لي چياڭ نورۆەگيانىڭ باس ءۋازىرى ستورەمەن كەڭەس وتكىزدى

9 - ايدىڭ 10 - كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن نورۆەگيانىڭ باس ءۋازىرى ستورەمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى ليۋ ۋەيبيڭ تۇسىرگەن

شينحۋا اگەنتتىگى، 9 - ايدىڭ 10 – كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 9 - ايدىڭ 10 - كۇنى تۇستەن بۇرىن بەيجيڭدەگى حالىق سارايىندا جۇڭگوعا رەسمي ساپارمەن كەلگەن نورۆەگيانىڭ باس ءۋازىرى ستورەمەن كەڭەس وتكىزدى.

لي چياڭ مىنانى ءبىلدىردى: بيىل − جۇڭگو مەن نورۆەگيانىڭ ديپلوماتيالىق قارى - قاتىناس ورناتقاندىعىنىڭ 70 جىلدىعى. قازىر جۇڭگو مەن نورۆەگيانىڭ قارى - قاتىناسى اقاۋسىز، ورنىقتى دامۋدا. ءتوراعا شي جينپيڭ كەشە باس ءۋازىر مىرزامەن كەڭەس وتكىزىپ، ەكى ەلدىڭ ديپلوماتيالىق قارىم - قاتىناس ورناتقان 70 جىلدىق تاجىريبەسىن ىشكەرىلەي قورىتىندىلاپ، ەكى جاقتى قارىم - قاتىناستى ونان ارى تەرەڭدەتۋ جونىندە ستراتەگيالىق جوبا جاسادى. جاڭا تاريحي باستامادا جۇڭگو جاق نورۆەگيا جاقپەن بىرگە ەكى ەل باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، ساياسي ءوزارا سەنىمدىلىكتى ۇزدىكسىز بەكەمدەپ، ءوزارا قۇرمەت ەتۋگە، تەڭ تۇرعىدا مامىلە جاساۋعا، ءوزارا پايدا جەتكىزىپ، تەڭ يگىلىككە كەنەلۋگە تاباندى بولىپ، ءار جىكتەگىلەردىڭ، ءار سالانىڭ اۋىس - كۇيىسىن كۇشەيتىپ، ەكى ەل قارىم - قاتىناسى مەن ناقتى سەلبەستىكتىڭ ورنىقتى قاداممەن تىڭ ساتىعا كوتەرىلۋىن ىلگەرىلەتىپ، ەكى ەل حالقىنا اناعۇرلىم كوپ باقىت جاراتىپ، دۇنيە ءجۇزىنىڭ بەيبىت دامۋ ىستەرىن جەبەۋگە اناعۇرلىم زور ۇلەس قوسۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق نورۆەگيا جاقپەن ەكونوميكا - ساۋدا سەلبەستىگىنىڭ كولەمىن كەڭەيتىپ، ساپاسىن جوعارىلاتۋدى ىلگەرىلەتىپ، ساۋدا، فينانس سياقتى سالالارداعى سەلبەستىك كومەسكى كۇشىن ونان ارى اشۋدى قالايدى. جۇڭگو جاق نورۆەگيانىڭ جۇڭگو بازارىنا قارجى قوسۋدى ارتتىرۋىن قارسى الادى، نورۆەگيا جاقپەن بىرگە قۇلشىنىپ، ەكى ەل كاسىپورىندارىنىڭ ءبىر - بىرىنە بارىپ قارجى قوسىپ، شارۋاشىلىقتى گۇلدەندىرۋىنە اناعۇرلىم ساپالى شارۋاشىلىق - ساۋدا ورتاسىن ازىرلەۋدى قالايدى. ەكى جاق مادەنيەت، كوركەمونەر، وقۋ - اعارتۋ، ساياحات، دەنە تاربيە سياقتى سالالارداعى سەلبەستىكتى ۇزدىكسىز تەرەڭدەتىپ، ادامداردىڭ بارىس - كەلىسىنە قولايلىلىق جاساۋى كەرەك. جۇڭگو جاق نورۆەگيا جاقپەن بىرگە جاسىل دامۋدى قول ۇستاسا ىلگەرىلەتىپ، ءداستۇرلى كاسىپ سالاسىندا جاسىل تيپكە بۇرىلىس جاساۋ، جاسىل جاڭادان گۇلدەنگەن كاسىپ سالاسىن جەتىلدىرۋ سياقتى سالالارداعى سەلبەستىكتى كۇشەيتىپ، حالىقارالىق سەلبەستىكتى جيىلەتىپ، دۇنيە جۇزىلىك كليمات پەن قورشاعان ورتانى جونگە سالۋدىڭ اناعۇرلىم ءادىل، ۇيلەسىمدى، سەلبەسىپ تەڭ يگىلىككە كەنەلەتىن بەتالىسقا قاراي دامۋىن ىلگەرىلەتىپ، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن جۇزەگە اسىرۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.

ستورە مىنالاردى ءبىلدىردى: مەن جۇڭگودا تالاي رەت ساپاردا بولىپ، جۇڭگونىڭ قول جەتكىزگەن كورنەكتى دامۋ جەتىستىكتەرىنە كۋا بولدىم ءارى بۇعان جوعارى باعا بەرەمىن. نورۆەگيا - جۇڭگو قارىم - قاتىناسى دوستىق جانە ومىرشەڭدىككە باي دامۋ ارىنىن ساقتادى، نورۆەگيا جاق ءبىر جۇڭگو ساياساتىنا تاباندى بولادى، جۇڭگو جاقتىڭ سەنىمدى سەرىگى بولۋدى قالايدى، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعىن وراي ەتىپ، ءار جىكتەگىلەردىڭ بارىس - كەلىسىن، تىلدەسۋىن كۇشەيتىپ، ءوزارا دوستىق پەن سەنىمدى بەكەمدەپ، ەكى جاقتىڭ ەكونوميكا - ساۋدا، قارجى قوسۋ، تەڭىز - مۇحيت، جاسىل ەكونوميكا، عىلىم - تەحنيكادا جاڭالىق اشۋ، سولتۇستىك ۇيەك سياقتى سالالارداعى ناقتى سەلبەستىگىن ۇزدىكسىز كەڭەيتىپ، گۋمانيتارلىق اۋىس - كۇيىستى تەرەڭدەتۋدى ءۇمىت ەتەدى. نورۆەگيا جاق جۇڭگو جاقپەن حالىقارالىق، وڭىرلىك ماسەلەلەردە كەڭەسۋدى، سايكەسۋدى جيىلەتىپ، كليمات وزگەرىسى سياقتى سالالارداعى سەلبەستىكتى ىلگەرىلەتىپ، دۇنيە جۇزىلىك سىن - سايىسقا بىرگە توتەپ بەرۋدى قالايدى. نورۆەگيا جاق ەركىن، ءادىل ساۋدانى ەجەلدەن دارىپتەپ، كوپ جاقتى ساۋدا ءتۇزىلىسىن قورعاپ، ەۆروپا مەن جۇڭگونىڭ تىلدەسۋدى، سەلبەستىكتى كۇشەيتۋىن قولداپ كەلەدى.

كەڭەستەن كەيىن ەكى ەل باسشىلارى «جۇڭحۋا حالىق رەسپۋبليكاسى مەن نورۆەگيا پاتشالىعىنىڭ جاسىل تيپكە بۇرىلىس جاساۋ كەڭەسىن ورناتۋ جونىندەگى بىرلەسكەن مالىمدەمەسىنە» بىرگە قول قويدى ءارى جاسىل، تومەن كومىرتەكتى دامۋ سياقتى سالالارداعى ەكى جاقتى سەلبەستىك قۇجاتتارىنا قول قويۋعا كۋا بولدى.

كەڭەستەن بۇرىن لي چياڭ حالىق سارايىنىڭ سولتۇستىك زالىندا ستورەنى قارسى الۋ سالتىن وتكىزدى.

ۋ جىڭلۇڭ جوعارىداعى قيمىلدارعا قاتىناستى.

كەلۋ قاينارى: حالىق تورابى