارى باسشىسى جين جىڭىنعا قۇتتىقتاۋ تەلەگرامماسىن جولدادى

شينحۋا اگەنتتىگى، 9 - ايدىڭ 9 – كۇنى، بەيجيڭ. 9 - ايدىڭ 9 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ چاۋشيان مەملەكەت مەرەكەسىنىڭ 76 جىلدىعى بايلانىسىمەن چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنعا قۇتتىقتاۋ تەلەگرامماسىن جولدادى.

شي جينپيڭ بىلاي دەپ اتاپ كورسەتتى: 76 جىلدان بەرى چاۋشيان ەڭبەك پارتياسىنىڭ باسشىلىعىندا چاۋشيان حالقى ءبىر نيەتپەن ىنتىماقتاسىپ، مەملەكەتتىڭ ءتۇرلى ىستەرىنىڭ قارىشتاپ دامۋىن ىلگەرىلەتتى. تاياۋ جىلداردان بەرى باس شۋجي جولداس چاۋشيان پارتياسى مەن حالقىن باستاپ، چاۋشيان پارتياسىنىڭ 8 - قۇرىلتايىنىڭ جانە ءار رەتكى جالپى ماجىلىستەرىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، ءبىر قىدىرۋ قۇرىلىس جانە دامۋ جەتىستىكتەرىنە قول جەتكىزدى. باس شۋجي جولداس باستاعان چاۋشيان ەڭبەك پارتياسىنىڭ باسشىلىعىندا، چاۋشيان حالقىنىڭ، ءسوز جوق، چاۋشيان ۇلگىسىندەگى سوتسياليزم ىستەرىن ىلگەرىلەتۋ ساپارىندا ۇزدىكسىز تىڭ دا اناعۇرلىم زور جەڭىستەرگە قول جەتكىزەتىندىگىنە سەنەمىن.

شي جينپيڭ بىلاي دەپ باسا دارىپتەدى: جۇڭگو مەن چاۋشيان ەكى ەلدىڭ تاۋ - سۋى تۇتاسقان، ءداستۇرلى دوستىعى ۋاقىت وتكەن سايىن بەكەمدەلە ءتۇستى. بيىل − جۇڭگو مەن چاۋشياننىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى جانە ”جۇڭگو - چاۋشيان دوستىق جىلى“. جاڭا داۋىردە، جاڭا جاعدايدا، جۇڭگو جاق جۇڭگو - چاۋشيان قارىم - قاتىناسىنا ۇزدىكسىز ستراتەگيالىق دەڭگەيدەن جانە ۇزاق بولاشاقتىق تۇرعىدان قارايدى، چاۋشيان جاقپەن ستراتەگيالىق بايلانىستى تەرەڭدەتىپ، سايكەسۋدى، سەلبەسۋدى كۇشەيتىپ، جۇڭگو مەن چاۋشياننىڭ ءداستۇرلى دوستىق سەلبەستىك قارىم - قاتىناسىن بىرگە ويداعىداي قورعاپ، ويداعىداي بەكەمدەپ، ويداعىداي دامىتىپ، سوتسياليزم ىستەرىن بىرگە ىلگەرىلەتىپ، ەكى ەل حالقىنا اناعۇرلىم مول ىرىس - قۇت سيلاۋدى، ءوڭىردىڭ جانە دۇنيە ءجۇزىنىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن جەبەۋگە اناعۇرلىم زور ۇلەس قوسۋدى قالايدى.

كەلۋ قاينارى: حالىق تورابى